約伯記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
31:1 Góa kah góa ê ba̍k-chiu li̍p-iok, ná ē chù-ì teh khòaⁿ chāi-sek-lí?
31:2 In-ūi Siōng-tè tùi téng-bīn só͘ tiāⁿ tio̍h ê hūn-gia̍h, Choân-lêng-.ê tùi téng-bīn só͘ phài ê ki-gia̍p sī siáⁿ-mi̍h?
31:3 Kám m̄-sī hoān-lān lîm-kàu put-gī ê lâng, chai-hāi lîm-kàu chok-gia̍t ê lâng?
31:4 Siōng-tè kám m̄-sī teh kàm-chhat góa ê lō͘, tiám-sǹg góa ê kha-pō͘?
31:5 Góa nā kah hi-ké chò-hóe kiâⁿ, kha nā kóaⁿ-kín tòe kúi-chà，
31:6 Goān góa hō͘ kong-tō ê thian-phêng lâi chhìn, hō͘ Siōng-tè chai-iáⁿ góa ê sûn-choân.
31:7 Góa ê kha-pō͘ nā phian-lī chiàⁿ lō͘, góa ê sim nā kin-tòe góa ê ba̍k-chiu, nā ū lahsap liâm tī góa ê chhiú,
31:8 Chiū goān góa só͘ chèng-choh ê hō͘ pa̍t lâng khì chia̍h, góa só͘ chhut-sán ê lông-chok-bu̍t ê kin siū poe̍h khí-.lâi.
31:9 Góa ê sim nā hō͘ chabó͘ lâng ín-iú khì, á-.sī góa bih tī chhù-piⁿ ê mn̂g teh tán chabó͘ lâng,
31:10 chiū goān góa ê chabó͘ lâng kā lâng e bō, pa̍t lâng mā kah i tâng-pâng.
31:11 In-ūi che sī tōa pháiⁿ, sī sím-phòaⁿ-koaⁿ eng-kai pān ê chōe;
31:12 che sī hóe, ē sio kàu bia̍t-bông, poe̍h-tû góa it-chhè só͘ chhut-sán lông-chok-bu̍t ê kin.
31:13 Góa ê lô͘-po̍k lú-pī kah góa piān-lūn ê sî, góa nā ū biáu-sī in ê lí-iû,
31:14 Siōng-tè heng-khí, góa beh án-chóaⁿ chiah hó? I sím-mn̄g ê sî, góa beh án-chóaⁿ ìn?
31:15 Chō góa tī thai-.ni̍h ê Siōng-tè kám m̄-sī mā ū chō i? Chō-sêng goán tī pak-tó͘ ê kám m̄-sī kāng chi̍t-ê Siōng-tè?
31:16 Góa nā kìm-chí sànchhiah lâng ê ì-goān, á-.sī hō͘ kóaⁿ-hū ê ba̍k-chiu khòaⁿ kàu ba̍k-hîn;
31:17 á-.sī góa kakī chia̍h tām-po̍h mi̍h, ko͘-jî chia̍h bô hūn;
31:18 tùi góa siàu-liân, i kah góa chò-hóe tōa-hàn, ná chhin-chhiūⁿ kah lāu-pē kāng-khoán; góa tùi chhut lāu-bú ê pak-tó͘ chiū khan-sêng kóaⁿ-hū;
31:19 góa nā khòaⁿ tio̍h lâng in-ūi bô saⁿ lâi kôaⁿ sí, á-.sī khòaⁿ tio̍h sànchhiah lâng seng-khu bô thang jia-khàm,
31:20 i ê io nā bô kā góa chiok-hok, i mā bô tùi góa ê iûⁿ-mn̂g lâi tit tio̍h un-loán,
31:21 góa nā in-ūi tī siâⁿ mn̂g-kháu ū kā góa pang-chān, chiū khí chhiú kong-kek ko͘-jî;
31:22 ánne, goān góa ê chhiú tùi keng-kah lut lo̍h-.khì, góa ê chhiú-chat tùi kut siū at-tn̄g;
31:23 in-ūi tùi Siōng-tè lâi ê chai-hō hō͘ góa kiaⁿ-hiâⁿ, in-ūi I ê ui-giâm, góa tng bē khí.
31:24 Góa nā ēng n̂g-kim chò ǹg-bāng, tùi sûn-kim kóng: Lí sī góa ê óa-khò;
31:25 góa nā in-ūi châi-bu̍t hong-sēng, in-ūi góa ê chhiú thàn chin chē chîⁿ lâi hoaⁿ-hí;
31:26 góa nā khòaⁿ tio̍h ji̍t teh hoat kng, goe̍h kng-kng teh kiâⁿ;
31:27 góa ê sim tī àm-tiong siū ín-iú, á-.sī góa ê chhùi kah góa ê chhiú sio chim;
31:28 che mā sī sím-phòaⁿ-koaⁿ eng-kai pān ê chōe, in-ūi góa ánne chò sī pōe-ge̍k tī téng-bīn ê Siōng-tè.
31:29 Góa nā lia̍h oàn-hūn góa ê lâng ê chai-hō chò khoài-lo̍k, á-.sī ūi tio̍h i tú tio̍h chai-hō lâi tek-ì;
31:30 kî-si̍t góa bô iông-ín góa ê chhùi hoān chōe, chiù-chó͘ kiû hō͘ in sí;
31:31 nā góa pò͘-pêⁿ lāi ê lâng bô kóng: Siáⁿ lâng ē chhōe tio̍h chi̍t-ê bô chia̍h Siōng-tè ê hó mi̍h kàu pá ê?
31:32 Chhut-gōa lâng bô-hioh tī ke-lō͘, góa kā kiâⁿ lō͘ ê lâng khui mn̂g;
31:33 góa nā chhin-chhiūⁿ A-tám jia-khàm góa ê kòe-sit, kā góa ê chōe-gia̍t khǹg tī góa ê heng chêng;
31:34 góa nā ūi tio̍h kiaⁿ tōa-tīn ê kûn-chiòng, kiaⁿ chong-cho̍k ê biáu-sī, tì-sú tiām-tiām m̄-káⁿ chhut-mn̂g;
31:35 goān ū chi̍t-ê teh thiaⁿ góa! Lí khòaⁿ, ū góa só͘ ōe ê kì-hō, goān Choân-lêng-.ê ìn góa! Goān góa ē tit tio̍h góa ê tùi-te̍k só͘ siá ê kò-chn̄g!
31:36 Góa it-tēng beh kā i phāiⁿ tī góa ê keng-kah-thâu, kā i chò bián-liû lâi tì.
31:37 Góa beh tùi I kóng bêng góa kha-pō͘ ê sò͘-gia̍h, beh chhin-chhiūⁿ kun-ông lâi kìⁿ I.
31:38 Góa ê chhân-hn̂g nā chhut siaⁿ kò góa, lê-kau chò-hóe thî-khàu;
31:39 góa nā chia̍h i ê chhut-sán bô hō͘ i kè-chîⁿ, á-.sī hō͘ gia̍p-chú sit-lo̍h i ê sèⁿ-miā;
31:40 chiū goān chhì-á seⁿ-chhut lâi thè sió-be̍h, pháiⁿ-chháu seⁿ-chhut lâi thè tōa-be̍h. Io-buh ê ōe kóng soah à.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。