約伯記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
18:1 Siú-oa lâng Bil-tat ìn kóng:
18:2 Lí teh chhńg ōe-phāng beh kàu tang-sî ah? Lí tio̍h chim-chiok siūⁿ, jiân-āu goán chiah kóng.
18:3 Goán ná ē hō͘ lí khòaⁿ-chò chengseⁿ, hō͘ lí khòaⁿ-chò a-se?
18:4 Lí chit-ê tōa siū-khì thiah-li̍h kakī ê saⁿ, tē kám ē ūi tio̍h lí lâi siū khì-sak? Chio̍h-pôaⁿ kám ē sóa-khui goân ūi?
18:5 Pháiⁿ lâng ê kng si̍t-chāi ē hoa, i ê hóe-iām ē bô kng.
18:6 I pò͘-pêⁿ lāi ê kng ē piàn-chò o͘-àm, i téng-bīn ê teng mā ē hoa-.khì.
18:7 I giám-ngē ê kha-pō͘ ē tú tio̍h chó͘-gāi, i ê kè-bô͘ ē hō͘ i kakī poa̍h-tó.
18:8 In-ūi i ê kha hāi i kakī ji̍p-khì hām-kheⁿ, i kiâⁿ tī oa̍h-tauh ê téng-bīn.
18:9 Khoan-thò ē tîⁿ tio̍h i ê kha-āu-teⁿ, lô-bāng ē lia̍h tio̍h i.
18:10 Oa̍h-khàu ūi tio̍h i tâi tī thô͘-.ni̍h, pòaⁿ-soh ūi tio̍h i tiuⁿ tī lō͘-.ni̍h.
18:11 Sì-kho͘-ûi ū kiaⁿ-hiâⁿ, ē hō͘ i kiaⁿ, koh jiok i ê kha-āu-teⁿ.
18:12 I ê khùi-la̍t ē soe-bî, chai-eh tī i ê sin piⁿ sûi-sî piān-piān.
18:13 Chai-eh ē thun i ê phôe-bah; pháiⁿ chèng-thâu ē thun-chia̍h i ê ki-thé.
18:14 I ē tī só͘ óa-khò ê pò͘-pêⁿ siū poe̍h chhut-.lâi, ah-kàu thang kiaⁿ ê ông hia.
18:15 Bô sio̍k i ê ē tòa tī i ê pò͘-pêⁿ; ē ū liû-hông iā tī i só͘ tòa ê só͘-chāi.
18:16 Tī ē-té, i ê kin-thâu ē ta-.khì; tī téng-bīn, i ê ki ē siū chián-tû.
18:17 I ê kì-liām ē tī tē-chiūⁿ bia̍t-bông, i ê miâ-jī mā bô lâu tī ke-lō͘-.ni̍h.
18:18 I ē tùi kng-bêng tiong siū kóaⁿ khì-kàu o͘-àm; koh ē siū kóaⁿ-chhut sè-kài.
18:19 Tī i ê jîn-bîn tiong-kan ē bô kiáⁿ bô sun, tī i kià-kha ê só͘-chāi mā bô lâu chi̍t-ê lâng tī-.leh.
18:20 Ūi tio̍h i ê ji̍t-chí, āu-lâi ê lâng ē kiaⁿ kah gāng-.khì, chhin-chhiūⁿ chá-chêng ê lâng ê kiaⁿ-hiâⁿ.
18:21 Put-gī ê lâng ê chhù, si̍t-chāi sī ánne, che to̍h-sī m̄ bat Siōng-chú ê lâng ê só͘-chāi.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。