約伯記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
26:1 Io-buh ìn kóng:
26:2 Bô khùi-la̍t ê lâng, lí ū kā i pang-chān kàu án-chóaⁿ! Chhiú-kut nńg ê lâng, lí ū chín-kiù i kàu án-chóaⁿ!
26:3 Lí ū án-chóaⁿ kà-sī bû-ti ê lâng, hō͘ i koh khah chai-iáⁿ chin-si̍t ê tì-sek?
26:4 Lí tùi siáⁿ lâng kóng-ōe? Siáⁿ lâng ê sîn-lêng tùi lí chhut?
26:5 Im-hûn phi̍h-phi̍h chhoah, tī chúi-ē í-ki̍p tòa tī hia ê.
26:6 Im-kan tī I ê bīn-chêng lō͘-hiān, tē-ga̍k （ Chù, bia̍t-bông ê só͘-chāi, goân pán-pún im-e̍k chò “Al-bah-tùn"） mā bô khàm ba̍t.
26:7 I tī khong-tiong ê téng-bīn thí-khui pak-hong, kā tē tiàu tī bô mi̍h ê téng-bīn.
26:8 I ēng chúi pau tī ba̍t hûn lāi; hûn tī chúi ê ē-bīn mā bē phòa-li̍h.
26:9 I jia-cha̍h I ê chō-ūi, koh kā hûn pho͘ tī hit téng-bīn.
26:10 I tī chúi-bīn ōe chhut kài-hān, kàu tī kng kah àm kau-kài ê só͘-chāi.
26:11 Thiⁿ ê thiāu tín-tāng, in-ūi I ê chek-pī lâi tio̍h-kiaⁿ kah gāng-.khì.
26:12 I ēng lêng-le̍k kek-tōng tōa hái, I ēng tì-sek phah-phòa La̍h-hap.
26:13 I ēng I ê khùi hō͘ thiⁿ ū chheng-chhái, I ê chhiú chha̍k-thàu gâu cháu ê chôa.
26:14 Lí khòaⁿ, chiahê put-kò sī I só͘ chò ê sió-khóa tāichì; lán só͘ tùi I thiaⁿ tio̍h ê siaⁿ sè kàu án-chóaⁿ? I tōa koân-lêng ê lûi, siáⁿ lâng ē-tàng chhek-to̍k?
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。