約伯記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
30:1 Chóng-.sī, hiān-kim pí góa khah siàu-liân ê lâng kā góa thí-chhiò, hit khoán lâng ê lāu-pē, góa pún-lâi khòaⁿ in bē khah su góa iûⁿ-kûn ê káu.
30:2 In ê chòng-liân í-keng soe-thè, in chhiú ê khùi-la̍t kah góa ū siáⁿ-mi̍h koan-hē?
30:3 In in-ūi khiàm-khoeh kah iau-gō, seng-khu siau-sán; tī hong-hùi léng-chēng ê o͘-àm tiong khè ta-thô͘.
30:4 Tī chháu-phō tiong-kan bán kiâm chháu lâi chò chhài, kim-chhiok-hoe ê kin chò in ê chia̍h-mi̍h.
30:5 In tùi lâng ê tiong-kan siū kóaⁿ-chhut; lâng hoah in chhin-chhiūⁿ teh hoah chha̍t.
30:6 In soah tio̍h tòa tī soaⁿ-kok ê chhim kheⁿ, tī tē-hia̍t kah chio̍h-tōng ê lāi-bīn.
30:7 Tī chhiū-nâ lāi chhin-chhiūⁿ lî teh háu; tī chhì-phè kha teh chhun-ûn.
30:8 In sī gōng lâng ê kiáⁿ-jî, sī hā-chiān lâng ê kiáⁿ-jî; siū piⁿ-phah hông kóaⁿ-chhut kéng gōa.
30:9 Taⁿ chiahê lâng lia̍h góa chò in ê koa-khek, chò in ê ōe-pèⁿ.
30:10 In thó-ià góa, lī-khui góa hn̄g-hn̄g; kìⁿ tio̍h góa ê bīn chiū phùi nōa.
30:11 In-ūi Siōng-tè pàng lēng I ê soh lâi kā góa khó͘-to̍k, in chiū tī góa ê bīn-chêng bô kakī iok-sok.
30:12 Pi-chiān ê chéng-lūi tī góa ê chiàⁿ pêng khí-.lâi, sak-khui góa ê kha, chō hām-hāi ê lō͘ lâi kong-kek góa.
30:13 In húi-hoāi góa ê lō͘, ke-thiⁿ góa ê hoān-lān, mā bô lâng chó͘-tòng in lâi pang-chān góa.
30:14 In chhin-chhiūⁿ tùi tōa khang ê phòa-khiah lâi, tī húi-hoāi ê tiong-kan it-ti̍t kō-.lâi.
30:15 Kiaⁿ-hiâⁿ ê tāichì oa̍t-tńg lîm-kàu tī góa, in kóaⁿ-tio̍k góa ê êng-kng chhin-chhiūⁿ hong; góa ê hok-lo̍k chhin-chhiūⁿ hûn kòe-.khì.
30:16 Taⁿ góa ê sim-sîn tī góa ê lāi-bīn ke̍k sit-chì; hoān-lān ê ji̍t-chí kā góa khîⁿ tiâu-tiâu.
30:17 Àm-sî góa ê kut siū chhì-chha̍k lut chat; thàng-thiàⁿ khè góa bô soah.
30:18 In-ūi chit-ê tōa ê la̍t, góa ê saⁿ-khò͘ piàn kah m̄-chiâⁿ-iūⁿ; chhin-chhiūⁿ saⁿ ê ām-niá kā góa sok ân-ân.
30:19 Siōng-tè kā góa hiat tī thô͘-môe, góa chiū chhin-chhiūⁿ thô͘-soa hún kah hóe-hu.
30:20 Góa kiû-kiò Siōng-tè, Lí m̄ ìn góa; góa khiā khí-.lâi, Lí kantaⁿ teh khòaⁿ.
30:21 Lí piàn chân-jím lâi khoán-thāi góa, koh ēng Lí ê chhiú ê tōa la̍t pek-hāi góa.
30:22 Kí-khí góa tī hong ê téng-bīn, hō͘ góa khiâ hong; koh tī chin thàu ê hong tiong kā góa siau-bia̍t.
30:23 In-ūi góa chai Lí ē hō͘ góa tì-kàu sí-bông, kàu tī hit keng ūi tio̍h só͘-ū oa̍h-miā lâi tiāⁿ tio̍h ê chhù.
30:24 Lâng poa̍h-tó ê sî, Lí kám bô chhun chhiú kā i khan khí-.lâi? Lâng tú tio̍h chai-hō, kám bô in-ūi ánne lâi hoah kiù lâng?
30:25 Lâng tú tio̍h hoān-lān, góa kám bô ūi tio̍h i thî-khàu? Lâng sànchhiah, góa ê sim kám bô ūi tio̍h i iu-būn?
30:26 Góa ǹg-bāng tit tio̍h hok-khì, chai-hō tian-tò chiū kàu; góa teh thèng-hāu kng-bêng, o͘-àm chiū lâi.
30:27 Góa ê sim-tn̂g kún-ká bô soah; khó͘-lān ê ji̍t-chí lîm-kàu góa.
30:28 Góa bô ji̍t-kng chiū thî-khàu kiâⁿ-chhut-.khì, góa khiā tī hōe tiong teh tōa-siaⁿ hoah kiû pang-chān.
30:29 Góa kah soaⁿ-káu chò hiaⁿ-tī, kah tô-chiáu chò tâng-phōaⁿ.
30:30 Góa ê phôe-hu o͘ chiū liù phôe, góa ê kut-thâu in-ūi jia̍t soah siū sio-.khì.
30:31 Só͘-í, góa ê khîm piàn-chò pi-ai ê im, góa ê siau piàn-chò thî-khàu ê siaⁿ.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。