約伯記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
19:1 Io-buh ìn kóng:
19:2 Lín hō͘ góa ê sim iu-khó͘, ēng ōe siong-hāi góa tio̍h kàu tang-sî?
19:3 Lín chit cha̍p pái lêng-jio̍k góa, lín pháiⁿ khoán-thāi góa mā bô kakī kiàn-siàu.
19:4 Góa nā kó-jiân ū kòe-sit, chit-ê kòe-sit sī chāi tī góa kakī.
19:5 Lín kó-jiân beh tùi góa tōa khoa-kháu, koh ēng góa ê lêng-jio̍k chek-pī góa;
19:6 lín chiū tio̍h chai che sī Siōng-tè óng-khut góa, ēng I ê lô-bāng ûi góa.
19:7 Lí khòaⁿ, góa in-ūi oan-óng lâi tōa-siaⁿ hoah, mā bô tit tio̍h thiaⁿ, góa âu-kiò mā bô tit tio̍h kong-toàn.
19:8 Siōng-tè ûi-cha̍h góa ê lō͘, hō͘ góa bē tàng kòe-.khì, koh hō͘ góa ê lō͘-kèng o͘-àm.
19:9 Siōng-tè thǹg-khì góa ê êng-kng, kā góa ê thâu-khak téng ê bián-liû liù-.khì.
19:10 I tī sì-kho͘-ûi húi-hoāi góa, góa chiū sí-.khì; góa ê ǹg-bāng poe̍h khí-.lâi, chhin-chhiūⁿ teh poe̍h chhiū.
19:11 I ê siū-khì ke̍k-lia̍t kong-kek góa, I lia̍h góa chò I ê tùi-te̍k ê chi̍t-ê.
19:12 I ê kun-peng chò chi̍t-hóe lâi, chō in ê lō͘ lâi kong-kek góa, chat iâⁿ tī góa ê pò͘-pêⁿ ê sì-kho͘-ûi.
19:13 I hō͘ góa kah hiaⁿ-tī keh-khui hn̄g-hn̄g, sio-bat ê lâng kah góa chheⁿ-so͘.
19:14 Góa ê chhin-lâng kah góa toān-choa̍t, góa chhin-bi̍t ê pêng-iú lóng bē kì-tit góa.
19:15 Kià-kha tī góa chhù lāi ê lâng kah góa ê lú-pī, lóng kā góa khòaⁿ-chò sī gōa-lâng; in kā góa khòaⁿ-chò sī gōa-pang lâng.
19:16 Góa kiò góa ê lô͘-po̍k kiò bē ìn, góa tio̍h chhin-chhùi kā i kiû.
19:17 Góa chhùi ê khì-bī hō͘ góa ê bó͘ thó-ià; kah góa siâng-pak ê mā thó-ià góa ê chhàu-bī.
19:18 Liân gín'á mā khòaⁿ-khin góa; góa nā khí-.lâi, in lóng kā góa khau-sé.
19:19 Góa chhin-bi̍t ê pêng-iú lóng thó-ià góa; góa pêng-siông sî só͘ thiàⁿ ê lâng tùi góa pìⁿ-bīn.
19:20 Góa ê phôe mo͘h kah liâm kut; góa ê chhùi-khí chí ū chhun khí hōaⁿ.
19:21 Góa ê pêng-iú, lín tio̍h khó-liân góa, khó-liân góa; in-ūi Siōng-tè ê chhiú bong tio̍h góa.
19:22 Lín ná ē chhin-chhiūⁿ Siōng-tè teh poek-hāi góa, lia̍h góa ê bah chò bô thang pá-chiok?
19:23 Taⁿ goān kā góa ê ōe siá khí-.lâi, koh kì tī chheh-.ni̍h;
19:24 Ēng thih-chām khek-tiâu koh ēng iân koàn tī chio̍h-thâu-.ni̍h; hō͘ i éng-oán chûn-chāi.
19:25 In-ūi góa chai kiù-sio̍k góa ê sī oa̍h ê Siōng-tè; ji̍t-āu I ē khiā tī thô͘ ê téng-bīn;
19:26 góa chit-ê phôe pāi-hoāi liáu-āu, góa ē tī jio̍k-thé ê gōa-bīn ē-tàng kìⁿ Siōng-tè.
19:27 Góa pún-sin ē khòaⁿ tio̍h I sī ūi góa ê, góa chhin-ba̍k khòaⁿ tio̍h I m̄-sī gōa-lâng; góa ê sim-tn̂g tī góa lāi-bīn jia̍t kah kiông-beh iûⁿ-.khì.
19:28 Lín nā kóng, goán ē án-chóaⁿ pek-hāi i! Tāi-chì ê kin-pún chāi tī i kakī.
19:29 Lín tio̍h kiaⁿ to-kiàm, in-ūi siū-khì chiū ū to-kiàm ê hêng-hoa̍t, hō͘ lín chai ū sím-phòaⁿ.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。