尼希米記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
4:1 Nî-hí-miah Iâⁿ-kòe Chó͘-tòng Kang-chok ê Lâng
San-bal-lat thiaⁿ tio̍h goán khí siâⁿ chhiûⁿ chiū tōa siū-khì, tōa-tōa thòng-hūn koh thí-chhiò Iô-tah lâng.
4:2 Tī i ê hiaⁿ-tī kah Sa-má-lī-a ê kun-peng ê bīn-chêng kóng, " Chiahê loán-jio̍k ê Iô-tah lâng teh chò siáⁿ-mi̍h beh siat-hoat hō͘ kakī kian-kò͘? Beh hiàn chè? Beh chi̍t ji̍t sêng-kong? Kám kóng beh tùi thô͘-tui tiong the̍h-chhut kòe hóe-sio ê chio̍h-thâu lâi koh khí? "
4:3 Am-móng lâng To-bi-iah khiā tī i ê sin piⁿ kóng, " In só͘ khí ê siâⁿ nā ū chi̍t chiah hô͘-lî chiūⁿ-.khì, chiū ē ta̍h-tó in ê chio̍h-chhiûⁿ. "
4:4 Goán ê Siōng-tè ah, kiû Lí thiaⁿ, in-ūi goán hō͘ lâng khòaⁿ-khin, kiû Lí hō͘ in ê húi-pòng kui tī in ê thâu-khak, hō͘ in tī siū lia̍h ê tē tú tio̍h chhiúⁿ-kiap.
4:5 M̄-thang jia-khàm in ê chōe-kò, m̄ thang hō͘ in ê chōe-ok tùi Lí ê bīn-chêng chhat-siau, in-ūi in tī khí-chō ê lâng ê bīn-chêng, kek-tōng Lí ê siū-khì.
4:6 Án-ne, goán khí siâⁿ chhiûⁿ, siâⁿ chhiûⁿ chiū lóng liân-chiap khí-.lâi, koân-tō͘ í-keng kàu chi̍t-pòaⁿ, in-ūi jîn-bîn ū sim teh chò-kang.
4:7 San-bal-lat, To-bi-iah, A-la-puh lâng, Am-móng lâng kah A-si-to͘t lâng, thiaⁿ tio̍h siu-lí Ê-lú-sa-lèm siâⁿ chhiûⁿ ê kang teh chìn-hêng, pó͘ that phòa-khiah ê só͘-chāi tú-á teh pó͘ that, chiū chin siū-khì.
4:8 Tāi-ke chò-hóe kè-bô͘ beh lâi kong-kek Ê-lú-sa-lèm, hō͘ hit lāi-bīn khí jiáu-loān.
4:9 Chóng-.sī, goán kî-tó lán ê Siōng-tè, koh in-ūi in ê iân-kò͘, chiū phài lâng siú-bōng, mê-ji̍t thê-hông.
4:10 Iô-tah lâng kóng, " Hāu-phiaⁿ-phè iáu koh chin chē, taⁿ-kang í-keng bô la̍t, só͘-í, lán bē tàng khí siâⁿ chhiûⁿ. "
4:11 Lán ê tùi-te̍k koh bat kóng, " Thàn in iáu m̄-chai, bô khòaⁿ-.tio̍h, lán ji̍p-khì in tiong-kan kā in thâi-sí, hō͘ in ê chò-kang lóng soah-.khì. "
4:12 Hiahê tòa tī óa-kīn tùi-te̍k ê Iô-tah lâng, tùi ta̍k só͘-chāi lâi kìⁿ goán cha̍p pái, kóng, " Lín it-tēng tio̍h tńg-lâi goán chia. "
4:13 Só͘-í, góa hō͘ jîn-bîn kok chiàu in ê chong-cho̍k gia̍h to, gia̍h chhiuⁿ, gia̍h kiong ê, khiā tī siâⁿ chhiûⁿ āu-bīn kē ê só͘-chāi, khang ê só͘-chāi.
4:14 Góa koan-chhat liáu-āu chiū khí-lâi kā kùi-cho̍k, koaⁿ-tiúⁿ kah kî-tha ê jîn-bîn kóng, " M̄-bián kiaⁿ in, tio̍h ē kì-tit Chú sī tōa koh thang kiaⁿ ê. Tio̍h ūi tio̍h lín ê hiaⁿ-tī, lín ê kiáⁿ, lín ê chabó͘ kiáⁿ, lín ê bó͘ kah lín ê chhù-the̍h lâi kau-chiàn. "
4:15 Tùi-te̍k thiaⁿ tio̍h goán í-keng chai-iáⁿ, koh-chài Siōng-tè mā phò-hoāi in ê kè-ōe, goán chiū lóng tò tńg-lâi-kàu siâⁿ chhiûⁿ hia, ta̍k lâng chò in ê kang.
4:16 Tùi hit sî liáu-āu, góa ê lô͘-po̍k chi̍t-pòaⁿ chò-kang, chi̍t-pòaⁿ gia̍h chhiuⁿ, kōaⁿ tîn-pâi, gia̍h kiong, chhēng khoe-kah, koaⁿ-tiúⁿ lóng khiā tī Iô-tah kûn-chiòng ê āu-bīn.
4:17 Khí siâⁿ chhiûⁿ ê kah taⁿ-kang kok taⁿ in ê tàⁿ, chi̍t chhiú chò-kang, chi̍t chhiú gia̍h kun-khì.
4:18 Khí-chō ê lâng ta̍k-ê phāiⁿ to chiàu ánne khí-chō, pûn sàu-kak ê khiā tī góa ê sin piⁿ.
4:19 Góa kā chiahê kùi-cho̍k, koaⁿ-tiúⁿ kah kî-tha ê jîn-bîn kóng, " Chit-ê kang chin khoah-tōa, lán tī siâⁿ chhiûⁿ téng hun-khui, sio-lī put-chí hn̄g.
4:20 Lín bô-lūn tī tó-ūi thiaⁿ tio̍h sàu-kak ê siaⁿ, chiū tio̍h chū-chi̍p lâi-kàu goán hia. Lán ê Siōng-tè ē thè lán kau-chiàn. "
4:21 Goán ánne chò-kang, in ê chi̍t-pòaⁿ gia̍h chhiuⁿ, tùi thiⁿ-phú-kng kàu chheⁿ chhut-hiān ê sî.
4:22 Hit sî, góa koh kā jîn-bîn kóng, " Ta̍k lâng kah i ê lô͘-po̍k tio̍h tī Ê-lú-sa-lèm ê lāi-bīn hioh mê, thang àm-sî lâi pó-hō͘ goán, ji̍t-sî khì chò-kang. "
4:23 Án-ne, góa kah góa ê hiaⁿ-tī, góa ê lô͘-po̍k kah tòe góa ê hō͘-ōe-peng, bô chi̍t-ê thǹg saⁿ, chhut-khì chhiūⁿ chúi ê mā ta̍k-ê gia̍h ke-si.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。