約伯記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
20:1 Ná-má lâng Cho-hoah ìn kóng:
20:2 Góa ê sim-lāi tio̍h-kip, só͘-í, góa ê sim-su pek góa tio̍h ìn.
20:3 Góa thiaⁿ tio̍h hit-ê lêng-jio̍k góa ê lâng teh chek-pī, góa tì-hūi ê sim kà góa ìn.
20:4 Lí kám m̄-chai tùi kó͘-chá, tùi sè-kan ū jîn-lūi í-lâi;
20:5 pháiⁿ lâng ê tōa hoaⁿ-hí bô kú-tn̂g, bô kèng-khiân ê lâng ê hoaⁿ-hí kám m̄-sī ba̍k-nih-kú niā-niā?
20:6 I ê koân sûi-jiân tú thiⁿ, i ê thâu-khak sûi-jiân kàu tī hûn-.ni̍h;
20:7 i kàu bóe ē bia̍t-bông, chhin-chhiūⁿ kakī ê pùn; pêng-siông sî khòaⁿ tio̍h i ê lâng ē kóng, i tī tó-ūi?
20:8 I ē chhin-chhiūⁿ bîn-bāng poe-.khì, chhōe bē tio̍h; i ē siū kóaⁿ-cháu, chhin-chhiūⁿ àm-sî ê ī-siōng.
20:9 Pêng-siông sî khòaⁿ tio̍h i ê lâng, i ê ba̍k-chiu bē koh-chài khòaⁿ tio̍h i; i ê pún só͘-chāi mā bô koh khòaⁿ tio̍h i.
20:10 I ê kiáⁿ-jî ē tùi sànchhiah lâng kiû in, i ê chhiú ē hêng châi-bu̍t.
20:11 I ê kut chhiong-móa siàu-liân ê khùi-la̍t, chóng-.sī, ē kah i chò-hóe tó tī thô͘-.ni̍h.
20:12 Chōe-ok tī i ê chhùi sûi-jiân tiⁿ, sûi-jiân i khǹg tī i ê chi̍h hē;
20:13 Sûi-jiân pó-sioh, m̄-khéng pàng-sak, tiāⁿtiāⁿ kâm tī i ê chhùi;
20:14 I ê chia̍h-mi̍h kàu tī i ê tn̂g-á chiū piàn, piàn-sêng to̍k-chôa ê táⁿ tī i ê lāi-bīn.
20:15 I thun-chia̍h châi-pó, ē koh thò͘-chhut; Siōng-tè ē tùi i ê pak-tó͘ jîm chhut-.lâi.
20:16 I ē suh to̍k-chôa ê to̍k; chôa ê chi̍h mā ē kā i hāi-sí.
20:17 I bē tàng khòaⁿ tio̍h kang-hô, lâu bi̍t kah leng ê khe.
20:18 I lô-khó͘ só͘ tit tio̍h ê mi̍h-kiāⁿ tio̍h hêng lâng, bô thang chia̍h lo̍h-.khì, bē chiàu só͘ kau-e̍k ê châi-bu̍t lâi hoaⁿ-hí.
20:19 In-ūi i ap-chè sànchhiah lâng, koh kā i khì-sak; kiông chiàm lâng ê chhù, mā bē tàng khí-chō.
20:20 In-ūi i ê sim-lāi m̄ bat an-chēng, i só͘ hoaⁿ-hí ê lóng bē tàng pó-choân.
20:21 Bô chi̍t kiāⁿ bô hō͘ i thun lo̍h-.khì, só͘-í, i ê hok-lo̍k bē kú-tn̂g.
20:22 Tng i hó-gia̍h chhiong-chiok ê sî, ē kàu e̍h chiⁿ-chiⁿ ê só͘-chāi; kan-khó͘ ê lâng lóng ē chhut-chhiú kā i phah.
20:23 I ê pak-tó͘ chia̍h pá ê sî, Siōng-tè ē kàng béng-lia̍t ê siū-khì tī i sin chiūⁿ; i teh chia̍h ê sî, ē kàng siū-khì tī i ê téng-bīn.
20:24 I siám-lī thih ê khì-kū, tâng ê kiong ē siā-thàu i.
20:25 I chi̍t-ē poe̍h kiong, chiū tùi i ê seng-khu chhut-.lâi, kng nà-nà ê chìⁿ bóe ē tùi i ê táⁿ chhut-.lâi; kiaⁿ-hiâⁿ ē lîm-kàu tī i.
20:26 It-chhè ê o͘-àm ūi tio̍h i ê châi-pó siu-chông khí-.lâi, lâng só͘ bô pûn hoa ê hóe ē kā i sio bia̍t-tiāu; koh ē kā lâu tī i ê pò͘-pêⁿ ê mi̍h-kiāⁿ sio-húi.
20:27 Thiⁿ ē hián-bêng i ê chōe-ok, tē ē khí-lâi kong-kek i.
20:28 I ê ke-hóe ē siau sit-.khì, lóng ē tī Siōng-tè siū-khì ê ji̍t siau-bia̍t.
20:29 Che to̍h-sī pháiⁿ lâng tùi Siōng-tè só͘ tit ê hūn-gia̍h; sī Siōng-tè kā i tiāⁿ tio̍h ê sán-gia̍p.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。