以斯帖記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
8:1 Iô-tah Lâng ê Hoán-kek
Tng hit ji̍t, A-ha-sui-ló͘ ông kā Iô-tah lâng ê tùi-te̍k Ha-mán ê ka-sán siúⁿ-sù hō͘ ông-hō͘ Ê-su-tel. Mol-té-kái mā lâi ông ê bīn-chêng, in-ūi Ê-su-tel í-keng kā ông kóng, Mol-té-kái sī i ê chhin-lâng.
8:2 Ông pak kakī ê chhiú-chí lâi hō͘ Mol-té-kái, to̍h-sī tùi Ha-mán the̍h tò tńg-.lâi ê. Ê-su-tel koh siat-li̍p Mol-té-kái lâi koán-lí Ha-mán ê ka-sán.
8:3 Ê-su-tel koh tī ông ê bīn-chêng, phak tī i ê kha chêng, lâu ba̍k-sái kóng, kiû ông tû-khì A-gak cho̍k Ha-mán ê hām-hāi kah i beh bô͘-hāi Iô-tah lâng ê kè-bô͘.
8:4 Ông ǹg Ê-su-tel gia̍h-khí i kim ê koái-á, Ê-su-tel chiū khiā khí-.lâi tī ông ê bīn-chêng, kóng,
8:5 " Ông nā lia̍h-chò sī hó, góa nā tī ông ê ba̍k-chiu chêng tit tio̍h un-tián, ông lia̍h chit-ê tāichì chò tio̍h, góa nā tī ông ê ba̍k-chiu chêng tit tio̍h hoaⁿ-hí, chiū khún-kiû chhut chiàu, chhú-siau A-gak cho̍k Ha-me-tá-tha ê kiáⁿ Ha-mán só͘ kè-bô͘ ê chiàu, to̍h-sī i só͘ siá beh bia̍t ông ta̍k séng ê Iô-tah lâng ê chiàu.
8:6 In-ūi góa ná ē jím-tit khòaⁿ tio̍h kakī ê tông-pau siū hām-hāi? Ná ē jím-tit khòaⁿ kakī ê chong-cho̍k siū châu-bia̍t? "
8:7 A-ha-sui-ló͘ ông chiū kā ông-hō͘ Ê-su-tel kah Iô-tah lâng Mol-té-kái kóng, " In-ūi Ha-mán beh bô͘-hāi Iô-tah lâng, góa í-keng kā i ê ka-sán hō͘ Ê-su-tel, lâng mā kā Ha-mán tiàu tī chhâ-kè téng.
8:8 Lín mā thang ēng ông ê miâ chiàu lín ê ì-sù, siá jū-chí hō͘ Iô-tah lâng, ēng ông ê chhiú-chí khàm ìn. In-ūi kiàn-nā ēng ông ê miâ lâi siá ê, ēng ông ê chhiú-chí khàm ìn ê chiàu, bô lâng ē kā i chhú-siau. "
8:9 Tē-saⁿ goe̍h, to̍h-sī Si-oan goe̍h ê jī-cha̍p saⁿ, hit sî, ông tiàu i ê su-kì lâi, chiàu Mol-té-kái it-chhè só͘ bēng-lēng ê, chhut chiàu hō͘ Iô-tah lâng, mā kàu tī jîn-sîn kah ta̍k séng ê chóng-tok, siú-léng, to̍h-sī tùi Ìn-tō͘ kàu Kú-si̍t, kiōng chi̍t-pah jī-cha̍p chhit séng, kàu tī ta̍k séng chiàu in ê bûn-jī, kàu ta̍k cho̍k ê jîn-bîn chiàu in ê khiuⁿ-kháu, kàu Iô-tah lâng chiàu in ê bûn-jī, chiàu in ê khiuⁿ-kháu.
8:10 Mol-té-kái ēng A-ha-sui-ló͘ ông ê miâ siá jū-chí, ēng ông ê chhiú-chí khàm ìn, kā hit-ê chiàu kau tī khiâ bé ê cháu bûn-su ê, in khiâ ông ê bé tiâu só͘ seⁿ ê kok lāi kong-sū ēng ê hó bé, lâi thoân jū-chí.
8:11 Tī jū-chí ê lāi-bīn, ông chún tī ta̍k-ê siâⁿ ê Iô-tah lâng chū-chi̍p, khí-lâi pó-hō͘ kakī ê sèⁿ-miā, kiàn-nā ta̍k séng ê peng kah jîn-bîn beh kā in kong-kek, in lóng thang kā in châu-bia̍t, kā in thâi-sí, hō͘ in kah in ê gín'á, chabó͘ lâng sí-bông, chhiúⁿ in ê châi-bu̍t chò chiàn-lī-phín.
8:12 Tī A-ha-sui-ló͘ ông ê ta̍k séng, tī cha̍p-jī goe̍h, to̍h-sī A-ta̍t goe̍h cha̍p-saⁿ, hit chi̍t ji̍t ê lāi-bīn thang ánne chò.
8:13 Chhau-siá hit-ê jū-chí pan-hêng ta̍k séng, pò-kò ta̍k cho̍k, hō͘ Iô-tah lâng chún-pī thèng-hāu hit ji̍t, tùi i ê tùi-te̍k lâi pò-siû.
8:14 Hiahê cháu bûn-su ê hōng ông ê bēng-lēng chin pek-chhiat, khiâ kok lāi kong-sū só͘ ēng ê khoài bé, kóaⁿ-kín chhut-hoat, chit-ê chiàu mā pan-hêng tī Su-san kiong.
8:15 Mol-té-kái chhēng nâ-sek pe̍h-sek ê tiâu-ho̍k, tì tōa téng ê kim bián-liû, koh chhēng chí-sek iù-tē pò͘ ê gōa-ho̍k, tùi ông ê bīn-chêng chhut-.lâi.
8:16 Su-san siâⁿ ê jîn-bîn lóng chhut hoaⁿ-hí khoài-lo̍k ê siaⁿ. Iô-tah lâng ū êng-kng, hoaⁿ-hí, khoài-lo̍k, chun-kùi.
8:17 Ông ê jū-chí só͘ kàu ê ta̍k séng ta̍k siâⁿ, Iô-tah lâng lóng hoaⁿ-hí khoài-lo̍k, siat iàn-se̍k, lia̍h hit ji̍t chò hó ji̍t. Hit só͘-chāi ê jîn-bîn in-ūi kiaⁿ Iô-tah lâng, chin chē lâng ji̍p Iô-tah chek.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。