約伯記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
11:1 Ná-má lâng Cho-hoah ìn kóng:
11:2 Ōe hiah chē, kám m̄ tio̍h ìn? Kāu-ōe ê lâng, kám thang kiò-chò gī?
11:3 Lí teh khoa-kháu, lâng kám tio̍h tiām-tiām? Lí teh thí-chhiò ê sî, kám bô lâng hō͘ lí kiàn-siàu?
11:4 Lí kóng, góa ê tō-lí sûn-choân, góa tī lí ê ba̍k-chiu chêng chheng-khì.
11:5 Chóng-.sī, goān Siōng-tè kóng-ōe, koh khui I ê chhùi kā lí piān-pok;
11:6 Chí-sī lí tì-hūi ê ò-pì, che tì-hūi ū ta̍k chióng ê kong-hāu; lí tio̍h chai Siōng-tè bô lóng ē kì-tit lí ê chōe-kò.
11:7 Lí kám ē-tàng chhek-to̍k Siōng-tè ê ò-pì? Lí kám ē-tàng thiat-té chhek-to̍k Choân-lêng-.ê?
11:8 I koân chhin-chhiūⁿ thiⁿ, lí iáu ē-tàng chò siáⁿ-mi̍h? I pí im-kan khah chhim, lí iáu ē-tàng chai siáⁿ-mi̍h?
11:9 I ê liōng sī pí tē khah tn̂g, pí hái khah khoah.
11:10 I nā keng-kòe, lâi koaiⁿ-kìm lâng, tiàu lâng sím-phòaⁿ, siáⁿ lâng ē-tàng kā I chó͘-tòng?
11:11 In-ūi I chai hi-ké ê lâng, sûi-jiân bô chù-ì, mā lóng khòaⁿ ē tio̍h chōe-kò.
11:12 Khang-hi ê lâng lóng bô sim-su, lâng chhut-sì chhin-chhiūⁿ iá-lî ê lî-á-kiáⁿ.
11:13 Lí nā toan-chiàⁿ lí ê sim, koh ǹg Siōng-tè gia̍h-khí lí ê chhiú;
11:14 lí ê chhiú lāi nā ū chōe-kò, chiū tio̍h kā i tû-khì hn̄g-hn̄g, mā m̄ thang iông-ín put-gī tiàm tī lí ê pò͘-pêⁿ lāi.
11:15 Hit sî, lí it-tēng gia̍h-khí lí bô khoat-tiám ê bīn; lí mā ē khiā chāi, lóng bô kiaⁿ-hiâⁿ.
11:16 In-ūi lí ē bē kì-tit lí ê kan-khó͘; chún kóng nā ē kì-tit, mā ná chhin-chhiūⁿ chúi-lâu kòe-.khì.
11:17 Lí ê seng-oa̍h khah iâⁿ ji̍t-tiong-tàu, sûi-jiân kàu àm sî, iû-goân chhin-chhiūⁿ chá-khí sî.
11:18 Lí ē an-ún, in-ūi iú-só͘ ǹg-bāng; lí beh sì-kè sûn-khòaⁿ, chiū thang an-sim khùn.
11:19 Lí tó-.leh, mā bô lâng ē kā lí phah tio̍h-kiaⁿ, koh ū chin chē lâng tùi lí kiû in.
11:20 Chóng-.sī, pháiⁿ lâng ê ba̍k-chiu ē hoe; in bô lō͘ thang tô-cháu, in só͘ ǹg-bāng ê chhin-chhiūⁿ khùi tn̄g.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。