以斯拉記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
6:1 Tiông-sin Hoat-hiān Ko-le-si Hông-tè ê Bēng-lēng
Chiū ánne, Ta-lió-suh ông chhut lēng, lâng chiū khì chhōe tián-chheh ê kim-khò͘, to̍h-sī tī Ba-bú-lông khǹg pó-bu̍t ê só͘-chāi.
6:2 Tī Ek-má-tha ê Ma-tái séng ê kiong lāi, chhōe tio̍h chi̍t pún, hit lāi-bīn kì-chài kóng,
6:3 " Ko-le-si ông goân nî, Ko-le-si ông chhut lēng, koan-hē tī Ê-lú-sa-lèm Siōng-tè ê tiān kóng, tio̍h khí hit keng tiān, thang chò hiàn chè ê só͘-chāi, tē-ki hē hō͘ i ê kian-kò͘, tiān koân la̍k-cha̍p tiú, khoah la̍k-cha̍p tiú,
6:4 ēng tōa chio̍h saⁿ ûn, sin ê chhâ chi̍t ûn, keng-hùi tio̍h khai ông-ka ê.
6:5 Jî-chhiáⁿ Siōng-tè tiān lāi kim-gîn ê khì-kū, to̍h-sī Nep-kat-ne-chal tùi Ê-lú-sa-lèm ê tiān lāi the̍h chhut-.lâi, tòa-lâi Ba-bú-lông ê tio̍h koh hêng i, tòa kàu Ê-lú-sa-lèm ê tiān, kok chiàu goân ūi hē tī Siōng-tè ê tiān. "
6:6 Ta-lió-suh Ông Hā-lēng Kè-sio̍k Kiàn Tiān
" Taⁿ tī hô gōa ê chóng-tok Ta̍t-nái kah Se-tal-bo-che-nái, í-ki̍p lín ê tâng-phōaⁿ, to̍h-sī tòa tī hô gōa ê A-hoal-sa-kái lâng, lín tio̍h lī-khui in,
6:7 m̄ thang chó͘-chí in khí Siōng-tè tiān ê kang, chhut-chāi Iô-tah ê chóng-tok kah Iô-tah ê tiúⁿ-ló, tī goân ūi khí Siōng-chú chit keng tiān.
6:8 Góa koh kàng chí, lín tio̍h án-chóaⁿ kiâⁿ tī Iô-tah ê tiúⁿ-ló, kā in pang-chān lâi khí hit keng Siōng-tè ê tiān, to̍h-sī tio̍h tùi hô gōa ê hiòng-sòe tiong-kan thiu-chhut ông ê gîn hāng, kín hō͘ hiahê lâng chò keng-hùi, bián-tit tam-gō͘.
6:9 In só͘ tio̍h ēng ê gû-káng-á, mî-iûⁿ-káng, mî-iûⁿ-á, chò sio-chè hiàn hō͘ thiⁿ-téng ê Siōng-tè, í-ki̍p sió-be̍h, iâm, chiú, iû, lóng chiàu Ê-lú-sa-lèm ê chè-si só͘ kóng ê, ta̍k ji̍t hō͘ i, m̄ thang sit-gō͘;
6:10 thang hō͘ in hiàn phang-phang ê chè-sū hō͘ thiⁿ-téng ê Siōng-tè, koh tio̍h ūi ông kah ông hiahê kiáⁿ ê oa̍h-miā lâi kî-tó.
6:11 Góa koh kàng chí, nā ū lâng kái-ōaⁿ chit-ê bēng-lēng, chiū beh tùi i ê chhù thiah chi̍t ki êⁿ-á, lâi kí-khí hit-ê lâng, kā i tiàu tī hit téng-bīn, hō͘ i ê chhù ūi tio̍h ánne piàn-chò pùn-sò-tui.
6:12 Nā ū ông kah jîn-bîn tāng chhiú kái-ōaⁿ chit-ê bēng-lēng, húi-hoāi tī Ê-lú-sa-lèm hit keng Siōng-tè ê tiān, goān an-tì I ê miâ tī hia ê Siōng-tè kā in bia̍t-bông. Góa — Ta-lió-suh chhut chit-ê bēng-lēng, tio̍h kóaⁿ-kín chiàu ánne khì kiâⁿ. "
6:13 Hōng-hiàn Sèng-tiān
Chiū ánne, hô gōa ê chóng-tok Ta̍t-nái kah Se-tal-bo-che-nái, í-ki̍p in ê tâng-phōaⁿ, in-ūi Ta-lió-suh ông só͘ chhut ê lēng, chiū kóaⁿ-kín chiàu ánne kiâⁿ.
6:14 Iô-tah ê tiúⁿ-ló in-ūi sian-ti Ha-gái kah It-tó͘ ê sun Cha-kha-lī-a ê sian-ti ōe, chiū khí-chō, lâi heng-thong. In chun-thàn I-su-la-el Siōng-tè ê kài-bēng kah Ko-le-si, Ta-lió-suh, í-ki̍p Phel-siah ông Al-ta-siá-su-ta ê siōng-jū, khí-chō oân-kang.
6:15 Tng Ta-lió-suh ông chē-ūi tē-la̍k nî, A-ta̍t goe̍h chhe-saⁿ, chit-ê tiān chiū khí hó-sè.
6:16 I-su-la-el lâng ê chè-si kah Lē-bī lâng, í-ki̍p kî-tha siū lia̍h tńg-.lâi ê lâng, lóng hoaⁿ-hoaⁿ hí-hí kiâⁿ hiàn Siōng-tè tiān ê lé.
6:17 Kiâⁿ hiàn Siōng-tè tiān ê lé, chiū hiàn gû-káng chi̍t pah chiah, mî-iûⁿ-káng nn̄g pah chiah, mî-iûⁿ-á sì pah chiah. Koh chiàu I-su-la-el chi-cho̍k ê sò͘-gia̍h, hiàn soaⁿ-iûⁿ-káng cha̍p-jī chiah, ūi I-su-la-el jîn-bîn chò sio̍k-chōe-chè.
6:18 Chiū phài chè-si chiàu i ê pan-lia̍t, Lē-bī lâng chiàu i ê chhù-sū, ho̍k-sāi tiàm tī Ê-lú-sa-lèm ê Siōng-tè, sī chiàu Mô͘-se ê chheh só͘ kì-chài ê.
6:19 Pôaⁿ-kòe-cheh
Chiaⁿ-goe̍h cha̍p-sì, siū lia̍h tńg-.lâi ê jîn-bîn siú Pôaⁿ-kòe-cheh.
6:20 Chè-si kah Lē-bī lâng sio-kāng chheng-khì kakī, in lóng chheng-khì, koh ūi tio̍h siū lia̍h tńg-.lâi ê lâng kah in ê hiaⁿ-tī hiahê chè-si, mā ūi kakī thâi Pôaⁿ-kòe-cheh ê iûⁿ-á.
6:21 Tùi siū lia̍h tńg-.lâi ê I-su-la-el lâng kah kakī hun-pia̍t lī-khui chit só͘-chāi ê gōa-pang lâng ê ù-òe, lâi kui óa in, cháu-chhōe Siōng-chú — I-su-la-el ê Siōng-tè ê, lóng lâi chia̍h,
6:22 Hoaⁿ-hoaⁿ hí-hí siú Tû-kàⁿ-cheh chhit ji̍t; in-ūi Siōng-chú hō͘ in hoaⁿ-hí, koh hō͘ A-siul ông ê sim oa̍t tńg-lâi ǹg in, lâi kian-kò͘ in ê chhiú, chò Siōng-tè tiān ê kang, to̍h-sī I-su-la-el ê Siōng-tè ê.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。