約伯記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
3:1 Io-buh Chiù-chó͘ Ka-kī
Āu-lâi, Io-buh khui chhùi, chiù-chó͘ i kakī ê ji̍t-chí.
3:2 Io-buh khui chhùi kóng:
3:3 Góa chhut-sì ê ji̍t, goān hit-ê ji̍t bô-.khì; kóng ū hoâi-īn chapo͘ kiáⁿ hit mê, goān hit-ê mê mā bô-.khì.
3:4 Goān hit-ê ji̍t piàn-chò o͘-àm; goān Siōng-tè bô tùi téng-bīn khòaⁿ-kò͘ i, kng mā bô chiò i.
3:5 Goān o͘-àm kah sí-ìm chhim-ji̍p kā i cheng-ho̍k; goān ba̍t hûn thêng tī i ê téng-bīn, goān hō͘ ji̍t piàn o͘-àm ê kā i phah-kiaⁿ.
3:6 Kóng-kàu hit mê, goān o͘-àm kā i chhiúⁿ-.khì; goān i bô kah nî tiong hiahê ji̍t tâng hoaⁿ-hí, mā bô ji̍p tī hiahê goe̍h ê sò͘-gia̍h.
3:7 Ai-ah! Goān hit mê bô ū seⁿ kiáⁿ; in tiong-kan bô hoaⁿ-hí ê siaⁿ.
3:8 Goān hiahê chiù-chó͘ ji̍t-.sî ê kā i chiù-chó͘, í-ki̍p hiahê ē kek-tōng hái-koài ê kā i chiù-chó͘.
3:9 Goān hit mê thiⁿ-phú-kng ê chheⁿ piàn o͘-àm; goān i ǹg-bāng thiⁿ-kng mā bē tàng, mā bô khòaⁿ tio̍h chá-khí sî ê thiⁿ-phú-kng;
3:10 in-ūi bô koaiⁿ-ba̍t seⁿ góa ê chú-kiong, mā bô tùi góa ê ba̍k-chiu jia-khàm hoān-lān.
3:11 Góa ná ē bô tī thai-.ni̍h to̍h sí-.khì? Án-chóaⁿ chhut pak-tó͘ ê sî bô sòa tn̄g-khùi?
3:12 Ná ē ū lāu-bú ê kha-thâu-u chiap-la̍p góa? Án-chóaⁿ ū leng hō͘ góa suh?
3:13 Nā bô ánne, góa í-keng chin an-jiân tó-.leh, í-keng tiām-chēng teh khùn;
3:14 kah tē-chiūⁿ lia̍t ông ê bô͘-sū tông-chāi, in bat ūi kakī tī pha-hng ê só͘-chāi khí-chō;
3:15 á-.sī kah ū kim ê siú-léng tông-chāi, in bat ēng gîn chhiong-móa in ê chhù.
3:16 Á-sī chhin-chhiūⁿ làu-the siū bâi-chòng, góa chiū sí sit-khì; chhin-chhiūⁿ iáu-bōe kìⁿ tio̍h kng ê eⁿ-á.
3:17 Tī hia pháiⁿ lâng bô koh-chài kiáu-jiáu; tī hia ià-siān ê tit tio̍h an-hioh.
3:18 Tī hia siū lia̍h ê lâng chò-hóe tit tio̍h an-jiân, bô thiaⁿ tio̍h tok-kang ê siaⁿ.
3:19 Sī-sè sī-tōa lóng tī hia; lô͘-po̍k thoat-lī i ê chú-lâng.
3:20 Siū khó͘-lân ê lâng ná ē hō͘ i ū kng? Sim lāi iu-khó͘ ê lâng án-chóaⁿ hō͘ i ū oa̍h-miā?
3:21 In ǹg-bāng sí mā bē tàng sí; chhōe sí pí ku̍t ún-ba̍t ê pó-pòe khah chhut-la̍t.
3:22 In chhōe tio̍h hûn-bōng chiū khoài-lo̍k, hoaⁿ-hí kàu bē kò͘-tit.
3:23 Lâng ê chiân-tô͘ í-keng àm bong-bong, Siōng-tè sì-bīn ûi-khùn i, án-chóaⁿ hō͘ i ū kng?
3:24 In-ūi góa ēng thó͘-khùi tāi-thè chia̍h-mi̍h; góa tōa-siaⁿ háu, chhin-chhiūⁿ tōa-chúi chhèng chhut-.lâi.
3:25 In-ūi góa só͘ chin kiaⁿ ê tāichì lîm-kàu góa, góa só͘ kiaⁿ-hiâⁿ ê kàu tī góa.
3:26 Góa bē tàng an-jiân, bē tàng pêng-chēng, bē tàng an-hioh, chóng-.sī, ū hoān-lān lâi.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。