以斯拉記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
5:1 Koh-chài Khai-sí Kiàn-tiān ê Kang-chok
Hit sî, ū sian-ti Ha-gái kah It-tó͘ ê sun Cha-kha-lī-a, hōng I-su-la-el Siōng-tè ê miâ, tùi Iô-tah kah Ê-lú-sa-lèm ê Iô-tah lâng kā sian-ti ê ōe thoân hō͘ in.
5:2 Chiū ánne, Sa-la-thi-el ê kiáⁿ Cho-lô-ba-bel kah Io-cha-tak ê kiáⁿ E-siu-ah, lóng khí-lâi tī Ê-lú-sa-lèm tāng-kang khí-chō Siōng-chú ê tiān, ū Siōng-chú ê sian-ti kah in tông-chāi, kā in pang-chān.
5:3 Tong-sî, hô gōa ê chóng-tok Ta̍t-nái kah Se-tal-bo-che-nái í-ki̍p in ê tâng-phōaⁿ, lâi mn̄g kóng, " Siáⁿ lâng chhut lēng hō͘ lín khí chit-ê tiān, chhiâⁿ chit-ê chhiûⁿ? "
5:4 Hiahê lâng chiū mn̄g in kóng, khí chit keng tiān ê lâng kiò siáⁿ-mi̍h miâ?
5:5 Siōng-tè ê ba̍k-chiu teh khòaⁿ-kò͘ Iô-tah ê tiúⁿ-ló, hiahê lâng bô hō͘ in thêng kang, thèng-hāu chit-ê tāichì kàu Ta-lió-suh, tit tio̍h bûn-su lâi hôe-hok chit-ê tāichì.
5:6 Hô-gōa ê chóng-tok Ta̍t-nái kah Se-tal-bo-che-nái, í-ki̍p i ê tâng-phōaⁿ, to̍h-sī tòa tī hô gōa ê A-hoal-sa-kái lâng, chàu Ta-lió-suh ông ê pió-chiuⁿ kì tī ē-té:
5:7 In chàu ông ê pió-chiuⁿ lāi ū kóng, " Goān Ta-lió-suh ông bān sū pêng-an.
5:8 " Ông tio̍h chai, goán khì Iô-tah séng, kàu chì-tōa Siōng-chú ê tiān, chit-ê tiān sī ēng tōa tè chio̍h-thâu khí-chō ê, êⁿ-á chhah-ji̍p chhiûⁿ lāi, chò-kang chin kín, in ê só͘ chò chin heng-thong.
5:9 " Hit sî, goán mn̄g hiahê tiúⁿ-ló, kā in kóng, ' Siáⁿ lâng chhut lēng hō͘ lín khí chit-ê tiān, chhiâⁿ chit-ê chhiûⁿ? '
5:10 Koh mn̄g in ê miâ, beh kì in ê siú-léng ê miâ, thang chàu hō͘ ông chai.
5:11 " In ánne ìn goán kóng, ' Goán sī thiⁿ-tē ê Siōng-tè ê lô͘-po̍k, koh-chài khí chin chē nî chêng só͘ khí ê tiān, to̍h-sī I-su-la-el ê chi̍t ūi tōa kun-ông só͘ khí só͘ chhiâⁿ ê.
5:12 To̍k-to̍k In-ūi goán ê chó͘-sian jiá thiⁿ-téng ê Siōng-chú ê siū-khì, I kā in kau tī Kal-tí-ah lâng, Ba-bú-lông ông Nep-kat-ne-chal ê chhiú, ông chiū thiah-húi chit keng tiān, lia̍h jîn-bîn khì-kàu Ba-bú-lông.
5:13 Tng Ba-bú-lông ông Ko-le-si goân nî, Ko-le-si ông chhut lēng tio̍h khí chit keng Siōng-tè ê tiān.
5:14 Siōng-tè tiān lāi kim-gîn ê khì-kū, to̍h-sī Nep-kat-ne-chal tùi Ê-lú-sa-lèm ê tiān lāi the̍h chhut-.lâi, tòa-khì hē tī Ba-bú-lông ê biō ê, Ko-le-si ông tùi Ba-bú-lông ê biō lāi the̍h chhut-.lâi, kau hō͘ i só͘ siat-li̍p ê chóng-tok, miâ kiò-chò Se-si-ba-chal,
5:15 kā i kóng: ' Tio̍h tòa chiahê khì-kū khì hē tī Ê-lú-sa-lèm ê tiān, mā tio̍h tī i ê goân ūi khí Siōng-tè ê tiān. '
5:16 Chiū ánne, chit-ê Se-si-ba-chal lâi hē Ê-lú-sa-lèm ê Siōng-tè tiān ê tē-ki. Chit keng tiān tùi hit sî kàu taⁿ khí iáu-bōe hó.
5:17 " Taⁿ ông nā lia̍h-chò hó, chhiáⁿ chhâ-khó ông tī Ba-bú-lông ê kok-khò͘, khòaⁿ Ko-le-si ông kó-jiân ū kàng-chiàu tī Ê-lú-sa-lèm khí Siōng-tè hit keng tiān á-bô. Chhiáⁿ ông tī chit-ê tāichì kàng chí lâi kā goán chí-sī. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。