約伯記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
27:1 Io-buh koh sòa-chiap thê-khí i ê giân-lūn kóng:
27:2 Siōng-tè pak toa̍t góa ê lí-iû, Choân-lêng-.ê khó͘-to̍k góa ê sim-sîn; góa kí I éng-oán ê oa̍h-miā lâi kóng;
27:3 In-ūi góa ê oa̍h-miā iáu koh oân-choân tī góa ê lāi-bīn, Siōng-tè ê khùi iáu koh tī góa ê phīⁿ-khang lāi;
27:4 Góa ê chhùi-tûn choa̍t-tùi bô kóng put-gī, góa ê chi̍h mā bô kóng kúi-chà.
27:5 Góa choa̍t-tùi bô chheng lín chò gī, góa kàu sí mā m̄-sǹg góa chò bô oân-choân.
27:6 Góa chip-siú góa ê gī, bô beh pàng-sak, góa ê sim chi̍t-sì-lâng bô chek-pī góa.
27:7 Goān góa ê tùi-te̍k chhin-chhiūⁿ pháiⁿ lâng, goān hit-ê khí-lâi kong-kek góa ê lâng chhin-chhiūⁿ put-gī ê lâng.
27:8 Bô kèng-khiân ê lâng sûi-jiân chhiúⁿ tio̍h châi-lī, Siōng-tè chhú i ê oa̍h-miā ê sî, iáu ū siáⁿ-mi̍h ǹg-bāng?
27:9 Hoān-lān lîm-kàu i ê sî, Siōng-tè kám ē thiaⁿ i ê kiû-kiò?
27:10 I kám ē ēng Choân-lêng-.ê chò hoaⁿ-hí? I kám ū sî-siông kiû-kiò Siōng-tè?
27:11 Siōng-tè só͘ chò ê góa beh kà-sī lí, Choân-lêng-.ê só͘-ū ê góa mā bô ún-môa.
27:12 Lí khòaⁿ, lín pún-sin lóng ū khòaⁿ-.tio̍h, ná ē choân-pō͘ lóng sī hi-ké?
27:13 Pháiⁿ lâng tùi Siōng-chú só͘ siū ê hūn-gia̍h, kiông-pō ê lâng tùi Choân-lêng-.ê só͘ tit tio̍h ê sán-gia̍p to̍h-sī chit-ê.
27:14 I ê kiáⁿ-jî nā ke-thiⁿ chin chē, sī beh hō͘ to thâi-sí; i ê kiáⁿ-sun bô thang chia̍h kàu-gia̍h.
27:15 I só͘ chhun lo̍h-.lâi ê lâng ē tú tio̍h un-e̍k lâi bâi-chòng, liân i ê kóaⁿ-hū mā bô ūi tio̍h in lâi thî-khàu.
27:16 I sûi-jiân chek-chū gîn chhin-chhiūⁿ tîn-ai hiah chē, koh chún-pī saⁿ-khò͘ chhin-chhiūⁿ thô͘;
27:17 I chò i chún-pī, chóng-.sī, gī lâng ē the̍h-lâi chhēng, bô chōe ê lâng ē pun i ê gîn.
27:18 I chhin-chhiūⁿ chiù-thâng khí chhù, koh chhin-chhiūⁿ chiú-keⁿ ê lâng tah i ê liâu-á.
27:19 I hó-gia̍h tó-.leh, chóng-.sī, bô tit tio̍h bâi-chòng; i thí-khui ba̍k-chiu chiū sí-.khì.
27:20 Kiaⁿ-hiâⁿ ē chhin-chhiūⁿ tōa-chúi jiok tio̍h i; àm-sî ê tōa hong ē kā i sàu-.khì.
27:21 Tang-hong chi̍t-ē chhoe tio̍h i, i chiū khì; koh kóaⁿ i lī-khui pún só͘-chāi.
27:22 In-ūi Siōng-tè siā tio̍h i mā bô liōng-chêng; i khó͘ bē tàng thoat-lī I ê chhiú.
27:23 Lâng ē tùi i phah pho̍k-á, mā ē chhiàng-siaⁿ kā i kóaⁿ lī-khui pún só͘-chāi.
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。