以斯拉記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
9:1 E-chu-la̍h Chai-iáⁿ Ū Lâng kah Gōa-pang Thong-hun
Chiahê tāichì í-keng chò liáu-āu, chiahê siú-léng lâi kìⁿ góa, kóng, " I-su-la-el jîn-bîn kah chè-si, í-ki̍p Lē-bī lâng, bô kakī hun-pia̍t lī-khui chiahê só͘-chāi ê jîn-bîn, chun-thàn in khó-ò͘ⁿ ê tāichì, to̍h-sī chun-thàn Ka-nân lâng, Hiat lâng, Pe-lí-ji lâng, I-é-bú-suh lâng, Am-móng lâng, Mô͘-ap lâng, Ai-gi̍p lâng kah A-mô͘-lī lâng ê tāichì.
9:2 In-ūi in ūi kakī kah in ê kiáⁿ, chhōa hiahê lâng ê chabó͘ kiáⁿ chò bó͘, tì-sú sèng ê kiáⁿ-sun kah hit só͘-chāi ê jîn-bîn chham-chhap; jî-chhiáⁿ siú-léng kah in ê koaⁿ-tiúⁿ chò in ê chōe-khoe.
9:3 Góa chi̍t-ē thiaⁿ tio̍h chit-ê tāichì, chiū thiah-li̍h góa ê saⁿ kah phâu, chhoah góa ê thâu-mn̂g kah chhùi-chhiu, tio̍h-kiaⁿ kah gāng-khì, chē-.leh.
9:4 Kiàn-nā ūi I-su-la-el Siōng-tè ê ōe lâi phi̍h-phi̍h chhoah ê, in-ūi siū lia̍h tńg-.lâi ê lâng só͘ hoān ê chōe, in lóng chū-chi̍p lâi-kàu góa chia. Góa chiū tio̍h-kiaⁿ kah gāng-.khì, chē-.leh, ti̍t-kàu hiàn ê-hng-chè ê sî.
9:5 Hiàn ê-hng-chè ê sî, góa tùi góa ê ut-būn khí-.lâi, thiah-li̍h saⁿ-phâu, siang kha kūi lo̍h-.khì, ǹg Siōng-chú — góa ê Siōng-tè gia̍h-khí chhiú lâi, kóng,
9:6 " Góa ê Siōng-tè ah, góa kiàn-siàu làu-khùi, m̄-káⁿ gia̍h thâu ǹg Lí — góa ê Siōng-tè, in-ūi goán ê chōe im-kòe thâu-khak, goán ê chōe-ok tú thiⁿ.
9:7 Tùi goán chó͘-sian ê ji̍t kàu kin-á-ji̍t, goán ê chōe-ok chin tāng; ūi tio̍h goán ê chōe-kò, goán kah goán ê lia̍t ông, chè-si, lóng kau tī gōa-pang lia̍t ông ê chhiú tiong, siū to-kiàm, siū ló͘-lia̍h, siū chhiúⁿ-kiap, bīn kiàn-siàu, chhin-chhiūⁿ kin-á-ji̍t ê khoán.
9:8 " Taⁿ tit tio̍h Siōng-chú — goán ê Siōng-tè chiām-chhiáⁿ si un hō͘ goán, kā goán lâu lo̍h-lâi chiahê tô-thoat ê lâng, hō͘ goán chhin-chhiūⁿ tit tio̍h thih-teng tèng tī I sèng ê só͘-chāi, hō͘ goán ê Siōng-tè thang chiò-kng goán ê ba̍k-chiu, hō͘ goán tī lô͘-lē tiong sió-khóa ē-tàng koh oa̍h lo̍h-.khì.
9:9 In-ūi goán sī lô͘-lē, chóng-.sī, tī lô͘-lē tiong, goán ê Siōng-tè bô khì-sak goán, koh hō͘ goán tī Phel-siah lia̍t ông ê bīn-chêng tit tio̍h un-tián, hō͘ goán koh oa̍h lo̍h-.khì, ē koh lâi khí goán Siōng-tè ê tiān, siu-lí hiahê húi-hoāi ê só͘-chāi, hō͘ goán tī Iô-tah kah Ê-lú-sa-lèm tit tio̍h ū chhiûⁿ-piah.
9:10 " Goán ê Siōng-tè ah, kì-jiân ánne, goán iáu ū siáⁿ-mi̍h ōe thang kóng ê? In-ūi goán í-keng khì-sak Lí ê bēng-lēng,
9:11 to̍h-sī Lí thok Lí ê lô͘-po̍k — chiahê sian-ti só͘ bēng-lēng ê kóng, ' Lín só͘ khì beh sêng-chiap chò sán-gia̍p ê tē sī ù-òe ê tē, ūi tio̍h hiahê kok ê jîn-bîn ê ù-òe kah in khó-ò͘ⁿ ê tāichì, in-ūi in hō͘ choân tē tùi chit pêng kàu hit pêng, móa-móa sī lahsap.
9:12 Só͘-í, m̄ thang kā lín ê chabó͘ kiáⁿ kè hō͘ in ê kiáⁿ, mā m̄ thang hō͘ lín ê kiáⁿ chhōa in ê chabó͘ kiáⁿ, éng-oán m̄ thang kah in tô͘-bô͘ pêng-an kah in ê lī-ek, ánne lín chiū thang kiông-sēng, chia̍h chit só͘-chāi ê hó mi̍h, sòa lâu hō͘ lín ê kiáⁿ-sun, éng-oán chò sán-gia̍p. '
9:13 Goán in-ūi goán ê pháiⁿ só͘ kiâⁿ kah goán ê tāng chōe, í-keng tú tio̍h che it-chhè ê tāichì, goán ê Siōng-tè ah, kiû Lí kā goán hêng-hoa̍t pí goán ê chōe só͘ eng-kai tit tio̍h ê khah khin, koh kā goán lâu lo̍h-lâi chiahê thoat-lī ê lâng.
9:14 Goán kám thang koh pōe-ge̍k Lí ê bēng-lēng, khì kah kiâⁿ khó-ò͘ⁿ ê tāichì ê jîn-bîn kiat-chhin? Nā ánne, Lí kám bô beh tùi goán siū-khì, ti̍t-kàu kā goán bia̍t-bông, tì-sú bô kah chi̍t-ê lâu-.leh, bô kah chi̍t-ê tô-thoat?
9:15 Siōng-chú — I-su-la-el ê Siōng-tè ah, Lí sī kong-gī ê, goán chiahê lâu-.leh ê lâng chiah ē-tàng chhin-chhiūⁿ kin-á-ji̍t, tit tio̍h tô-thoat. Lí khòaⁿ, goán tī Lí ê bīn-chêng ū chōe-ok, in-ūi ánne, bô lâng tī Lí ê bīn-chêng khiā ē tiâu. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。