約伯記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
6:1 Io-buh ìn kóng:
6:2 Goān góa ê iu-būn keng-kòe chhìn-tāng, goān góa só͘-ū ê chai-hāi pêⁿ-pêⁿ hē tī thian-phêng;
6:3 Tek-khak pí hái soa khah tāng, só͘-í, góa ê ōe loān-loān kóng.
6:4 In-ūi Choân-lêng-.ê ê chìⁿ siā tio̍h góa; góa ê sim-sîn lim tio̍h i ê to̍k. Siōng-tè hō͘ góa kiaⁿ ê tāichì pâi tīn lâi kong-kek góa.
6:5 Iá-lî ū chháu, kám ē chhut siaⁿ? Gû ū chháu-liāu, kám ē háu?
6:6 Mi̍h chiáⁿ bô chham iâm, kám ē chia̍h-tit? Nn̄g-chheng kám ū chu-bī?
6:7 Góa ê sim ià-siān, bô ài kha̍p tio̍h mi̍h-kiāⁿ, in chò góa pháiⁿ bī-sò͘ ê chia̍h-mi̍h.
6:8 Goān góa tit tio̍h góa só͘ kiû ê; góa só͘ him-bō͘ ê, goān Siōng-tè siúⁿ-sù hō͘ góa.
6:9 Chiū-sī goān Siōng-tè kā góa teh chhùi, pàng I ê chhiú lâi choa̍t góa ê sèⁿ-miā.
6:10 Nā ánne, góa chiū tit tio̍h an-ùi; tī thòng-khó͘ bô tit tio̍h liân-bín ê tiong-kan, iáu ē khoài-lo̍k; in-ūi góa bô ûi-pōe chì-sèng Siōng-tè ê ōe.
6:11 Góa ū siáⁿ-mi̍h khùi-la̍t, hō͘ góa iáu teh ǹg-bāng? Góa ū siáⁿ-mi̍h kiat-kio̍k, hō͘ góa iáu thang jím-nāi?
6:12 Góa ê la̍t kám sī chio̍h-thâu ê la̍t? Góa ê bah kám sī tâng ê bah?
6:13 Pang-chō͘ góa ê lâng kám m̄-sī lóng sí-.khì à? Góa ê tì-hūi kám m̄-sī lī-khui góa khì à?
6:14 Choa̍t-bāng ê lâng nā bô kèng-ùi choân-lêng ê Chú, i ê pêng-iú mā tio̍h ēng jîn-chû kā i khoán-thāi.
6:15 Góa ê hiaⁿ-tī gō͘ góa, chhin-chhiūⁿ khe, koh chhin-chhiūⁿ khe chúi lâu-kòe ê khe té;
6:16 In-ūi ū peng-tè chiū lô, ū seh khǹg tī hit lāi-bīn;
6:17 sio-lō ê sî-chūn, in chiū siau-bia̍t; joa̍h ê sî, chiū tùi in ê só͘-chāi ta-.khì.
6:18 Iân khe kui tīn teh kiâⁿ ê lâng oan-lâi oat-khì, in chiūⁿ-kàu pha-hng ê só͘-chāi chiū sí-.khì.
6:19 Thê-má kui tīn kiâⁿ ê lâng teh liâu-bāng, Sí-bah kui kûn ê lâng teh thèng-hāu.
6:20 In ūi tio̍h só͘ ǹg-bāng ê lâi kiàn-siàu, chi̍t-ē kàu-ūi chiū làu-khùi.
6:21 Taⁿ lín chin-chiàⁿ bô mi̍h, khòaⁿ-kìⁿ thang kiaⁿ ê tāichì chiū lún.
6:22 Góa kám bat kóng, chhiáⁿ lín hō͘ góa? Á-sī kiò lín tùi lín ê châi-sán the̍h-lâi sàng góa mi̍h-kiāⁿ?
6:23 Á-sī kiû lín kiù góa thoat-lī tùi-te̍k ê chhiú? Á-sī sio̍k góa thoat-lī kiông-pō ê lâng ê chhiú?
6:24 Chhiáⁿ lín kà-sī góa, góa chiū tiām-tiām, mā hō͘ góa bêng-pe̍k tī siáⁿ-mi̍h tāichì ū chhò-gō͘.
6:25 Chèng-ti̍t ê ōe, i ê la̍t tōa kàu án-chóaⁿ! Chóng-.sī, lín teh piān-pok, sī teh piān-pok siáⁿ-mi̍h?
6:26 Lín kám kóng siūⁿ beh piān-pok lâng ê ōe? Choa̍t-bāng ê lâng ê giân-lūn sī chhin-chhiūⁿ hong.
6:27 Lín liam-khau ài beh tit tio̍h ko͘-jî, kā lí ê pêng-iú tòng-chò bé-bē ê mi̍h.
6:28 Taⁿ chhiáⁿ lín kam-goān lâi khòaⁿ góa, góa choa̍t-tùi bô tng lín ê bīn kóng pe̍h-chha̍t.
6:29 Chhiáⁿ lín oa̍t tńg-.lâi, m̄ thang ū put-gī; koh oa̍t tò tńg-.lâi, góa ê kong-gī iáu koh tī-.leh.
6:30 Góa ê chi̍h kám ū put-gī? Góa ê chhùi kám bē hun-pia̍t chai-hāi?
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。