以斯帖記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
6:1 Ông Sù Mol-té-kái Êng-iāu
Hit mê, ông bē khùn-.tit, kiò lâng the̍h le̍k-sú ê chheh lâi, in chiū tī ông ê bīn-chêng tha̍k chheh.
6:2 Tú tio̍h chheh-.ni̍h ū ánne siá, " Ông kò͘-mn̂g ê thài-kàm tiong-kan ū nn̄g lâng, Bik-thàn kah The-le-sih, kè-bô͘ beh hāi A-ha-sui-ló͘ ông, Mol-té-kái pò-kò chit-ê tāichì.
6:3 Ông kóng, " Ūi tio̍h chit-ê tāichì, tio̍h ēng siáⁿ-mi̍h êng-kng kah chun-kùi siúⁿ-sù hō͘ Mol-té-kái? " Sū-hāu ông ê jîn-sîn ìn kóng, " Bián siúⁿ-sù i siáⁿ-mi̍h. "
6:4 Ông kóng, " Siáⁿ lâng tī īⁿ lāi? " Hit sî, Ha-mán ji̍p-lâi ông-kiong ê gōa-īⁿ, beh kiû ông kā Mol-té-kái tiàu tī i só͘ khiā ê chhâ-kè.
6:5 Ông ê jîn-sîn kā i kóng, " Ha-mán khiā tī īⁿ lāi. " Ông kóng, " Kiò i ji̍p-.lâi. "
6:6 Ha-mán chiū ji̍p-.khì. Ông mn̄g i kóng, " Ông só͘ ài kā i êng-kng ê lâng, tio̍h án-chóaⁿ kā i khoán-thāi? " Ha-mán sim-lāi siūⁿ kóng, ông só͘ ài kā i êng-kng ê lâng, siáⁿ lâng ē iâⁿ-kòe góa?
6:7 Ha-mán chiū ìn ông kóng, " Ông só͘ ài kā i êng-kng ê lâng,
6:8 tio̍h kā ông só͘ chhēng ê ông-ho̍k, ông só͘ khiâ ê bé, thâu-khak téng só͘ tì ê bián-liû,
6:9 tio̍h kā chiahê saⁿ-khò͘ kah bé kau tī ông chi̍t-ê ke̍k chun-kùi ê jîn-sîn ê chhiú, hō͘ i ēng hit niá saⁿ hō͘ ông só͘ ài kā i êng-kng ê lâng chhēng, koh hō͘ i khiâ bé piàn-iû siâⁿ lāi ê ke-lō͘, tī i ê thâu-chêng soan-pò͘ kóng, ông só͘ ài kā i êng-kng ê lâng, beh ánne kā i khoán-thāi. "
6:10 Ông kā Ha-mán kóng, " Lí kóaⁿ-kín khì, kā chiahê saⁿ-khò͘ kah bé, chiàu lí só͘ kóng ê, khì khoán-thāi chē tī ông-kiong ê mn̂g-kháu hit-ê Iô-tah lâng Mol-té-kái. Kiàn-nā lí só͘ kóng ê m̄ thang kiám chi̍t hāng. "
6:11 Ha-mán chiū tòa saⁿ-khò͘ kah bé lâi, hō͘ Mol-té-kái chhēng, koh hō͘ i khiâ bé, piàn-iû tī siâⁿ lāi ê ke-lō͘, tī i ê thâu-chêng soan-pò͘ kóng, " Ông só͘ ài kā i êng-kng ê lâng, beh ánne kā i khoán-thāi. "
6:12 Mol-té-kái tńg-lâi ông-kiong ê mn̂g. Ha-mán iu-būn, kā i ê thâu-khak tà-.leh, kóaⁿ-kín tò tńg-khì in chhù.
6:13 Ha-mán kā i it-chhè só͘ tú-.tio̍h ê lóng kā i ê bó͘ Che-le-sih kah i hiahê pêng-iú kóng. I hiahê tì-sek ê lâng kah i ê bó͘ Che-le-sih kā i kóng, " Lí só͘ khí-thâu tī i bīn-chêng sit-pāi ê Mol-té-kái, i nā kó-jiân sī Iô-tah ê chéng-cho̍k, lí it-tēng bē iâⁿ i, lí ē tī i ê bīn-chêng sit-pāi kàu-té. "
6:14 In iáu teh kah i kóng-ōe ê sî, ông ê thài-kàm lâi, kiò Ha-mán kóaⁿ-kín khì hù Ê-su-tel só͘ siat ê iàn-se̍k.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。