尼希米記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
1:1 Nî-hí-miah Koan-sim Ê-lú-sa-lèm
Ha-ka-liah ê kiáⁿ Nî-hí-miah ê kì-lio̍k. Tng jī-cha̍p nî, Ki-su-liû goe̍h, góa tī Su-san ê ông-kiong.
1:2 Hit sî, góa ê hiaⁿ-tī chi̍t-ê miâ kiò-chò Ha-na-nih kah kúi-nā-ê Iô-tah lâng lâi chia. Góa mn̄g in iú-koan hiahê tô-thoat ê Iô-tah lâng, to̍h-sī siū lia̍h ê tiong-kan só͘ chhun lo̍h-.lâi ê kah Ê-lú-sa-lèm ê tāichì.
1:3 In kā góa kóng, " Hiahê siū lia̍h ê tńg-lâi só͘ chhun lâu-.leh ê lâng, tī séng lāi tú tio̍h tōa hoān-lān, siū lêng-jio̍k, jî-chhiáⁿ Ê-lú-sa-lèm ê siâⁿ chhiûⁿ siū thiah-húi, siâⁿ mn̂g hō͘ hóe sio-sio-.khì. "
1:4 Góa thiaⁿ tio̍h chiahê ōe chiū chē-.leh, thî-khàu pi-ai kúi-nā ji̍t, tī thiⁿ-téng ê Siōng-chú ê bīn-chêng kìm-chia̍h kî-tó, kóng,
1:5 " Thiⁿ téng ê Siōng-tè — Siōng-chú — chì-tōa thang kiaⁿ-ùi ê Siōng-tè ah, siú iok kiâⁿ thiàⁿ-sim tī thiàⁿ I koh chun-thàn I kài-bēng ê lâng.
1:6 Góa taⁿ kiû Lí, goān Lí àⁿ hīⁿ-khang thiaⁿ, ba̍k-chiu khòaⁿ, thiaⁿ Lí ê lô͘-po̍k chit sî mê-ji̍t ūi Lí ê lô͘-po̍k I-su-la-el lâng lâi kî-tó, tī Lí bīn-chêng ê kî-tó, sêng-jīn I-su-la-el lâng ê chōe, to̍h-sī goán ū tek-chōe Lí; góa kah góa ê lāu-pē ê ke lóng ū chōe.
1:7 Goán tùi Lí só͘ chò ê tāichì hui-siông hú-pāi, bô chun-siú Lí thok Lí ê lô͘-po̍k Mô͘-se só͘ bēng-lēng ê kài-bēng, lu̍t-lē, hoat-tō͘.
1:8 Kiû Lí ē kì-tit Lí só͘ bēng-lēng Lí ê lô͘-po̍k Mô͘-se ê ōe, kóng, ' Lín nā hoān chōe, Góa chiū beh kā lín sì-sòaⁿ khì lia̍t kok;
1:9 chóng-.sī, lín nā kui-sio̍k Góa, siú Góa ê kài-bēng lâi kiâⁿ, ánne lín siū kóaⁿ-tio̍k ê lâng, sûi-jiân tī thiⁿ-piⁿ, Góa mā ē tùi hia kā in chū-chi̍p, chhōa in lâi-kàu Góa só͘ kéng-soán beh an-tì Góa ê miâ ê só͘-chāi. '
1:10 " Taⁿ chiahê lóng sī Lí ê lô͘-po̍k, Lí ê chú-bîn, to̍h-sī Lí ēng Lí ê tōa khùi-la̍t kah tōa koân-lêng ê chhiú só͘ kiù-sio̍k ê.
1:11 Chú ah, kiû Lí àⁿ hīⁿ-khang thiaⁿ Lí ê lô͘-po̍k ê kî-tó kah hiahê ì-ài hoaⁿ-hí kèng-ùi Lí ê miâ hiahê lô͘-po̍k ê kî-tó, koh kiû Lí hō͘ Lí ê lô͘-po̍k kin-á-ji̍t heng-thong, tī chit-ê lâng bīn-chêng tit tio̍h un-tián. " Hit sî, góa chò ông ê chiú-chèng.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。