以斯帖記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
3:1 Ha-mán Tô͘-bô͘ Bia̍t Iô-tah Lâng
Chiahê tāichì í-āu, A-ha-sui-ló͘ ông kí-khí A-gak cho̍k Ha-me-tá-tha ê kiáⁿ Ha-mán, kā i ko-seng, hō͘ i ê ūi pí só͘-ū tông-liâu ê jîn-sîn khah koân.
3:2 Ông ê jîn-sîn tiàm tī ông-kiong mn̂g lāi ê lâng lóng kūi-.leh pài Ha-mán, in-ūi ông mā bat bēng-lēng tio̍h ánne kā i khoán-thāi; to̍k-to̍k Mol-té-kái m̄-kūi, m̄-pài.
3:3 Hit sî, tiàm tī ông-kiong mn̂g lāi ê ông ê jîn-sîn kā Mol-té-kái kóng, " Lí ná ē ûi-pōe ông ê bēng-lēng? "
3:4 In ta̍k ji̍t ánne kā i kóng, i mā m̄-thiaⁿ ōe, in chiū kā Ha-mán kóng, beh khòaⁿ Mol-té-kái ê tāichì khiā ē tiâu á-bē, in-ūi Mol-té-kái ū kā in kóng i sī Iô-tah lâng.
3:5 Ha-mán khòaⁿ tio̍h Mol-té-kái m̄-kūi, m̄ kā i pài, Ha-mán chiū móa-pak siū-khì.
3:6 In í-keng ēng Mol-té-kái ê pún cho̍k kā Ha-mán kóng; Ha-mán lia̍h-chò hē chhiú hāi Mol-té-kái chi̍t-ê lâng sī sió-khóa tāichì, chiū kè-bô͘ beh bia̍t A-ha-sui-ló͘ choân kok ê Iô-tah lâng, to̍h-sī Mol-té-kái ê pún cho̍k.
3:7 Tng A-ha-sui-ló͘ ông tē-cha̍p-jī nî chiaⁿ-.goe̍h, to̍h-sī Ni-san goe̍h, lâng tī Ha-mán ê bīn-chêng, kā hiahê ji̍t-ji̍t goe̍h-goe̍h lâi poa̍h Phul, to̍h-sī thiu-chhiam, poa̍h tio̍h cha̍p-jī goe̍h, to̍h-sī A-ta̍t goe̍h.
3:8 Ha-mán tùi A-ha-sui-ló͘ ông kóng, " Ū chi̍t cho̍k ê jîn-bîn, sòaⁿ-khui tī lí ê kok ta̍k séng ê jîn-bîn tiong-kan, in ê lu̍t-lē kah bān-bîn ê lu̍t-lē khah bô kāng, in mā bô siú ông ê lu̍t-lē, só͘-í, nā iông-ín in, tùi ông si̍t-chāi put-lī.
3:9 Ông nā lia̍h-chò sī hó, tio̍h chhut bēng-lēng lâi kā in siau-bia̍t; góa chiū ēng gîn chi̍t-bān tha-lan-t kau tī koán-lí chit-ê tāichì ê lâng ê chhiú, thang siu ji̍p-khì ông ê khò͘-pâng. "
3:10 Ông chiū pak i kakī ê chhiú-chí hō͘ Iô-tah lâng ê tùi-te̍k, to̍h-sī A-gak cho̍k Ha-me-tá-tha ê kiáⁿ Ha-mán.
3:11 Ông kā Ha-mán kóng, " Chit-ê gîn hō͘ lí, hit-ê jîn-bîn mā hō͘ lí, chiàu lí só͘ khòaⁿ-chò sī hó ê kā in chhú-tì.
3:12 Chiaⁿ-goe̍h cha̍p-saⁿ, Ha-mán chiū tiàu ông ê su-kì lâi, chiàu Ha-mán it-chhè só͘ bēng-lēng ê hêng-bûn hō͘ ông ê jîn-sîn kah ta̍k séng ê chóng-tok, í-ki̍p jîn-bîn ê siú-léng, kàu ta̍k séng chiàu in ê bûn-jī, kàu jîn-bîn chiàu in ê khiuⁿ-kháu, ēng A-ha-sui-ló͘ ông ê miâ siá chiàu-bûn, koh ēng ông ê chhiú-chí khàm ìn.
3:13 Hitê chiàu-bûn sī tùi ông ê cháu bûn-su ê thoân kàu ông ê ta̍k séng, bēng-lēng kā Iô-tah lâng, tùi siàu-liân kàu lāu, eⁿ-á kah chabó͘ lâng, tī A-ta̍t goe̍h ê chi̍t ji̍t lāi, to̍h-sī cha̍p-jī-goe̍h cha̍p-saⁿ, choân-pō͘ kā i bia̍t-tiāu, kā i thâi-sí, hō͘ i sí-bông, koh chhiúⁿ in ê châi-bu̍t lâi chò chiàn-lī-phín.
3:14 Hitê jū-chí ê kó, chhau lâi kià hō͘ ta̍k séng, tùi chèng lâng soan-pò͘, hō͘ in ī-pī thèng-hāu hit ji̍t.
3:15 Cháu bûn-su ê chun-thàn ông ê bēng-lēng, kóaⁿ-kín chhut-hoat, chit-ê jū-chí tī Su-san kiong thoân-chhut. Ông kah Ha-mán chē-.leh lim chiú, chóng-.sī, Su-san siâⁿ khí tōa hun-loān.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。