以斯帖記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
2:1 Ê-su-tel Chò Ông-hō͘
Chiahê tāichì í-āu, A-ha-sui-ló͘ ông ê siū-khì soah, chiū siàu-liām Oa-si-thih kah i ê só͘ kiâⁿ, í-ki̍p i án-chóaⁿ kàng chí lâi pān i.
2:2 Chiū ánne, kin-tòe ông ê jîn-sîn kā i kóng, " Tio̍h kā ông chhōe súi ê chāi-sek-lí kúi-ê lâng lâi.
2:3 Ông tio̍h phài koaⁿ-oân tī i kok lāi ê ta̍k séng, hō͘ in chio-chi̍p só͘-ū súi ê chāi-sek-lí lâi-kàu Su-san ê ông-kiong, kàu lú-īⁿ kau hō͘ ông ê thài-kàm He-gái, to̍h-sī chiáng-koán lú-chú ê, mā tio̍h kiong-kip in chheng-khì seng-khu ê phín-liāu.
2:4 Ông só͘ kah-ì ê lú-chú thang kā i siat-li̍p chò ông-hō͘, lâi tāi-thè Oa-si-thih. " Ông lia̍h chit-ê tāichì chò hó, chiū ánne khì kiâⁿ.
2:5 Su-san kiong ū chi̍t-ê Iô-tah lâng, miâ kiò-chò Mol-té-kái, sī Biān-iá-mín lâng Ki-si ê kan-á-sun, Si-mí ê sun, Ia-il ê kiáⁿ.
2:6 Chêng Ba-bú-lông ông Nep-kat-ne-chal chhian-sóa Iô-tah ông Ia-ko-niah ê sî, Mol-té-kái mā tùi Ê-lú-sa-lèm siū chhian-sóa, i tī hit pang siū lia̍h ê lâng ê tiong-kan.
2:7 I pôe-ióng i a-chek ê chabó͘ kiáⁿ Ha-ta-siah, mā kiò-chò Ê-su-tel, in-ūi chit-ê chabó͘ gín'á bô pē-bú. I ê bīn-māu súi koh hó khòaⁿ, i ê pē-bú í-keng sí, Mol-té-kái chiū chiap-la̍p i chò kakī ê chabó͘ kiáⁿ.
2:8 Ông ê bēng-lēng kah chiàu-su í-keng soan-pò͘, chiū chū-chi̍p chin chē lú-chú tī Su-san ê ông-kiong, kau tī thài-kàm He-gái ê chhiú. Hit sî, Ê-su-tel mā hông sàng ji̍p-khì ông-kiong, kau hō͘ koán lú-chú ê He-gái ê chhiú.
2:9 Chit-ê lú-chú tit tio̍h He-gái kah-ì i, kā i hó khoán-thāi, kóaⁿ-kín ēng chheng-khì seng-khu ê phín-liāu kah i eng-kai tit tio̍h ê hūn-gia̍h hō͘ i, mā tùi ông-kiong kā eng-kai hō͘ i ê chhit-ê kiong-lí hō͘ i, kā i kah i hiahê kiong-lí poaⁿ sóa kàu lú-īⁿ siōng hó ê só͘-chāi.
2:10 Ê-su-tel m̄ bat kā lâng kóng i sī siáⁿ-mi̍h chek, siáⁿ-mi̍h cho̍k, in-ūi Mol-té-kái ū kà i m̄ thang kā lâng kóng.
2:11 Mol-té-kái ta̍k ji̍t tī lú-īⁿ ê thâu-chêng kiâⁿ lâi kiâⁿ khì, ài chai Ê-su-tel ū pêng-aná bô, kah i chiong-lâi ê kéng-gū án-chóaⁿ.
2:12 Chiàu chabó͘ lâng ê lē ī-pī cha̍p-jī goe̍h-ji̍t, to̍h-sī la̍k goe̍h-ji̍t ēng bu̍t-io̍h ê iû, la̍k goe̍h-ji̍t ēng phang-liāu kah lú-chú chheng-khì seng-khu ê pa̍t chióng mi̍h. Chheng-khì ê ji̍t móa liáu-āu, chèng lú-chú chiū chiàu chhù-sū ji̍p-khì kìⁿ A-ha-sui-ló͘ ông.
2:13 Lú-chú ji̍p-khì kìⁿ ông sī chit khoán: Tùi lú-īⁿ kàu ông-kiong ê sî, kiàn-nā i só͘ ài ê mi̍h lóng hō͘ i, i sòa tòa-.khì.
2:14 Ê-hng sî ji̍p-.khì, keh kang chá-khí tńg-lâi tē-jī-ê lú-īⁿ, kau hō͘ ông ê thài-kàm, to̍h-sī koán-lí pîn-hui ê thài-kàm Sa-kal ê chhiú. Nā m̄-sī ông kah-ì i, koh thê-khí i ê miâ lâi tiàu i, chiū bô koh ji̍p-khì kìⁿ ông.
2:15 Mol-té-kái chiap-la̍p chò i ê chabó͘ kiáⁿ ê Ê-su-tel, to̍h-sī i ê a-chek A-mí-hail ê chabó͘ kiáⁿ, chiàu chhù-sū tio̍h ji̍p-khì kìⁿ ông ê sî, tû-khì ông ê thài-kàm chiáng-koán lú-chú ê He-gái só͘ hun-phòe hō͘ i ê, lēng-gōa bô thó pa̍t mi̍h. Kiàn-nā khòaⁿ tio̍h Ê-su-tel ê lâng lóng kah-ì i.
2:16 A-ha-sui-ló͘ ông chē-ūi tē-chhit nî cha̍p-.goe̍h, to̍h-sī The-biat goe̍h, Ê-su-tel tit tio̍h soán-poa̍t, ji̍p-khì ông-kiong kìⁿ ông.
2:17 Ông thiàⁿ Ê-su-tel iâⁿ-kòe kî-tha chèng lú-chú, i tī ông ê ba̍k-chiu chêng tit tio̍h un-tián kah thióng-ài, iâⁿ-kòe kî-tha chèng chāi-sek-lí. Ông chiū kā ông-hō͘ ê bián-liû tì tī i ê thâu-khak, siat-li̍p i chò ông-hō͘, lâi tāi-thè Oa-si-thih.
2:18 Hit sî, ông ūi tio̍h hiahê tāi-sîn kah pah-koaⁿ siat tōa iàn-se̍k, to̍h-sī Ê-su-tel ê iàn-se̍k, koh an-bú ta̍k séng, chiàu ông ê hù-chiok lâi siúⁿ-sù mi̍h-kiāⁿ.
2:19 Mol-té-kái Kiù Ông ê Sèⁿ-miā
Hiahê chāi-sek-lí tē-jī pái chū-chi̍p ê sî, Mol-té-kái chē tī ông-kiong ê mn̂g.
2:20 Ê-su-tel chiàu Mol-té-kái só͘ bēng-lēng ê, m̄ bat kā lâng kóng i sī siáⁿ-mi̍h cho̍k, siáⁿ-mi̍h chek; in-ūi Ê-su-tel chhin-chhiūⁿ chá-chêng tit tio̍h i hû-ióng ê sî, i chun-thàn Mol-té-kái ê bēng-lēng.
2:21 Tng hiahê ji̍t, to̍h-sī Mol-té-kái chē tī ông-kiong mn̂g kháu ê sî, ông ê thài-kàm tiong-kan ū kò͘-mn̂g ê nn̄g lâng — Bik-thàn kah The-le-sih, in siū-khì kè-bô͘ beh hāi A-ha-sui-ló͘ ông.
2:22 Mol-té-kái chai hit-ê tāichì, chiū kā ông-hō͘ Ê-su-tel kóng. Ê-su-tel chiū ēng Mol-té-kái ê miâ kā hit-ê tāichì kóng hō͘ ông chai;
2:23 tui-kiù chit-ê tāichì, kó-jiân sī si̍t, chiū kā hit nn̄g lâng tiàu tī chhâ-kè téng, koh kā chit-ê tāichì tī ông ê bīn-chêng kì-chài tī le̍k-sú ê chheh.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。