尼希米記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
8:1 E-chu-la̍h Soan-tho̍k Lu̍t-hoat
Kàu tē-chhit goe̍h, I-su-la-el lâng í-keng lóng tòa ji̍p-khì in hiahê siâⁿ. Hit sî, só͘-ū ê jîn-bîn lóng chū-chi̍p tī chúi-mn̂g chêng khui-khoah ê só͘-chāi, chhiáⁿ keng-ha̍k kàu-su E-chu-la̍h tòa Mô͘-se lu̍t-hoat ê chheh lâi, to̍h-sī Siōng-chú só͘ bat bēng-lēng I-su-la-el ê.
8:2 Chhit-goe̍h chhe-it, chè-si E-chu-la̍h tòa lu̍t-hoat ê chheh lâi-kàu gī-hōe chêng, sī lâm sī lí, í-ki̍p kiàn-nā thiaⁿ-liáu ē-hiáu-.tit ê lâng ê bīn-chêng.
8:3 Tī chúi-mn̂g chêng khui-khoah ê só͘-chāi, tùi thiⁿ-kng kàu tiong-tàu, tī chèng lâm-lí kah bêng-pe̍k hiahê ōe ê lâng ê bīn-chêng tha̍k chheh, jîn-bîn àⁿ hīⁿ-khang thiaⁿ lu̍t-hoat ê chheh.
8:4 Keng-ha̍k kàu-su E-chu-la̍h khiā tī in ūi tio̍h chit-ê tāichì só͘ chún-pī ê chhâ-tâi téng. Tī i ê sin piⁿ ū Mat-ta-thí-iah, Sī-má, A-ná-iah, U-lī-a, Hil-kí-iah kah Ma-a-se-iah, khiā tī i ê chiàⁿ pêng; Pe-tá-iah, Mi-sa-el, Mal-ki-iah, Ha-siúm, Ha-si-bat-ta-nah, Cha-kha-lī-a kah Me-siu-lám, khiā tī i ê tò pêng.
8:5 E-chu-la̍h khiā tī chèng lâng ê téng-bīn, tī chèng lâng ê ba̍k-chiu chêng hian-khui hit pún chheh. I chi̍t-ē hian-khui, chèng lâng chiū lóng khiā khí-.lâi.
8:6 E-chu-la̍h oló Siōng-chú — chì-tōa ê Siōng-tè. Chèng lâng lóng kā chhiú gia̍h khí-.lâi, ìn kóng, " A-men! A-men! " Chiū àⁿ thâu, bīn ǹg tē, kèng-pài Siōng-chú.
8:7 E-siu-ah, Ba-nî, Se-le-biah, Ia-mín, Ak-kup, Sia-be-thài, Ho͘-te-iah, Ma-a-se-iah, Ke-li-thah, A-cha-lí-ah, Io-cha-bat, Ha-nan, Phe-la-iah kah Lē-bī lâng, hō͘ jîn-bîn bêng-pe̍k lu̍t-hoat; jîn-bîn lóng khiā tī i ê só͘-chāi.
8:8 In tha̍k Siōng-tè lu̍t-hoat ê chheh, ti̍t-kàu bêng-pe̍k koh khui-thiah hit-ê ì-sù, hō͘ jîn-bîn bêng-pe̍k só͘ tha̍k ê lāi-iông.
8:9 Chóng-tok Nî-hí-miah kah chò chè-si ê keng-ha̍k kàu-su E-chu-la̍h, í-ki̍p kà-sī jîn-bîn ê Lē-bī lâng, tùi chèng lâng kóng, " Kin-á-ji̍t sī Siōng-chú — lín ê Siōng-tè ê sèng-ji̍t, m̄ thang pi-ai thî-khàu. " In-ūi chèng lâng thiaⁿ tio̍h lu̍t-hoat ê ōe lóng thî-khàu.
8:10 I koh kā in kóng, " Khì, lín khì chia̍h pûi ê mi̍h, lim tiⁿ ê bī; tio̍h pun hō͘ bô chún-pī mi̍h ê lâng, in-ūi kin-á-ji̍t sī lán ê Chú ê sèng-ji̍t. Lín m̄ thang iu-būn, in-ūi tùi Siōng-chú tit tio̍h ê hoaⁿ-hí sī lín ê khùi-la̍t. "
8:11 Chiū ánne, Lē-bī lâng an-ùi chèng lâng kóng, " Tio̍h an-chēng, in-ūi kin-á-ji̍t sī sèng-ji̍t; m̄ thang iu-būn. "
8:12 Jîn-bîn chiū khì lim-chia̍h, mā pun mi̍h hō͘ lâng, tōa hoaⁿ-hí, in-ūi in bêng-pe̍k chheh só͘ thoân hō͘ in ê ōe.
8:13 Tòa-pêⁿ-cheh
Keh tńg kang, chèng jîn-bîn ê cho̍k-tiúⁿ, chè-si kah Lē-bī lâng, lóng chū-chi̍p lâi-kàu keng-ha̍k kàu-su E-chu-la̍h hia, ài beh tì-ì thiaⁿ lu̍t-hoat ê ōe.
8:14 In khòaⁿ tio̍h lu̍t-hoat tiong ū kì-chài: Siōng-chú thok Mô͘-se bēng-lēng I-su-la-el lâng, tio̍h tī chhit-.goe̍h ê cheh-kî tòa tī chháu-liâu,
8:15 koh tio̍h tī ta̍k-ê siâⁿ kah Ê-lú-sa-lèm soan-iông kóng, " Lín tio̍h chhut-khì soaⁿ-.ni̍h, chhú kaⁿ-ná chhiū-ki, iá kaⁿ-ná chhiū-ki, pa̍t-á chhiū-ki, chó chhiū-ki, ām-chhiū ê chhiū-ki, lâi chiàu só͘ kì-chài ê tah chháu-liâu. "
8:16 Jîn-bîn chiū chhut-.khì, tòa chhiū-ki lâi, ta̍k lâng tī kakī ê chhù téng pêⁿ-tâi, tī īⁿ lāi, tī Siōng-tè tiān ê īⁿ lāi, tī chúi-mn̂g khui-khoah ê só͘-chāi, tī E-hu-laim mn̂g khui-khoah ê só͘-chāi tah chháu-liâu-á.
8:17 Hiahê siū lia̍h-.khì koh tńg-.lâi ê hōe-chiòng chiū tah chháu-liâu-á, chē tī chháu-liâu-á lāi-bīn. In-ūi tùi Nùn ê kiáⁿ Io-siú-ah ê sî kàu chit ji̍t, I-su-la-el lâng m̄ bat ánne kiâⁿ. Chiū ánne, in tōa-tōa hoaⁿ-hí.
8:18 Tùi thâu chi̍t ji̍t kàu lō͘-bóe ji̍t, E-chu-la̍h ta̍k ji̍t tha̍k Siōng-chú ê lu̍t-hoat. Chèng lâng siú cheh chhit ji̍t, kàu tē-peh ji̍t ū giâm-siok-hōe, lóng chiàu tiāⁿ tio̍h ê lē.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。