尼希米記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
9:1 Bîn-chiòng Jīn Chōe
Chit goe̍h jī-sì, I-su-la-el lâng chū-chi̍p kìm-chia̍h, chhēng môa-saⁿ, sám hóe-hu.
9:2 I-su-la-el ê kiáⁿ-sun chiū kah só͘-ū ê gōa-pang lâng keh-khui, khiā-teh sêng-jīn kakī ê chōe-ok kah in chó͘-sian ê chōe-kò.
9:3 In khiā tī kakī ê só͘-chāi, ēng hit ji̍t sì-hūn chi-it ê sî-kan tha̍k Siōng-chú — in ê Siōng-tè lu̍t-hoat ê chheh, koh ēng sì-hūn chi-it ê sî-kan jīn chōe, kèng-pài Siōng-chú — in ê Siōng-tè.
9:4 E-siu-ah, Ba-nî, Kat-mi-el, Si-ba-niah, Bun-nî, Se-le-biah, Ba-nî kah Ke-ná-nî, lóng khiā tī Lē-bī lâng ê tâi téng, tōa-siaⁿ kiû-kiò Siōng-chú — in ê Siōng-tè.
9:5 Lē-bī lâng E-siu-ah, Kat-mi-el, Ba-nî, Ha-siap-niah, Se-le-biah, Ho͘-te-iah, Si-ba-niah, Pe-tha-hiah, kóng, " Lín tio̍h khiā khí-lâi oló Siōng-chú — lín ê Siōng-tè, tùi éng-oán kàu éng-oán. Siōng-chú ah, Lí êng-kng ê miâ sī eng-kai oló ê, iâⁿ-kòe it-chhè ê chheng-ho͘ kah oló. "
9:6 Jīn-chōe ê Kî-tó
Sòa lo̍h-.lâi, I-su-la-el lâng ánne kî-tó, Siōng-chú ah, to̍k-to̍k Lí sī Siōng-chú! Lí chhòng-chō thiⁿ kah chiahê thiⁿ ê thiⁿ kah thiⁿ-téng ê bān-kun, tē kah tē-chiūⁿ ê bān-mi̍h, hái kah hái tiong ê bān-mi̍h, che it-chhè lóng sī Lí só͘ pó-chûn ê. Thian-kun mā kèng-pài Lí.
9:7 Siōng-chú ah, Lí sī Siōng-tè, bat kéng-soán A-bú-lâm, chhōa i chhut Kal-tí-ah ê Ul, siúⁿ-sù i ê miâ kiò-chò A-bu-la-hàm.
9:8 Lí khòaⁿ i ê sim tī Lí ê bīn-chêng chīn-tiong, chiū kah i li̍p-iok, èng-ín kā Ka-nân lâng, Hiat lâng, A-mô͘-lī lâng, Pe-lí-ji lâng, I-é-bú-suh lâng, Gi-ga-sih lâng ê tē hō͘ i ê kiáⁿ-sun, koh ū èng-giām Lí ê ōe, in-ūi Lí sī kong-gī ê.
9:9 Lí ū khòaⁿ tio̍h goán ê chó͘-sian tī Ai-gi̍p só͘ siū ê khùn-khó͘, thiaⁿ in tī Âng-hái piⁿ ê ai-kiû,
9:10 chiū kiâⁿ sîn-jiah kî-sū, chek-hoa̍t Hôa-láu kah i ê jîn-sîn, í-ki̍p i kok lāi ê chèng lâng. In-ūi Lí chai in kiau-ngō͘ khoán-thāi goán ê chó͘-sian, Lí chiū ūi kakī tit tio̍h miâ-siaⁿ kah kin-á-ji̍t sio-siâng.
9:11 Lí tī in ê bīn-chêng kā hái hun-khui, hō͘ in tùi hái tiong ná chhin-chhiūⁿ kiâⁿ ta tē kòe-.khì, Lí kā jiok in ê lâng hiat tī chhim hái, ná chhin-chhiūⁿ hiat chio̍h-thâu tī tōa-chúi tiong;
9:12 Lí iū-koh tī ji̍t-sî ēng hûn-thiāu ín-chhōa in, àm-sî Lí ēng hóe-thiāu kā in só͘ kiâⁿ ê lō͘ chiò-kng.
9:13 Lí mā kàng-lîm tī Si-nái soaⁿ, tùi thiⁿ-.ni̍h kah in kóng-ōe, siúⁿ-sù hō͘ in chèng-ti̍t ê hoat-tō͘, chin-si̍t ê hoat-tō͘, hó ê lu̍t-lē kah kài-bēng,
9:14 koh hō͘ in chai Lí an-hioh ê sèng-ji̍t, mā thok Lí ê lô͘-po̍k Mô͘-se ēng kài-bēng, lu̍t-lē, hoat-tō͘ kā in bēng-lēng.
9:15 Ūi tio̍h in pak-tó͘ iau, chiū tùi thiⁿ siúⁿ-sù bí-niûⁿ; ūi tio̍h in chhùi-ta, chiū tùi chio̍h-pôaⁿ chhut chúi, koh bēng-lēng in khì sêng-chiap Lí só͘ chiùchōa beh hō͘ in ê tē.
9:16 Chóng-.sī, in kah goán ê chó͘-sian chò tāichì kiau-ngō͘, ngē in ê ām-kún, bô chun-thàn Lí ê kài-bēng;
9:17 m̄-khéng sūn-ho̍k, mā bē kì-tit Lí tī in tiong-kan só͘ kiâⁿ ê kî-sū, kèng-jiân ngē in ê ām-kún, tī pōe-ge̍k tiong kakī siat-li̍p siú-léng, beh oa̍t tńg-khì in chò lô͘-lē ê tē. Chóng-.sī, Lí sī hoaⁿ-hí sià-bián lâng, ū un-tián, liân-bín, bô khoài-khoài siū-khì, ū móa-móa chû-ài ê Siōng-tè, Lí bô kā in pàng-sak.
9:18 In sûi-jiân tù chi̍t chiah gû-á, koh kóng, " Che sī bat chhōa lí chhut Ai-gi̍p ê Siōng-tè ", ánne tōa-tōa kek Lí siū-khì;
9:19 Lí iáu koh tōa si liân-bín, bô kā in pàng-sak tī khòng-iá. Ji̍t-sî, hûn-thiāu bô lī-khui in, chhōa in kiâⁿ lō͘; àm-sî, hóe-thiāu mā bô lī-khui in, kā in chiò-kng tī in só͘ tio̍h kiâⁿ ê lō͘.
9:20 Lí mā siúⁿ-sù Lí bí-hó ê Sèng Sîn lâi kà-sī in, Lí ê má-ná iû-goân hō͘ in chia̍h bô soah, ūi tio̍h in chhùi-ta, Lí siúⁿ-sù hō͘ in chúi.
9:21 Tī khòng-iá sì-cha̍p nî, Lí iúⁿ-chhī in, in chiū bô khiàm-khoeh pòaⁿ-hāng, in ê saⁿ bô phòa, in ê kha bô phòng-phā.
9:22 Lí kā lia̍t pang kah hiahê jîn-bîn hō͘ in, hun-phài in tī ta̍k kak-thâu, in chiū tit tio̍h Si-hông ê tē, He-si-bóng ông ê tē kah Ba-siáng ông O͘-k ê tē.
9:23 Lí ke-thiⁿ in ê kiáⁿ-sun, chhin-chhiūⁿ thiⁿ-chheⁿ ê chē; chhōa in kàu hit-ê tē, to̍h-sī Lí kā in ê chó͘-sian kóng in beh ji̍p-khì sêng-chiap ê tē.
9:24 Án-ne, in ê kiáⁿ-sun ji̍p-khì sêng-chiap hit-ê tē, Lí tī in ê bīn-chêng chè-ap tòa tī hit só͘-chāi ê jîn-bîn, to̍h-sī Ka-nân lâng, kā in kah in ê kun-ông í-ki̍p hit só͘-chāi ê jîn-bîn, lóng kau tī in ê chhiú, hō͘ in chhut-chāi kakī ì-sù lâi khoán-thāi in.
9:25 In cheng-ho̍k kian-kò͘ ê siâⁿ, pûi ê thó͘-tē, tit tio̍h chhiong-móa ta̍k chióng hó mi̍h ê chhù-the̍h, khui piān-piān ê chúi-chéⁿ, phû-tô hn̂g kah kaⁿ-ná hn̂g ê kóe-chí chhiū chin chē. In tit tio̍h chia̍h pá, seng-khu pûi, in-ūi Lí ê tōa in, in chiū sim-lāi khoài-lo̍k.
9:26 Chóng-.sī, in m̄ sūn-ho̍k, kèng-jiân pōe-ge̍k Lí, kā Lí ê lu̍t-hoat hiat tī kha-chiah-āu, Lí ê sian-ti khoàn-kài in, beh hō͘ in kui-ǹg Lí, in chiū kā sian-ti thâi-sí, tōa-tōa kek Lí siū-khì.
9:27 Só͘-í, Lí kā in kau hō͘ tùi-te̍k ê chhiú, siū in ê khó͘-to̍k. In tú tio̍h khó͘-lān ê sî chiū ai-kiû Lí, Lí chiū tùi thiⁿ àⁿ-lo̍h thiaⁿ, chiàu Lí ê tōa liân-bín hō͘ in ū chín-kiù ê lâng, kiù in thoat-lī tùi-te̍k ê chhiú.
9:28 Chóng-.sī, in tit tio̍h pêng-an liáu-āu, koh tī Lí ê bīn-chêng kiâⁿ pháiⁿ, só͘-í, Lí pàng-sak in tī tùi-te̍k ê chhiú, hō͘ tùi-te̍k kā in koán-hat. In oa̍t tò tńg-lâi ai-kiû Lí ê sî, Lí iû-goân tùi thiⁿ àⁿ-lo̍h thiaⁿ, tiāⁿtiāⁿ chiàu Lí ê liân-bín kā in chín-kiù.
9:29 Koh khoàn-kài in, ài beh ín-chhōa in kui-ǹg Lí ê lu̍t-hoat. Chóng-.sī, in chò tāichì kiau-ngō͘, m̄ chun-thàn Lí ê kài-bēng, ûi-hoān Lí hiahê hoat-tō͘, ( lâng chiàu ánne kiâⁿ, siūⁿ beh tit tio̍h oa̍h ê, ) oa̍t-tńg keng-kah-thâu, ngē in ê ām-kún m̄-khéng chun-thàn.
9:30 Chóng-.sī, Lí khoan-iông in chin chē nî, koh ēng Lí ê Sèng Sîn thok Lí hiahê sian-ti, lâi tùi in chò kiàn-chèng, in iû-goân m̄ chun-thàn, só͘-í, Lí kā in kau tī lia̍t kok ê jîn-bîn ê chhiú.
9:31 Chóng-.sī, Lí ū tōa liân-bín, bô kā in choân-pō͘ siau-bia̍t, mā bô pàng-sak in; in-ūi Lí sī ū un-tián koh ū liân-bín ê Siōng-tè.
9:32 Taⁿ goán ê Siōng-tè ah, Lí sī chì-tōa, ū koân-lêng ê, thang kiaⁿ-ùi, siú iok, si chû-ài ê Siōng-tè. Goán ê kun-ông, siú-léng, chè-si, sian-ti, chó͘-sian kah Lí ê chú-bîn, tùi A-siul lia̍t ông ê sî kàu kin-á-ji̍t só͘ tú tio̍h it-chhè ê khó͘-lān, kiû Lí m̄ thang lia̍h-chò sī sió-khóa tāichì.
9:33 Chóng-.sī, goán só͘ tú-.tio̍h ê lóng sī Lí ê kong-gī, in-ūi Lí só͘ chò ê sī chin-si̍t, goán só͘ kiâⁿ ê sī pháiⁿ.
9:34 Goán ê kun-ông, siú-léng, chè-si kah chó͘-sian, lóng bô chun-siú Lí ê lu̍t-hoat, m̄ chun-thàn Lí ê kài-bēng kah Lí ê kiàn-chèng, to̍h-sī Lí tùi in só͘ kiàn-chèng ê ōe.
9:35 In tī in ê pún-kok, tī Lí siúⁿ-sù hō͘ in tōa hok-khì kah Lí tī in bīn-chêng só͘ siúⁿ-sù khoah-tōa koh pûi koh súi ê tē, in bô ho̍k-sāi Lí, mā bô oa̍t tńg-sin lâi lī-khui in ê pháiⁿ hêng-ûi.
9:36 Goán kin-á-ji̍t chò lô͘-po̍k, Lí só͘ siúⁿ-sù hō͘ goán chó͘-sian ê tē, thang chia̍h i chhut-sán ê kóe-chí kah hó ê mi̍h, lí khòaⁿ, goán tī chit-ê tē chò lâng ê lô͘-po̍k!
9:37 Chit-ê tē chhut chin chē mi̍h kui tī lia̍t ông, to̍h-sī Lí in-ūi goán ê chōe, Lí só͘ siat-li̍p lâi kā goán koán-hat ê ông, in chhut-chāi kakī ì-sù koán-hat goán ê seng-khu kah goán ê chengseⁿ, goán tú tio̍h tōa hoān-lān.
9:38 Bîn-chiòng Chhiam-iok
In-ūi che it-chhè ê tāichì, goán li̍p khak-si̍t ê iok, kā i siá bêng. Goán ê siú-léng, Lē-bī lâng kah chè-si lóng khàm ìn.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。