創世記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
45:1 Iô-sé-huh Ǹg I ê Hiaⁿ-tī Piáu-bêng Ka-kī ê Sin-hūn
Iô-sé-huh tī hiahê khiā tī i sin piⁿ ê lâng ê bīn-chêng jím bē tiâu, chiū hoah, " Chèng lâng tio̍h lī-khui góa chhut-.khì. " Iô-sé-huh kā i pún-sin piáu-bêng hō͘ hiaⁿ-tī ê sî, chāi-tiûⁿ bô kî-tha ê lâng.
45:2 Iô-sé-huh chiū chhut siaⁿ tōa khàu, Ai-gi̍p lâng thiaⁿ-.tio̍h, Hôa-láu ê ke mā ū thiaⁿ-.tio̍h.
45:3 Iô-sé-huh kā i ê hiaⁿ-tī kóng, " Góa sī Iô-sé-huh, góa ê lāu-pē iáu tī-.leh bô? " I ê hiaⁿ-tī bē tàng ìn, in-ūi tī i ê bīn-chêng lóng chin kiaⁿ-hiâⁿ.
45:4 Iô-sé-huh koh kā i ê hiaⁿ-tī kóng, " Chhiáⁿ kiâⁿ óa-.lâi. " In chiū óa-.lâi, i kóng, " Góa sī lín ê sió-tī Iô-sé-huh, to̍h-sī lín só͘ bē kàu Ai-gi̍p ê.
45:5 Taⁿ m̄-bián in-ūi bē góa kàu chia lâi iu-būn, lâi kakī oàn-hūn. Che sī Siōng-tè chhe góa tāi-seng lín lâi, in-ūi beh pó-choân lín ê sèⁿ-miā.
45:6 Taⁿ tī chit só͘-chāi ê ki-hng í-keng nn̄g nî, iáu ū gō͘ nî, bô thang chèng-choh, bô thang siu-sêng.
45:7 Siōng-tè chhe góa tāi-seng lín lâi, sī ūi tio̍h beh kā lín lâu chéng tī sè-chiūⁿ, koh beh kiâⁿ I tōa ê chín-kiù, pó-choân lín ê oa̍h-miā.
45:8 Án-ne khòaⁿ khí-.lâi, chhe góa kàu chia ê, m̄-sī lín, sī Siōng-tè. I koh hō͘ góa chhin-chhiūⁿ Hôa-láu ê pē, chò i choân ke ê chú kah koán-lí Ai-gi̍p choân tē.
45:9 Lín tio̍h kóaⁿ-kín tńg-khì góa ê lāu-pē hia, kā i kóng, " Lí ê kiáⁿ Iô-sé-huh ánne kóng, ' Siōng-tè hō͘ góa chò choân Ai-gi̍p ê Chú, chhiáⁿ lo̍h-lâi góa chia, m̄ thang iân-chhiân.
45:10 Lí kah lí ê kiáⁿ, lí ê sun, í-ki̍p gû-kûn, iûⁿ-kûn, koh it-chhè só͘-ū ê, lóng thang lâi tòa tī Go-sián ê tē kah góa sio keh-piah.
45:11 Góa beh tī hia hōng-ióng lí, in-ūi iáu ū gō͘ nî ê ki-hng, bián-tit lí kah lí ê ka-koàn kah it-chhè só͘-ū ê lóng lo̍h-lān. '
45:12 Hô-hòng lín ê ba̍k-chiu kah góa ê sió-tī Biān-iá-mín ê ba̍k-chiu, lóng ū khòaⁿ tio̍h góa tùi lín chhin-chhùi só͘ kóng ê ōe.
45:13 Lín mā tio̍h kā góa tī Ai-gi̍p it-chhè ê êng-kng kah lín só͘ khòaⁿ-.tio̍h ê tāichì, lóng kā góa ê lāu-pē kóng, koh tio̍h kóaⁿ-kín kā góa ê lāu-pē poaⁿ-lâi góa chia tòa. "
45:14 Chiū ánne, Iô-sé-huh phak tī i ê sió-tī Biān-iá-mín ê ām-kún thî-khàu, Biān-iá-mín mā tī i ê ām-kún thî-khàu.
45:15 Iô-sé-huh koh kah chèng hiaⁿ-tī chim-chhùi, kā in lám-.leh thî-khàu, āu-lâi i ê hiaⁿ-tī chiū kah i kóng-ōe.
45:16 Chit-ê hong-siaⁿ thoân kàu Hôa-láu ê kiong lāi, kóng, " Iô-sé-huh ê hiaⁿ-tī lâi à. " Hôa-láu kah i ê jîn-sîn lóng chin hoaⁿ-hí.
45:17 Hôa-láu kā Iô-sé-huh kóng, " Lí tio̍h kā lí ê hiaⁿ-tī kóng, ' Lín tio̍h ánne kiâⁿ, kā mi̍h-kiāⁿ hō͘ chengseⁿ chài, chhut-hoat khì Ka-nân tē.
45:18 Kā lín ê lāu-pē kah lín ê ka-koàn lóng poaⁿ-lâi góa chia, góa beh kā Ai-gi̍p tē ê hó mi̍h hō͘ lín, lín mā thang chia̍h chit só͘-chāi ê san-tin hái-bī.
45:19 Taⁿ góa bēng-lēng lí, lín tio̍h ánne chò, Tùi Ai-gi̍p tē tòa chhia khì, kā lín ê bó͘-kiáⁿ kah lín ê lāu-pē lóng poaⁿ-lâi chia.
45:20 M̄-thang khòaⁿ-tiōng lín chhù lāi ê mi̍h, in-ūi Ai-gi̍p choân tē ê hó mi̍h, lóng sī lín ê. '"
45:21 I-su-la-el ê chèng kiáⁿ chiū ánne chhut-hoat. Iô-sé-huh chiàu Hôa-láu ê bēng-lēng hō͘ in chhia kah lō͘ tiong su-iàu ê chia̍h-mi̍h,
45:22 Koh hō͘ in chi̍t-ê lâng chi̍t thò saⁿ-khò͘, to̍k-to̍k hō͘ Biān-iá-mín gîn saⁿ-pah, saⁿ-khò͘ gō͘ thò.
45:23 I sàng in lāu-pē ê mi̍h, kì tī ē-té: lî káng cha̍p chiah, chài Ai-gi̍p ê hó mi̍h; lî-bó cha̍p chiah, chài ngó͘-kok, piáⁿ kah chhài, hō͘ in lāu-pē beh lâi Ai-gi̍p ê lō͘-.ni̍h thang ēng.
45:24 Iô-sé-huh chiū chhe i ê hiaⁿ-tī tńg-.khì, in chiū chhut-hoat. Iô-sé-huh koh kā in kóng, " Lín m̄ thang tī lō͘-.ni̍h oan-ke. "
45:25 In tùi Ai-gi̍p chhut-hoat, lâi-kàu Ka-nân tē, to̍h-sī in lāu-pē Iâ-kop hia.
45:26 In kā lāu-pē kóng, " Iô-sé-huh iáu tī-.leh, koh teh koán-lí Ai-gi̍p choân tē. " Iâ-kop sim hūn-.khì, in-ūi m̄-sìn in ê ōe.
45:27 In chiū kā Iô-sé-huh tùi in só͘ kóng ê ōe, lóng kā i kóng; i koh khòaⁿ tio̍h Iô-sé-huh só͘ chhe lâi beh chài i ê chhia, in lāu-pē Iâ-kop ê sim chiū oa̍h khí-.lâi.
45:28 I-su-la-el kóng, " Hó à; góa ê kiáⁿ Iô-sé-huh iáu tī-.leh, thàn góa iáu-bōe sí, góa beh lâi-khì khòaⁿ i. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。