約伯記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
34:1 E-li-hu koh ìn kóng:
34:2 Lín ū tì-hūi ê lâng, tio̍h thiaⁿ góa ê ōe, ū tì-sek ê lâng tio̍h àⁿ hīⁿ-khang thiaⁿ góa kóng.
34:3 In-ūi hīⁿ-á chhì-giām lâng ê ōe, chhin-chhiūⁿ téng-hâm hun-pia̍t chu-bī.
34:4 Lán tio̍h ūi kakī kéng hit-ê ha̍p-gî ê, mā tio̍h chò-hóe chai siáⁿ-mi̍h sī hó.
34:5 In-ūi Io-buh ū kóng, góa sī kong-gī, Siōng-tè toa̍t góa ê chèng-lí;
34:6 góa sûi-jiân ū lí, iáu sǹg sī kóng pe̍h-chha̍t ê; góa sûi-jiân bô kòe-sit, só͘ siū ê siong bē i-tit.
34:7 Siáⁿ lâng chhin-chhiūⁿ Io-buh móa chhùi bú-bān, chhin-chhiūⁿ teh lim chúi?
34:8 I kah chok-gia̍t ê lâng tàu-tīn ū lâi-óng, kah pháiⁿ lâng chò-hóe kiâⁿ.
34:9 In-ūi i bat kóng: Lâng ì-ài Siōng-tè, lóng sī bô lī-ek.
34:10 Só͘-í, lín bêng-lí ê lâng tio̍h thiaⁿ góa ê ōe. Siōng-tè choa̍t-tùi bē kiâⁿ pháiⁿ, Choân-lêng-.ê choa̍t-tùi bē kiâⁿ put-gī.
34:11 In-ūi I beh chiàu lâng só͘ chò ê lâi kā i pò-èng, chiàu lâng só͘ kiâⁿ ê lâi hō͘ i tú-.tio̍h.
34:12 Siōng-tè si̍t-chāi bē chò pháiⁿ; Choân-lêng-.ê mā bô phian-su lâi sím-phòaⁿ.
34:13 Siáⁿ lâng kā tē kau-thok I? Siáⁿ lâng an-tēng choân sè-kài?
34:14 I nā choan-sim kò͘ kakī, kā I ê sîn-lêng kah khùi siu-hôe kui kakī,
34:15 Kiàn-nā ū jio̍k-thé ê ē chò chi̍t-ē sí, lâng iû-goân ē kui thó͘.
34:16 Lí nā bêng-lí, chiū tio̍h thiaⁿ chit-ê ōe, àⁿ hīⁿ-khang thiaⁿ góa kóng ōe ê siaⁿ.
34:17 Oàn-hūn kong-pêⁿ ê kám ē chiáng-koân? Hitê ū kong-gī koh ū koân-lêng ê Siōng-tè, lí kám ē-tàng tēng I ū chōe?
34:18 I tùi kun-ông kóng: Lí sī bô hē-lo̍h ê; tùi kùi-cho̍k kóng: Lí sī siâ-ok ê.
34:19 I bô phian-su khoán-thāi ū chiok-ūi ê, mā bô khi-pîn tiōng-hù, in-ūi hiahê lóng sī I ê chhiú só͘ chō ê.
34:20 Bô gōa kú ê tiong-kan, pòaⁿ-mê ê sî, in chiū sí-bông; jîn-bîn siū iô-tāng, teh kòe-.khì; ióng-béng ê siū tû-bia̍t m̄-bián ēng chhiú.
34:21 In-ūi I ê ba̍k-chiu kàm-chhat ta̍k lâng ê lō͘, khòaⁿ-bêng i ê kha-pō͘.
34:22 Bô ū o͘-àm, bô ū sí-ìm, thang hō͘ kiâⁿ pháiⁿ ê lâng khì bih.
34:23 In-ūi I bô kā lâng tiāⁿ tio̍h sî-kî, hō͘ lâng thang kàu I ê bīn-chêng siū sím-phòaⁿ.
34:24 I phah-chhùi kiông-béng ê lâng, m̄-bián cha-mn̄g, siat-li̍p pa̍t lâng lâi thè in.
34:25 In-ūi I kàm-chhat in ê só͘ chò; tī àm-sî kā in chhia-tó, in chiū bia̍t-bông.
34:26 I tī kûn-chiòng teh khòaⁿ ê só͘-chāi kā in phah, ná chhin-chhiūⁿ teh phah chò pháiⁿ ê lâng.
34:27 In-ūi in kiâⁿ phian-chhoa̍h bô tòe I, mā lóng bô tì-ì I ê lō͘.
34:28 Tì-sú hō͘ sànchhiah lâng tōa-siaⁿ hoah ê siaⁿ thàu kàu I bīn-chêng, I mā thiaⁿ tio̍h khùn-khó͘ ê lâng ê tōa-siaⁿ hoah.
34:29 I hō͘ lâng an-chēng, siáⁿ lâng ē hiâm I m̄ tio̍h? I am bīn, siáⁿ lâng khòaⁿ I ē tio̍h? I khoán-thāi chi̍t kok á-.sī chi̍t-ê lâng lóng sī ánne;
34:30 bián-tit bô kèng-khiân ê lâng chò ông, bián-tit ū lâng bé-thong jîn-bîn.
34:31 Kám ū lâng bat tùi Siōng-tè kóng: Góa í-keng siū chek-hoa̍t, bô koh hoān chōe?
34:32 Góa só͘ bô khòaⁿ-.tio̍h ê, kiû Lí chí-sī góa; góa nā bat chò pháiⁿ, góa bô beh koh-chài chò.
34:33 Kám sī I só͘ pò-èng ê bô chiàu lí ê ì-sù, lí chiah the-sî m̄ chiap-siū? Taⁿ tio̍h kéng ê sī lí, m̄-sī góa; lí só͘ chai ê chò lí kóng.
34:34 Bêng-lí ê lâng kah thiaⁿ góa ê ōe ê tì-hūi lâng, lóng ē tùi góa kóng:
34:35 Io-buh só͘ kóng ê bô tì-sek, i ê ōe bô tì-hūi.
34:36 Goān Io-buh siū chhì-giām kàu thiat-té, in-ūi i ê ìn-tap chhin-chhiūⁿ pháiⁿ lâng.
34:37 In-ūi i tī i ê chōe koh ke-thiⁿ pōe-ge̍k; i tī lán tiong-kan phah chhiú, koh ēng chin chē ōe hoán-tùi Siōng-tè.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。