約伯記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
9:1 Io-buh ìn kóng:
9:2 Góa chin-chiàⁿ chai-iáⁿ sī ánne; in-ūi lâng tī Siōng-tè ê bīn-chêng, ná ē sǹg-chò sī gī?
9:3 Nā beh kah I piān-lūn, chheng hāng mā bē ìn I chi̍t hāng.
9:4 I ê sim sī tì-hūi, I ê la̍t sī tōa; siáⁿ lâng ē-tàng tí-khòng I koh ē tit tio̍h an-jiân?
9:5 I î-sóa soaⁿ, soaⁿ mā m̄-chai; I siū-khì tiong, hō͘ soaⁿ pang lo̍h-.khì.
9:6 I hō͘ tē tín-tāng, lī-khui i ê pún ūi, tē ê thiāu chiū iô-tāng.
9:7 I bēng-lēng ji̍t-thâu, ji̍t-thâu chiū bô chhut-.lâi, koh kā chèng chheⁿ hong ba̍t.
9:8 I kakī thí-khui thiⁿ, koh tī hái-éng ê téng-bīn kiâⁿ-ta̍h.
9:9 I chhòng-chō Pak-táu-chheⁿ, Chham-chheⁿ, Báu-chheⁿ kah lâm-hong ê bi̍t-kiong.
9:10 I chò tāichì tōa kàu bē chhek-to̍k tit, kiâⁿ kî-sū sǹg bē liáu.
9:11 Lí khòaⁿ, I tùi góa chia keng-kòe, góa mā bô khòaⁿ-.tio̍h; I kiâⁿ kòe-.khì, góa mā m̄-chai.
9:12 Lí khòaⁿ, I chhiúⁿ-.khì, siáⁿ lâng ē-tàng chó͘-tòng I? Siáⁿ lâng káⁿ mn̄g I, Lí chò siáⁿ-mi̍h?
9:13 Siōng-tè it-tēng bē siu-hôe I ê siū-khì, hû-chō͘ La̍h-hap ê, khut-lo̍h tī I ê ē-bīn.
9:14 Hô-hòng góa ná káⁿ ìn I, á-.sī kéng siáⁿ-mi̍h ōe lâi kah I piān-lūn?
9:15 Góa sûi-jiân sī kong-gī, mā m̄-káⁿ ìn I, to̍k-to̍k tùi sím-phòaⁿ góa ê kiû in.
9:16 Góa nā kiû-kiò I, I nā ìn góa, góa mā m̄-sìn I ū thiaⁿ góa ê siaⁿ.
9:17 In-ūi I ēng tōa hong phah góa; bô-iân bô-kò͘ ke-thiⁿ góa ê siong.
9:18 I m̄ iông-ín góa chhoán chi̍t-ē khùi, to̍k-to̍k hō͘ góa chhiong-móa khó͘-lān.
9:19 Nā lūn kiông-béng, lí khòaⁿ, I ê la̍t tī chia; nā lūn sím-phòaⁿ, siáⁿ lâng ē kā góa tiāⁿ tio̍h ji̍t-kî?
9:20 Góa sûi-jiân chò gī, góa kakī ê chhùi ē tēng góa ê chōe; góa sûi-jiân oân-siān, i ē hián-bêng góa ê hêng-ge̍k.
9:21 Góa sī oân-siān ê lâng, góa bô kò͘ kakī; góa khòaⁿ-khin góa ê oa̍h-miā.
9:22 Lóng sī kāng-khoán, só͘-í, góa kóng, oân-siān ê kah kiâⁿ pháiⁿ ê, I lóng ē châu-bia̍t.
9:23 Chai-eh nā hut-jiân phah-sí-lâng, I chiū thí-chhiò bô chōe ê lâng tú tio̍h chhì-thàm.
9:24 Sè-kài kau-hù tī pháiⁿ lâng ê chhiú, I jia-khàm sím-phòaⁿ-koaⁿ ê bīn; nā m̄-sī I, sī siáⁿ lâng?
9:25 Góa ê ji̍t-chí pí cháu bûn-su ê khah kín, kín-kín kòe-.khì, bô khòaⁿ tio̍h siáⁿ-mi̍h hok-khì.
9:26 Kín-kín kòe-khì chhin-chhiūⁿ khoài-chûn, koh chhin-chhiūⁿ eng kóaⁿ-kín poe lo̍h-khì la̍k mi̍h.
9:27 Góa nā kóng beh bē kì-tit góa ê ai-oàn, beh kái góa ê iu-iông chiâⁿ-chò hoaⁿ-hí;
9:28 Góa chiū kiaⁿ góa chiahê iu-khó͘, in-ūi góa chai Siōng-tè it-tēng bô lia̍h góa chò bô chōe.
9:29 Góa ē siū tēng chōe, góa ná ē khang-khang lô-khó͘?
9:30 Góa nā ēng seh ê chúi kakī sé, ēng kiⁿ-chúi chheng-khì góa ê chhiú,
9:31 Siōng-tè ē kā góa hiat lo̍h-khì kau té, góa ê saⁿ mā ē thó-ià góa.
9:32 In-ūi Siōng-tè m̄-sī sè-kan lâng chhin-chhiūⁿ góa, hō͘ góa thang ìn I, mā hō͘ goán thang tùi-ōe.
9:33 Goán tiong-kan bô ū phòaⁿ-toàn ê lâng, thang hō͘ goán siang-hong pí-chhú khut-ho̍k.
9:34 Goān Siōng-tè sóa I ê koái-á lī-khui góa, bô ēng I ê ui-giâm hō͘ góa kiaⁿ.
9:35 Góa chiū káⁿ kóng, mā bô kiaⁿ I, chóng-.sī, góa goân-pún m̄-sī hit khoán lâng.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。