以斯帖記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
1:1 A-ha-sui-ló͘ Ông Hùi-tû Oa-si-thih Ông-hō͘
Tng A-ha-sui-ló͘ ê sî, （chit-ê A-ha-sui-ló͘ koán-hat chi̍t-pah jī-cha̍p chhit séng, tùi Ìn-tō͘ kàu Kú-si̍t ）
1:2 Tng hiahê ji̍t, A-ha-sui-ló͘ ông tī Su-san ông-kiong chē i ê kok-ūi.
1:3 Chē-ūi tē-saⁿ nî, ūi tio̍h i só͘-ū ê siú-léng kah jîn-sîn pān toh, Phel-siah, Ma-tái ū koân-sè ê, í-ki̍p kok séng ê kùi-cho̍k kah siú-léng lóng lâi-kàu i ê bīn-chêng.
1:4 Hit sî, hián-chhut i êng-kng ê kok ê hù-jū kah kakī hó ê ui-giâm kah chun-kùi, keng-kòe chin chē ji̍t, to̍h-sī chi̍t-pah peh-cha̍p kang.
1:5 Chiahê ji̍t móa liáu-āu, ông koh tī ông-kiong hn̂g ê mn̂g-kháu tiâⁿ, ūi tio̍h tòa tī Su-san kiong lāi tōa-sè ê jîn-bîn pān toh chhit ji̍t.
1:6 Ū pe̍h, ū chheⁿ, ū nâ ê pò͘-lî, ēng iù-tē kah chí-sek ê soh kā gîn-khoân pa̍k tī tāi-lí-chio̍h ê thiāu; ū kim-gîn ê chhn̂g pâi tī âng, pe̍h, n̂g, o͘ ê tāi-lí-chio̍h só͘ pho͘ ê tē.
1:7 Ēng kim ê khì-kū hō͘ lâng lim, khì-kū chi̍t-ê chi̍t-khoán; ông ê chiú chin chē, hián-sī ông ê hù-chiok.
1:8 Lim chiú ū tiāⁿ tio̍h ê lē, m̄-chún bián-kióng lâng, in-ūi ông bēng-lēng kiong lāi só͘-ū ê sîn-po̍k, hō͘ lâng kok chiàu i ê ì-sù.
1:9 Ông-hō͘ Oa-si-thih tī A-ha-sui-ló͘ ông ê kiong lāi, mā ūi tio̍h chabó͘ lâng pān toh.
1:10 Kàu tē-chhit ji̍t, ông lim chiú lim kah chin sóng-khoài, chiū bēng-lēng Me-hu-mān, Bi-chu-tha, Ha-bó͘-ná, Bik-thah, A-bak-thah, Che-ta̍t, Kal-ka-su, to̍h-sī tiāⁿtiāⁿ kin-tòe tī A-ha-sui-ló͘ ông bīn-chêng hit chhit-ê thài-kàm,
1:11 Khì chhōa ông-hō͘ Oa-si-thih tì ông-hō͘ ê bián-liû kàu ông ê bīn-chêng, hō͘ hiahê jîn-bîn kah jîn-sîn khòaⁿ i ê súi, in-ūi i ê bīn-māu chin hó khòaⁿ.
1:12 Chóng-.sī, ông-hō͘ Oa-si-thih m̄-khéng lâi, m̄ chun-thàn thài-kàm só͘ thoân ông ê bēng-lēng, só͘-í, ông chin siū-khì, sim-lāi chhin-chhiūⁿ hóe teh to̍h.
1:13 Ông chiū mn̄g hiahê bat sî-sū koh ū tì-hūi ê lâng, in-ūi ông ū tiāⁿ tio̍h ê lē, beh pān tāichì tio̍h tāi-seng mn̄g chai lu̍t-lē koh bêng-pe̍k hoat-tō͘ ê lâng.
1:14 Hit sî, tī ông ê chó-iū tiāⁿtiāⁿ kìⁿ ông ê bīn, tī kok lāi chē koân ūi ê ū Phel-siah kah Ma-tái chhit-ê tāi-sîn, to̍h-sī Kal-si-nah, Se-thal, At-ma-thah, Tal-si-sih, Me-le̍k, Mal-se-nah, Me-mu-kan.
1:15 Ông mn̄g in kóng, " Ông-hō͘ Oa-si-thih bô chun-thàn thài-kàm só͘ thoân A-ha-sui-ló͘ ông ê bēng-lēng, taⁿ chiàu lē lán tio̍h án-chóaⁿ kā i pān? "
1:16 Me-mu-kan tī ông kah hiahê tāi-sîn ê bīn-chêng, ìn kóng, " Ông-hō͘ Oa-si-thih só͘ chò ê m̄ nā bú-jio̍k ông, mā sī bô hō͘ A-ha-sui-ló͘ ông tī ta̍k séng só͘-ū ê tāi-sîn kah chèng lâng bīn-chú.
1:17 In-ūi ông-hō͘ só͘ chò ê tāichì ē thoân-kàu chèng chabó͘ lâng, kóng, ' A-ha-sui-ló͘ ông tiàu ông-hō͘ Oa-si-thih kàu ông ê bīn-chêng, chóng-.sī, i m̄ lâi', ánne in ē biáu-sī in ê tiōng-hu.
1:18 Kin-á-ji̍t, Phel-siah kah Ma-tái ê chèng hu-jîn thiaⁿ tio̍h ông-hō͘ só͘ chò ê tāichì, ē tùi ông ê tāi-sîn ánne kóng; in-ūi ánne, ē seⁿ-khí chin chē biáu-sī kah siū-khì.
1:19 Ông nā lia̍h-chò hó, chiū chhut jū-chí siá tī Phel-siah kah Ma-tái ê lu̍t-lē tiong, hō͘ i bē kái-ōaⁿ tit, m̄-chún Oa-si-thih koh kàu A-ha-sui-ló͘ ông ê bīn-chêng, ông mā tio̍h kā ông-hō͘ ê ūi siúⁿ-sù hō͘ pí i khah hó ê lâng.
1:20 Ông só͘ kàng ê jū-chí piàn thoân tī i ê kok, ( i ê kok chin khoah-tōa ), chabó͘ lâng chiū lóng ē chun-kèng i ê tiōng-hu, bô-lūn chun-kùi ê á-.sī pi-chiān ê. "
1:21 Ông kah hiahê tāi-sîn lóng lia̍h i ê ōe chò hó, ông chiū chiàu Me-mu-kan ê ōe lâi kiâⁿ.
1:22 Chhut chiàu tī ông hiahê séng, kàu ta̍k séng chiàu in ê bûn-jī, kàu ta̍k ūi ê jîn-bîn chiàu in ê khiuⁿ-kháu, hō͘ chò tiōng-hu ê ta̍k-ê lâng tī chhù lāi chò chú, ta̍k-ê lâng chiàu i ê jîn-bîn ê khiuⁿ-kháu.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。