約伯記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
15:1 Tē-jī pái Tùi-ōe
Thê-man lâng E-lī-hoat ìn kóng:
15:2 Tì-hūi ê lâng kám ē ēng khang-hi ê tì-sek lâi ìn, á-.sī ēng tang-hong lâi chhiong-móa i ê pak-tó͘?
15:3 I kám ē ēng bô lī-ek ê ōe kah bô lō͘-ēng ê ōe lâi piān-lūn?
15:4 Lí si̍t-chāi hùi-tû kèng-ùi Siōng-tè, tī Siōng-tè ê bīn-chêng chó͘-tòng kèng-khiân ê sim.
15:5 In-ūi lí ê chōe-kò kà-sī lí ê chhùi, lí kéng kúi-chà ê lâng ê chi̍h.
15:6 Tēng lí ê chōe ê sī lí ê chhùi, m̄-sī góa; lí ê chhùi-tûn kiàn-chèng lí ê m̄ tio̍h.
15:7 Lí kám sī thâu chi̍t-ê chhut-sì ê lâng? Á-sī pí chiahê soaⁿ khah tāi-seng siū chō?
15:8 Siōng-tè pì-bi̍t ê chí-ì, lí kám bat thiaⁿ-.tio̍h? Tì-hūi kám sī lí chi̍t lâng to̍k tit?
15:9 Ū siáⁿ-mi̍h lí chai, goán m̄-chai? Á-sī lí bêng-pe̍k, goán bô bêng-pe̍k?
15:10 Goán tiong-kan ū thâu-mn̂g pe̍h ê kah nî lāu ê, pí lí ê lāu-pē koh khah lāu.
15:11 Siōng-tè ê an-ùi kah I un-hô khǹg lí ê ōe, lí kám khòaⁿ-chò sī sió-khóa?
15:12 Lí ê sim ná ē kā lí lia̍h-.khì? Lí ê ba̍k-chiu án-chóaⁿ teh gîn?
15:13 Chiah hō͘ lí ê sim-sîn hoán-tùi Siōng-tè, mā hō͘ lí ê chhùi kóng hiahê ōe.
15:14 Sè-kan lâng sī siáⁿ-mi̍h, kám ē sǹg-chò sī chheng-khì? Cha-bó͘ lâng só͘ seⁿ ê sī siáⁿ-mi̍h, kám ē sǹg-chò sī kong-gī?
15:15 Lí khòaⁿ, Siōng-tè bô sìn-jīm I hun-pia̍t chò sèng ê lâng; chiahê thiⁿ tī I bīn-chêng mā bô chheng-khì.
15:16 Hô-hòng khó-ò͘ⁿ hú-pāi ê lâng, lim chōe-ok kám ná chhin-chhiūⁿ teh lim chúi?
15:17 Góa beh chí-sī lí, lí tio̍h thiaⁿ góa; góa beh kóng-khí góa só͘ khòaⁿ-.tio̍h ê.
15:18 Chiū-sī tì-hūi ê lâng tùi chó͘-sian só͘ thoân lo̍h-.lâi, mā bô ún-ba̍t ê.
15:19 （Chit-ê tē to̍k-to̍k siúⁿ-sù hō͘ in, mā bô gōa-lâng tùi in tiong-kan keng-kòe. )
15:20 Pháiⁿ lâng it-seng ê ji̍t-chí sī thòng-khó͘, to̍h-sī ūi kiông-pō ê lâng só͘ tiāⁿ tio̍h ê nî-sò͘.
15:21 Thang kiaⁿ ê siaⁿ tiāⁿtiāⁿ tī i ê hīⁿ-khang; tī pêng-an ê sî, húi-bia̍t ê tāichì ē kàu i hia.
15:22 I m̄-sìn ē tùi o͘-àm tńg-.lâi; i hō͘ to-kiàm teh thèng-hāu i.
15:23 I sì-kè liû-lōng thó-chia̍h, kóng, Tó ūi ū thang chia̍h? I chai ū o͘-àm ê ji̍t-chí piān-piān teh thèng-hāu i.
15:24 Hoān-lān khùn-khó͘ hō͘ i kiaⁿ-hiâⁿ, koh iâⁿ-kòe i; chhin-chhiūⁿ kun-ông chún-pī chhut-tīn.
15:25 In-ūi i chhun chhiú kong-kek Siōng-tè, ēng kiau-ngō͘ kī-choa̍t Choân-lêng-.ê.
15:26 I ēng ngē ê ām-kún kah kāu ê tîn-pâi, cháu-lâi tí-te̍k Choân-lêng-.ê.
15:27 In-ūi i ê bīn chin pûi, i ê io pûi kah ū iû-lâ.
15:28 I tòa tī hong-hùi ê siâⁿ, bô lâng tòa ê chhù, to̍h-sī teh beh piàn-chò thô͘-tui ê só͘-chāi.
15:29 I bē tàng hó-gia̍h, i ê châi-bu̍t bē kú-tn̂g chûn-chāi; in ê lông-sán-bu̍t mā bē seⁿ-thòaⁿ tī tē-.ni̍h.
15:30 I bē thoat-lī o͘-àm; hóe-iām ē kā i ê ki sio-ta; i ē tùi Siōng-chú chhùi lāi ê khùi lâi sí-.khì.
15:31 I m̄ thang óa-khò hi-ké lâi khi-phiàn kakī, in-ūi hi-ké ē chiâⁿ-chò i ê pò-èng.
15:32 I ê ji̍t-kî bōe kàu ê chìn-chêng, chit-ê tāichì ē chiâⁿ; i ê ki bē chheⁿ-chhùi.
15:33 I ē chhin-chhiūⁿ phû-tô chhiū, i ê lia̍p iáu-bōe se̍k chiū lak lo̍h-.lâi, koh chhin-chhiūⁿ kaⁿ-ná chhiū lak i ê hoe.
15:34 Bô khiân-sêng ê lâng it-tēng bē seⁿ-thòaⁿ; o͘-se ê lâng ê pò͘-pêⁿ ē hō͘ hóe sio-.khì.
15:35 In hoâi-īn chân-hāi, seⁿ-chhut chōe-gia̍t, pak-tó͘ lāi só͘ chún-pī ê lóng sī kúi-chà.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。