約伯記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
29:1 Io-buh Chòe-āu ê Sin-sò͘
Io-buh koh sòa-chiap thê-khí i ê giân-lūn, kóng:
29:2 Goān góa chhin-chhiūⁿ chá-chêng hiahê nî-goe̍h, chhin-chhiūⁿ Siōng-tè pó-siú góa ê ji̍t-chí.
29:3 Hit sî, I ê teng chiò tī góa ê thâu-khak, góa khò I ê kng kiâⁿ-kòe o͘-àm.
29:4 Chhin-chhiūⁿ góa tī chhiu-thiⁿ ê ji̍t-chí, Siōng-tè tī góa ê pò͘-pêⁿ kah góa chhin-bi̍t.
29:5 Choân-lêng-.ê iáu koh kah góa tông-chāi, góa ê kiáⁿ-jî tī góa ê sì-kho͘-ûi.
29:6 Ēng leng sé góa ê kha, chio̍h-pôaⁿ kā góa chhut iû kahná khe lâu.
29:7 Góa kiâⁿ kàu siâⁿ mn̂g, I tī ke-lō͘ kā góa siat chō-ūi.
29:8 Siàu-liân lâng khòaⁿ tio̍h góa chiū cháu-khì bih, lāu lâng mā khiā khí-.lâi.
29:9 Siú-léng chiū thêng-chí i ê ōe, ēng chhiú am in ê chhùi.
29:10 Kùi-cho̍k bô khui siaⁿ, chhùi-chi̍h liâm tī téng-hâm.
29:11 In-ūi hīⁿ-khang thiaⁿ tio̍h ê, chiū chheng góa chò ū hok-khì; ba̍k-chiu khòaⁿ tio̍h ê, chiū kā góa chò kiàn-chèng.
29:12 In-ūi góa chín-kiù ai-kiû ê kan-khó͘ lâng kah bô lâng pang-chān ê ko͘-jî.
29:13 Teh beh sí ê lâng kā góa chiok-hok, góa mā hō͘ kóaⁿ-hū ê sim hoaⁿ-hí lâi chhiùⁿ koa.
29:14 Góa chhēng kong-gī, i mā ēng góa chò saⁿ chhēng, koh ēng kong-pêⁿ chò phâu, chò bō.
29:15 Góa chò chheⁿmê lâng ê ba̍k-chiu, chò pái-kha lâng ê kha.
29:16 Góa chò sànchhiah lâng ê pē, góa cha-chhat pêng-siông sî m̄ bat ê lâng ê àn-kiāⁿ.
29:17 Góa phah-tn̄g pháiⁿ lâng ê gê-chô, chhiúⁿ i ê chhùi-khí só͘ kā ê mi̍h.
29:18 Góa chiū kóng: Góa beh sí tī góa ê siū, góa ê ji̍t-chí ē ke-thiⁿ chhin-chhiūⁿ soa hiah chē.
29:19 Góa ê kin chhun-kàu chúi piⁿ, lō͘-chúi kui mê lo̍h tī góa ê ki.
29:20 Góa ê êng-kng tī góa tiāⁿtiāⁿ sin, góa ê kiong tī góa ê chhiú koh-chài ân.
29:21 Lâng thiaⁿ tio̍h góa chiū thèng-hāu, tiām-tiām teh tán góa chí-kàu.
29:22 Góa kóng liáu, in chiū bô koh kóng; góa ê ōe chhin-chhiūⁿ hō͘ tih tī in ê téng-bīn.
29:23 In thèng-hāu góa chhin-chhiūⁿ teh thèng-hāu hō͘-chúi, tōa khui in ê chhùi chhin-chhiūⁿ teh him-bō͘ chhun-thiⁿ ê hō͘.
29:24 In sit-bōng, góa kā in an-ùi; in bē tàng kái-piàn góa ê bīn ê kng.
29:25 Góa kā in kéng lō͘, góa chē thâu ūi; góa chhin-chhiūⁿ ông tòa tī kun-tūi tiong, koh ná chhin-chhiūⁿ teh an-ùi siong-sim ê lâng.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。