以斯拉記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
7:1 E-chu-la̍h Lâi-kàu Ê-lú-sa-lèm
Chiahê tāichì í-āu, tī Phel-siah ông Al-ta-siá-su-ta chē-ūi ê sî, ū chi̍t-ê E-chu-la̍h, i sī Se-la-iah ê kiáⁿ, Se-la-iah sī A-cha-lí-ah ê kiáⁿ, A-cha-lí-ah sī Hil-kí-iah ê kiáⁿ,
7:2 Hil-kí-iah sī Sia-lúm ê kiáⁿ, Sia-lúm sī Cha-tok ê kiáⁿ, Cha-tok sī A-hi-top ê kiáⁿ,
7:3 A-hi-top sī A-ma-lí-ah ê kiáⁿ, A-ma-lí-ah sī A-cha-lí-ah ê kiáⁿ, A-cha-lí-ah sī Me-la-iot ê kiáⁿ,
7:4 Me-la-iot sī Che-la-hi-ah ê kiáⁿ, Che-la-hi-ah sī U-chi ê kiáⁿ, U-chi sī Buk-ki ê kiáⁿ,
7:5 Buk-ki sī A-bi-sai ê kiáⁿ, A-bi-sai sī Hui-ne-hah ê kiáⁿ, Hui-ne-hah sī Ê-lī-a-chal ê kiáⁿ, Ê-lī-a-chal sī tōa-chè-si A-lông ê kiáⁿ.
7:6 Chit-ê E-chu-la̍h sī tùi Ba-bú-lông lâi ê, thong-ta̍t Siōng-chú — I-su-la-el ê Siōng-tè siúⁿ-sù Mô͘-se ê lu̍t-hoat, i sī bín-chia̍t ê keng-ha̍k kàu-su. Ông chún i it-chhè só͘ kiû ê, sī chiàu Siōng-chú — i ê Siōng-tè ê chhiú kā i pang-chān ê.
7:7 Al-ta-siá-su-ta ông tē-chhit nî, I-su-la-el lâng ê chè-si kah Lē-bī lâng, chhiùⁿ koa ê, kò͘-mn̂g ê kah Na-thi-in, kok ū kúi-nā-ê lâng lâi-kàu Ê-lú-sa-lèm.
7:8 Ông tē-chhit nî gō͘-.goe̍h, E-chu-la̍h lâi-kàu Ê-lú-sa-lèm.
7:9 Chiaⁿ-goe̍h chhe-it, i tùi Ba-bú-lông chhut-hoat, gō͘-goe̍h chhe-it chiū kàu Ê-lú-sa-lèm, in-ūi i ū Siōng-tè si un ê chhiú kā i pang-chān.
7:10 In-ūi E-chu-la̍h í-keng koat-ì beh káng-kiù Siōng-chú ê lu̍t-hoat lâi kiâⁿ, koh kā lu̍t-lē kah hoat-tō͘ kà-sī I-su-la-el lâng.
7:11 Al-ta-siá-su-ta Hông-tè hō͘ E-chu-la̍h ê Bûn-kiāⁿ
Chè-si E-chu-la̍h sī keng-ha̍k kàu-su, sī thong-ta̍t Siōng-chú kài-bēng ê ōe kah I só͘ siúⁿ-sù I-su-la-el ê lu̍t-lē ê keng-ha̍k kàu-su. Al-ta-siá-su-ta ông sù i jū-chí, hit-ê bûn kì tī ē-té:
7:12 Lia̍t ông ê ông — Al-ta-siá-su-ta kià hō͘ chè-si E-chu-la̍h, i sī thong-ta̍t thiⁿ-téng Siōng-tè ê lu̍t-hoat ê keng-ha̍k kàu-su, koh sī oân-choân ê lâng, i ánne kóng,
7:13 " Tòa tī góa ê kok lāi ê I-su-la-el lâng, chè-si kah Lē-bī lâng, kiàn-nā kam-goān chiūⁿ-khì Ê-lú-sa-lèm ê, góa kàng chí hō͘ in kah lí khì.
7:14 Lí kì-jiân sī ông kah i chhit-ê bô͘-sū só͘ chhe ê, chiàu lí chhiú lāi ê Siōng-tè ê lu̍t-hoat khì tiâu-cha khó-chhat Iô-tah kah Ê-lú-sa-lèm;
7:15 koh tòa ông kah i ê bô͘-sū só͘ hoaⁿ-hí hiàn ê kim-gîn, beh hō͘ I-su-la-el ê Siōng-tè, to̍h-sī tòa tī Ê-lú-sa-lèm ê,
7:16 mā tòa lí tī Ba-bú-lông choân séng só͘ tit tio̍h ê kim-gîn kah jîn-bîn, chè-si só͘ hoaⁿ-hí hiàn ê lé-mi̍h, to̍h-sī in ūi tio̍h Ê-lú-sa-lèm in ê Siōng-tè ê tiān só͘ hoaⁿ-hí hiàn ê.
7:17 " Só͘-í, lí tio̍h tì-ì ēng chiahê kim-gîn khì bé gû-káng-á, mî-iûⁿ-káng, mî-iûⁿ-á kah in ê sò͘-chè, í-ki̍p in ê koàn-tiān, hiàn tī Ê-lú-sa-lèm lín ê Siōng-tè tiān ê tôaⁿ.
7:18 Só͘ chhun lo̍h-.lâi ê kim-gîn, lí kah lí ê hiaⁿ-tī khòaⁿ-chò hó ê, chiū ánne the̍h-khì ēng, lóng tio̍h chiàu lín ê Siōng-tè ê chí-ì.
7:19 Só͘ kau-tài lí chò lí ê Siōng-tè tiān lāi ê lō͘-ēng ê khì-kū, lí tio̍h kau tī Ê-lú-sa-lèm ê Siōng-tè ê bīn-chêng.
7:20 Lín ê Siōng-tè ê tiān nā iáu ū su-iàu siáⁿ-mi̍h, lí só͘ eng-kai tio̍h ēng ê, lí thang tùi ông ê kim-khò͘ the̍h-khì ēng.
7:21 " Góa — Al-ta-siá-su-ta ông pún-sin koh kàng-chiàu hō͘ hô gōa só͘-ū koán kim-khò͘ ê koaⁿ, kóng, ' Thong-ta̍t thiⁿ-téng Siōng-tè ê lu̍t-hoat ê keng-ha̍k kàu-su — chè-si E-chu-la̍h, bô-lūn tùi lín thó siáⁿ-mi̍h, lín tio̍h tì-ì chiàu ánne kiâⁿ;
7:22 kióng-kip i gîn kàu chi̍t pah tha-lan-t, be̍h kàu chi̍t pah kol, chiú kàu chi̍t pah bat, iû kàu chi̍t pah bat, iâm bô hān gia̍h.
7:23 Kiàn-nā thiⁿ-téng ê Siōng-tè só͘ bēng-lēng ê, tio̍h ūi tio̍h thiⁿ-téng ê Siōng-tè ê tiān chim-chiok lâi chò. Ná ē-sái hō͘ siū-khì lîm-kàu ông kah ông ê kiáⁿ ê kok?
7:24 Góa koh bēng-lēng lín, kiàn-nā chè-si, Lē-bī lâng, chhiùⁿ koa ê, kò͘-mn̂g ê, Na-thi-in kah tī Siōng-tè ê tiān chò chhe-ēng ê lâng, m̄ thang siu in ê chìn-kòng, koan-sòe, chîⁿ-niû. '
7:25 " E-chu-la̍h, chiàu lí ê Siōng-tè siúⁿ-sù hō͘ lí ê tì-hūi, siat-li̍p sū-su kah sím-phòaⁿ-koaⁿ, lâi tī-lí hô gōa ê jîn-bîn, to̍h-sī só͘-ū bat lí ê Siōng-tè ê lu̍t-hoat ê, nā-sī hiahê m̄ bat ê, lí tio̍h kā in kà-sī.
7:26 Kiàn-nā bô beh chun-thàn lí ê Siōng-tè ê lu̍t-hoat kah ông ê lu̍t-hoat, chiū tio̍h sió-sim tēng i ê chōe, á-.sī hō͘ i sí, á-.sī chhiong-kun, á-.sī chhau-ka, á-.sī koaiⁿ-kaⁿ. "
7:27 E-chu-la̍h O-ló Siōng-chú
" O-ló lán chó͘-sian ê Siōng-tè — Siōng-chú, in-ūi I hē chit-ê ì-sù tī ông ê sim, ke-thiⁿ êng-kng tī Ê-lú-sa-lèm ê Siōng-tè ê tiān,
7:28 koh hō͘ góa tī ông kah i ê chham-bô͘, í-ki̍p ông it-chhè ū koân-sè ê siú-léng ê bīn-chêng, tit tio̍h un-tián. Siōng-chú — góa ê Siōng-tè ê chhiú pang-chān góa, góa chiū ióng-kám, chū-chi̍p I-su-la-el hiahê thâu-lâng kah góa chò-hóe khí-.lâi. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。