約伯記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
22:1 Tē-saⁿ pái Tùi-ōe
Thê-man lâng E-lī-hoat ìn kóng:
22:2 Lâng tùi Siōng-tè kám ū lī-ek? Tì-hūi ê lâng si̍t-chāi sī lī-ek kakī.
22:3 Lí chò lâng kong-gī, kám ē hō͘ Choân-lêng-.ê hoaⁿ-hí? Lí só͘ kiâⁿ oân-siān, kám ē hō͘ I tit tio̍h lī-ek?
22:4 Kám sī in-ūi lí kèng-ùi Siōng-tè, I lâi kā lí chek-pī, kā lí sím-phòaⁿ?
22:5 Lí ê chōe-ok kám m̄-sī chin tōa? Lí ê chōe-kò si̍t-chāi bû kiông-chīn.
22:6 Lí bô-iân bô-kò͘ kā hiaⁿ-tī the̍h tí-ah-phín; koh thǹg bô thang chhēng ê lâng ê saⁿ.
22:7 Ià-siān ê lâng lí bô ēng chúi hō͘ in lim, iau gō ê lâng lí tùi in siu-chông chia̍h-mi̍h.
22:8 Ū lêng-le̍k ê lâng tit tio̍h thó͘-tē; thé-biān ê lâng tiàm tī hit tiong-kan.
22:9 Lí hō͘ kóaⁿ-hū khang-chhiú tńg-.khì, ko͘-jî ê chhiú-kut siū at-tn̄g.
22:10 Só͘-í, oa̍h-tauh sì-bīn ûi lí; kiaⁿ-hiâⁿ hut-jiân lîm-kàu, kiáu-jiáu lí,
22:11 Á-sī o͘-àm hō͘ lí bô thang khòaⁿ-.tio̍h, chin chē chúi kā lí im-ba̍t.
22:12 Siōng-tè kám m̄-sī tī thiⁿ ê koân? Tio̍h khòaⁿ chheⁿ-sîn ê ke̍k-thâu ná ē hiah- koân!
22:13 Lí chiū kóng: " Siōng-tè chai siáⁿ-mi̍h? I kám ē khòaⁿ thàu o͘-àm lâi sím-phòaⁿ?
22:14 Ba̍t hûn kā I jia-khàm, hō͘ I khòaⁿ bē tio̍h; I kiâⁿ tī kiong-chhong ê téng-bīn."
22:15 Lí kám ài chun-thàn kó͘-chá lâng ê lō͘, to̍h-sī pháiⁿ lâng só͘ kiâⁿ ê lō͘?
22:16 In sī sî iáu-bōe kàu to̍h siū siau-bia̍t, in ê tē-ki hō͘ tōa-chúi lâu-.khì.
22:17 In tùi Siōng-tè kóng, tio̍h lī-khui goán; koh kóng, Choân-lêng-.ê ē kā goán chò siáⁿ-mi̍h?
22:18 Chóng-.sī, Siōng-tè kā hó mi̍h chhiong-móa i ê chhù; goān pháiⁿ lâng ê kè-bô͘ lī-khui góa hn̄g-hn̄g.
22:19 Gī lâng ē khòaⁿ tio̍h lâi hoaⁿ-hí; bô chōe ê lâng ē kā in thí-chhiò;
22:20 kóng, Hiahê khí-lâi kong-kek goán ê lâng kó-jiân siū chián-tû; in só͘ chhun lo̍h-.lâi ê mi̍h-kiāⁿ lóng hō͘ hóe sio-.khì.
22:21 Taⁿ lí tio̍h kah Siōng-tè chhin-bi̍t, chiū ē tit tio̍h pêng-an; ánne, hok-khì ē lîm-kàu lí.
22:22 Taⁿ lí tio̍h sêng-siū I chhùi lāi ê kà-sī; kā I ê ōe khǹg tī lí ê sim-lāi.
22:23 Lí nā kui-ǹg Choân-lêng-.ê, tùi lí ê pò͘-pêⁿ lāi tû-khì put-gī, lí chiū ē tit tio̍h heng-khí.
22:24 Lí tio̍h kā pó-pòe hiat tī tîn-ai-.ni̍h, hiat O-hui ê kim tī khe-hô chio̍h-thâu ê tiong-kan;
22:25 Choân-lêng-.ê chiū ē chò lí ê pó-pòe, chò lí ê bûn-gîn.
22:26 Lí chiū ē lia̍h Choân-lêng-.ê chò hoaⁿ-hí, bīn gia̍h koân ǹg Siōng-tè.
22:27 Lí tùi I kî-tó, I chiū thiaⁿ lí, lí mā beh siā lí ê goān.
22:28 Lí tiāⁿ tio̍h beh chò siáⁿ-mi̍h, hit-ê tāichì it-tēng chiâⁿ; kng mā ē chiò lí ê lō͘.
22:29 In kàng kē ê sî, lí iû-goân thang kóng: seng koân; khiam-pi ê lâng Siōng-tè ē chín-kiù i.
22:30 Liân ū chōe ê lâng Siōng-tè mā ē kiù i; in-ūi lí ê chhiú chheng-khì, i chiū ē tit-kiù.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。