以斯帖記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
9:1 Iô-tah Lâng Siau-bia̍t Siû-te̍k
Cha̍p-jī-.goe̍h, to̍h-sī A-ta̍t goe̍h ê cha̍p-saⁿ, ông ê bēng-lēng kah jū-chí teh beh kí-hêng, to̍h-sī Iô-tah lâng ê tùi-te̍k ǹg-bāng tit tio̍h kā in koán-hat ê ji̍t, chóng-.sī, tāichì tùi-hoán, tian-tò hō͘ Iô-tah lâng koán-hat só͘-ū oàn-hūn in ê lâng.
9:2 Hit ji̍t, tī A-ha-sui-ló͘ ông ê ta̍k séng, Iô-tah lâng lóng chū-chi̍p tī in ê siâⁿ, hē chhiú kong-kek hiahê beh hāi in ê lâng, bô lâng ē-tàng tí-tòng in, in-ūi chèng lâng lóng kiaⁿ in.
9:3 Ta̍k séng ê siú-léng, tāi-sîn, chóng-tok kah pān-lí ông ê tāichì ê lâng, lóng lâi pang-chān Iô-tah lâng, in-ūi in kiaⁿ Mol-té-kái.
9:4 In-ūi Mol-té-kái tī tiâu-têng chun-tōa, miâ-siaⁿ piàn thoân ta̍k séng, chit-ê Mol-té-kái ná seng ná tōa.
9:5 Iô-tah lâng ēng to thâi só͘-ū ê tùi-te̍k, kā in thâi-sí, kā in châu-bia̍t, sûi kakī ê ì-sù khì tùi-hù tī oàn-hūn in ê lâng.
9:6 Tī Su-san siâⁿ, Iô-tah lâng kā in siau-bia̍t gō͘ pah lâng;
9:7 koh thâi-sí Phal-siang-ta-thah, Tal-hóng, A-su-pha-thah,
9:8 Pho-la-thah, A-ta-liah, A-li-ta-tha,
9:9 Phal-ma-si-thah, A-li-sài, A-li-tāi, Ba-e-cha-thah.
9:10 Chit cha̍p-ê lâng lóng sī Ha-me-tá-tha ê sun, Iô-tah lâng ê tùi-te̍k Ha-mán ê kiáⁿ. Chóng-.sī, bô chhiúⁿ in ê châi-bu̍t.
9:11 Tng hit ji̍t, kā Su-san siâⁿ siū thâi ê jîn-sò͘ thêng-pò tī ông ê bīn-chêng.
9:12 Ông kā ông-hō͘ Ê-su-tel kóng, " Iô-tah lâng tī Su-san siâⁿ thâi-sí tùi-te̍k gō͘ pah lâng, koh thâi-sí Ha-mán cha̍p-ê kiáⁿ. Tī ông kî-tha ê ta̍k séng m̄-chai piàn-chò án-chóaⁿ? Taⁿ lí só͘ chhéng ê sī siáⁿ-mi̍h? Góa beh hō͘ lí; lí só͘ kiû sī siáⁿ-mi̍h? Góa mā beh hō͘ i chiâⁿ. "
9:13 Ê-su-tel chiū kóng, " Ông nā lia̍h-chò sī hó, kiû lí chún Su-san ê Iô-tah lâng, bîn-á-chài mā chiàu kin-á-ji̍t ê jū-chí lâi kiâⁿ, mā kā Ha-mán cha̍p-ê kiáⁿ tiàu tī chhâ-kè téng. "
9:14 Ông chiū bēng-lēng chiàu ánne khì chò. Hitê jū-chí thoân tī Su-san, lâng chiū kā Ha-mán cha̍p-ê kiáⁿ tiàu khí-.lâi.
9:15 A-ta̍t goe̍h cha̍p-sì, Su-san ê Iô-tah lâng koh chū-chi̍p tī Su-san, thâi-sí saⁿ pah lâng, chóng-.sī, bô chhiúⁿ in ê châi-bu̍t.
9:16 Tī ông ta̍k séng kî-î ê Iô-tah lâng mā lóng chū-chi̍p, khí-lâi pó-hō͘ kakī ê sèⁿ-miā, thoat-lī tùi-te̍k, hióng-siū pêng-an, thâi-sí oàn-hūn in ê lâng chhit-bān gō͘-chheng, chóng-.sī, bô chhiúⁿ in ê châi-bu̍t.
9:17 A-ta̍t goe̍h cha̍p-saⁿ kiâⁿ chit-ê tāichì, cha̍p-sì an-hioh, ēng chit ji̍t siat iàn-se̍k chò hoaⁿ-hí ê ji̍t.
9:18 Chóng-.sī, Su-san ê Iô-tah lâng tī cha̍p-saⁿ, cha̍p-sì chū-chi̍p, cha̍p-gō͘ an-hioh, kā chit ji̍t tòng-chò siat iàn-se̍k lâi hoaⁿ-hí ê ji̍t.
9:19 Só͘-í, tòa tī chng-thâu ê Iô-tah lâng, tòa tī bô siâⁿ chhiûⁿ ê po͘-thâu, taⁿ lóng kā A-ta̍t goe̍h cha̍p-sì tòng-chò siat iàn-se̍k lâi hoaⁿ-hí ê ji̍t, lia̍h-chò sī hó ê ji̍t, ēng lé-mi̍h lâi sio-sàng.
9:20 Phul Ji̍t ê Iân-khí
Mol-té-kái kì-chài hiahê tāichì, koh siá phoe hō͘ A-ha-sui-ló͘ ông ta̍k séng hn̄g-kīn só͘-ū ê Iô-tah lâng,
9:21 tiāⁿ tio̍h in ta̍k nî tio̍h siú A-ta̍t goe̍h cha̍p-sì, cha̍p-gō͘ chò cheh,
9:22 Chit nn̄g ji̍t sī Iô-tah lâng thoat-lī tùi-te̍k tit tio̍h pêng-an ê ji̍t, hit goe̍h sī iu-būn piàn-chò hoaⁿ-hí ê goe̍h-hūn, pi-ai piàn-chò hó ê ji̍t, mā tio̍h siú chit nn̄g ji̍t siat iàn-se̍k lâi hoaⁿ-hí, tāi-ke ēng lé-mi̍h sio-sàng, chín-chè sànchhiah lâng ê ji̍t.
9:23 Chiū ánne, Iô-tah lâng chiàu Mol-té-kái só͘ siá hō͘ in ê phoe, tap-èng beh chiàu in khí-thâu só͘ kiâⁿ ê lâi siú cheh.
9:24 In-ūi Iô-tah lâng ê tùi-te̍k — A-gak cho̍k Ha-me-tá-tha ê kiáⁿ Ha-mán, i siat kè-bô͘ beh kong-kek Iô-tah lâng lâi kā in châu-bia̍t, poa̍h Phul, to̍h-sī thiu-chhiam, ūi tio̍h beh pāi-hoāi in, kā in châu-bia̍t;
9:25 chóng-.sī, chit-ê tāichì lâi-kàu ông ê bīn-chêng, ông chiū kàng jū-chí hō͘ Ha-mán kè-bô͘ hāi Iô-tah lâng ê pháiⁿ kè-bô͘ kui tī i kakī ê thâu-khak, koh kā i kah i ê kiáⁿ tiàu tī chhâ-kè téng.
9:26 Chiū ánne, in chiū chiàu Phul ê miâ kiò hiahê ji̍t chò Phul ji̍t. In in-ūi chit tiuⁿ phoe só͘-ū ê ōe, í-ki̍p in tī chit-ê tāichì só͘ chhin-ba̍k khòaⁿ tio̍h kah chhin-sin tú-.tio̍h ê tāichì,
9:27 Iô-tah lâng chiū koat-ì sêng-jīn in kah in ê kiáⁿ-sun, í-ki̍p kiàn-nā kui-óa in ê lâng, nî-nî beh chiàu só͘ kì-chài ê, tī só͘ tiāⁿ tio̍h ê kî, siú chit nn̄g ji̍t chò cheh, hō͘ i bô hùi-tû.
9:28 Koh beh kì-liām lâi siú hiahê ji̍t, tī ta̍k tāi, ta̍k ke, ta̍k séng, ta̍k siâⁿ, hō͘ Phul ê ji̍t tī Iô-tah lâng ê tiong-kan bô hùi-tû, tī in ê kiáⁿ-sun tiong-kan kì-liām bô soah.
9:29 Hit sî, A-mí-hail ê chabó͘ kiáⁿ — ông-hō͘ Ê-su-tel kah Iô-tah lâng Mol-té-kái, ēng choân koân lâi siá kian-kò͘ Phul ê tē-jī tiuⁿ phoe,
9:30 koh ēng hô-pêng sêng-si̍t ê ōe, siá phoe hō͘ A-ha-sui-ló͘ ông kok lāi chi̍t-pah jī-cha̍p chhit séng lāi só͘-ū ê Iô-tah lâng,
9:31 tio̍h kian-kò͘ chit-ê Phul ê ji̍t tī in só͘ tiāⁿ tio̍h ê kî, chiàu Iô-tah lâng Mol-té-kái kah ông-hō͘ Ê-su-tel só͘ bēng-lēng in ê, mā chiàu Iô-tah lâng ūi kakī kah in ê kiáⁿ-sun só͘ tiāⁿ tio̍h ê lē, kìm-chia̍h thî-khàu.
9:32 Ê-su-tel ê chiàu-bēng kian-kò͘ Phul ê tāichì, mā ū kì tī chheh-.ni̍h.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。