創世記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
42:1 Iô-sé-huh ê Hiaⁿ-tī Kàu Ai-gi̍p Bé Niû-si̍t
Iâ-kop khòaⁿ tio̍h Ai-gi̍p ū ngó͘-kok, chiū kā i hiahê kiáⁿ kóng, " Lín án-chóaⁿ teh sio-khòaⁿ? "
42:2 Koh kóng, " Góa thiaⁿ tio̍h Ai-gi̍p ū ngó͘-kok, lín thang lo̍h-khì hia, ūi lán tia̍h tām-po̍h, hō͘ lán thang tō͘ seng-oa̍h, bián sí. "
42:3 Chiū ánne, Iô-sé-huh cha̍p-ê a-hiaⁿ lóng lo̍h-khì Ai-gi̍p, khì tia̍h bí-niûⁿ.
42:4 Chóng-.sī, Iô-sé-huh ê sió-tī Biān-iá-mín, Iâ-kop bô chhe i kah in a-hiaⁿ chò-hóe khì, in-ūi i kóng, " Khióng-kiaⁿ i ē tú tio̍h siong-hāi. "
42:5 Lâi tia̍h bí-niûⁿ ê lâng tiong-kan, I-su-la-el hiahê kiáⁿ mā ū lâi, in-ūi Ka-nân tē mā ū ki-hng.
42:6 Tong-sî tī-lí Ai-gi̍p tē ê sī Iô-sé-huh, thiò bí-niûⁿ hō͘ hit só͘-chāi ê chèng lâng ê mā sī i. Iô-sé-huh hiahê a-hiaⁿ lâi, phak lo̍h tē kā i pài.
42:7 Iô-sé-huh khòaⁿ tio̍h i hiahê a-hiaⁿ, ē jīn-tit; i ké-chò chheⁿ-hūn-lâng, tùi in kóng giâm-lē ê ōe, mn̄g in kóng, " Lín tùi tó-ūi lâi? " In kóng, " Tùi Ka-nân tē lâi tia̍h bí-niûⁿ. "
42:8 Iô-sé-huh ē jīn-tit in a-hiaⁿ, m̄ koh, in bē jīn-tit i.
42:9 Iô-sé-huh ē kì-tit í-chêng só͘ bāng-kìⁿ koan-hē in ê hiahê bāng, chiū tùi in kóng, " Lín sī cheng-thàm, beh lâi thàm-thiaⁿ chit só͘-chāi ê hi-si̍t. "
42:10 In tùi i kóng, " Goán ê chú, m̄-sī, lí ê lô͘-po̍k lâi beh tia̍h bí-niûⁿ.
42:11 Goán lóng sī chi̍t-ê lâng ê kiáⁿ, goán sī láu-si̍t lâng, lí ê lô͘-po̍k m̄-sī cheng-thàm. "
42:12 Iô-sé-huh kā in kóng, " M̄-sī ánne. Lín lâi sī beh thàm-thiaⁿ chit só͘-chāi ê hi-si̍t. "
42:13 In kóng, " Lí ê lô͘-po̍k cha̍p-jī-ê hiaⁿ-tī, sī Ka-nân tē-it-ê lâng ê kiáⁿ; siōng sè-hàn ê, hiān-kim tī goán lāu-pē hia, ū chi̍t-ê í-keng sí-.khì à. "
42:14 Iô-sé-huh kā in kóng, " Góa tú-á kóng lín sī cheng-thàm, chit-ê ōe si̍t-chāi bô m̄ tio̍h.
42:15 Góa kí Hôa-láu ê sèⁿ-miā lâi chiùchōa, nā lín soah-bóe ê sió-tī bô lâi-kàu chia, lín bē tàng chhut chit só͘-chāi; góa beh ēng ánne lâi chhì-giām lín ê hi-si̍t.
42:16 Lín Tio̍h chhe lín tiong-kan chi̍t-ê lâng khì chhōa lín ê sió-tī lâi. Lín chiahê lóng tio̍h koaiⁿ tī chia, thang chèng-bêng lín ê ōe, khòaⁿ lín ū sêng-si̍t á-bô; nā bô, góa kí Hôa-láu ê sèⁿ-miā lâi chiùchōa, lín it-tēng sī cheng-thàm. "
42:17 Chiū ánne, Iô-sé-huh kā in lóng koaiⁿ tī kaⁿ-.ni̍h saⁿ kang.
42:18 Kàu tē-saⁿ ji̍t, Iô-sé-huh tùi in kóng, " Góa kèng-ùi Siōng-tè, lín tio̍h chiàu góa ê ōe khì kiâⁿ, chiū ē oa̍h.
42:19 Lín nā kó-jiân sī láu-si̍t lâng, lín hiaⁿ-tī tiong tio̍h lâu chi̍t-ê pa̍k tī kaⁿ lāi, chóng-.sī, lín thang tòa bí-niûⁿ tńg-.khì, thang kiù lín chhù lāi ê ki-hng.
42:20 Kā lín soah-bóe sió-tī chhōa-lâi góa chia, ánne lín ê ōe chiū ū pîn-kì, lín mā m̄-bián sí. " In chiū chiàu ánne khì kiâⁿ.
42:21 In chò-hóe kóng, " Lán tùi lán ê sió-tī si̍t-chāi ū chōe. I ai-kiû lán ê sî, lán ū khòaⁿ tio̍h i sim-lāi ê kan-khó͘, mā m̄-khéng thiaⁿ i ê ōe; só͘-í, chit tiûⁿ khó͘-lān chiah ē lîm-kàu lán. "
42:22 Lū-biān ìn in kóng, " Góa kám m̄-sī ū tùi lín kóng, m̄ thang hāi hit-ê gín'á lâi chhú-chōe? M̄ koh, lín m̄-thiaⁿ. Só͘-í, lâu i ê hoeh ê chōe, chitmá teh tùi lán chiahê thó. "
42:23 In m̄-chai Iô-sé-huh thiaⁿ ū in teh kóng siáⁿ, in-ūi tī in tiong-kan ū ēng hoan-e̍k-koaⁿ.
42:24 Iô-sé-huh oa̍t tńg-sin lâu ba̍k-sái, koh oa̍t tńg-lâi kah in kóng-ōe. Chiū tī in tiong-kan chhú Si-miān chhut-.lâi, tī in ê bīn-chêng kā i pa̍k-.leh.
42:25 Iô-sé-huh ê Chèng Hiaⁿ-ko Tò Τńg-khì Ka-nân
Iô-sé-huh hoan-hù lâng kā ngó͘-kok ji̍p tī in ê khì-kū kàu móa-móa, mā kā in ta̍k lâng ê gîn hē tī in ê pò͘-tē lāi, lâi hêng in, koh chún-pī lō͘-.ni̍h ê chia̍h-mi̍h hō͘ in, lâng chiū chiàu ánne lâi kā in chún-pī.
42:26 In chiū kā ngó͘-kok hō͘ in ê lî-á chài, chiū lī-khui hia khì.
42:27 Kàu hioh mê ê só͘-chāi, in tiong-kan ū chi̍t-ê lâng tháu-khui i ê pò͘-tē, beh the̍h hō͘ lî chia̍h, chiah khòaⁿ tio̍h i ê gîn iû-goân tī-.leh, hē tī pò͘-tē kháu.
42:28 I chiū kā i ê hiaⁿ-tī kóng, " Góa ê gîn hêng tò tńg-.lâi à! Lí khòaⁿ, iû-goân tī góa ê pò͘-tē lāi. " In chiū kiaⁿ kah sim-chōng kiông-beh tiāⁿ-.khì, phi̍h-phi̍h chhoah, chò-hóe kóng, " Siōng-tè ánne khoán-thāi lán, sī siáⁿ-mi̍h ì-sù? "
42:29 In tńg-kàu Ka-nân tē, kàu in lāu-pē Iâ-kop hia, kā só͘ tú-.tio̍h ê tāichì lóng kā i kóng,
42:30 " Hitê lâng, to̍h-sī hit só͘-chāi ê chú, tùi goán kóng chin giâm-lē ê ōe, kā goán lia̍h-chò sī hit só͘-chāi ê cheng-thàm.
42:31 Goán kā i kóng, ' Goán sī láu-si̍t lâng, goán m̄-sī cheng-thàm.
42:32 Goán sī cha̍p-jī-ê hiaⁿ-tī, sī goán lāu-pē ê kiáⁿ; ū chi̍t-ê sí-.khì, siōng sè-hàn ê hiān-kim kah goán lāu-pē tī Ka-nân tē. '
42:33 Hitê lâng, to̍h-sī hit só͘-chāi ê Chú, kā goán kóng, ' Nā ài hō͘ góa chai lín sī láu-si̍t lâng, lín hiaⁿ-tī tiong tio̍h lâu chi̍t-ê tī góa chia, lín chiahê thang tòa ngó͘-kok tńg-.khì, kiù lín chhù lāi ê ki-hng.
42:34 Chhōa lín soah-bóe ê sió-tī lâi góa chia, góa chiū chai lín m̄-sī cheng-thàm, sī láu-si̍t lâng; ánne góa chiū ē kā lín ê hiaⁿ-tī kau hō͘ lín, lín mā thang tī chit só͘-chāi bé-bē. '"
42:35 Āu-lâi, in piàⁿ in ê pò͘-tē, siūⁿ bē kàu in ta̍k lâng ê gîn-pau lóng tī in ê pò͘-tē lāi; in kah in lāu-pē khòaⁿ tio̍h gîn-pau chiū lóng khí kiaⁿ-hiâⁿ.
42:36 In ê lāu-pē Iâ-kop kā in kóng, " Lín hō͘ góa sit-lo̍h góa ê kiáⁿ. Iô-sé-huh sí-.khì, Si-miān mā sí-.khì, taⁿ lín koh beh chhōa Biān-iá-mín khì. Chiahê tāichì lóng sī hāi tio̍h góa. "
42:37 Lū-biān kā i ê lāu-pē kóng, " Góa nā bô chhōa i tńg-lâi kau lí, lí thang thâi góa nn̄g-ê kiáⁿ; chò lí thang kā i kau-tài góa, góa it-tēng chhōa i tńg-lâi kau lí. "
42:38 Iâ-kop kóng, " Góa ê kiáⁿ góa bô beh hō͘ i kah lín khì, i ê a-hiaⁿ í-keng sí-.khì, chí ū chhun i; i nā tī lín só͘ kiâⁿ ê lō͘-.ni̍h tú tio̍h hām-hāi, he to̍h-sī lín hō͘ góa pe̍h thâu-mn̂g chhi-chhám lo̍h im-hú. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。