以斯拉記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
4:1 Chó͘-tòng Tiông-kiàn Sèng-tiān
Iô-tah, Biān-iá-mín ê tùi-te̍k thiaⁿ tio̍h hiahê siū lia̍h tńg-.lâi ê lâng, ūi I-su-la-el ê Siōng-tè khí tiān,
4:2 chiū lâi kìⁿ Cho-lô-ba-bel kah cho̍k tiong ê láu-tōa, kā in kóng, " Chhiáⁿ chún goán kah lín chò-hóe khí, in-ūi goán chhōe lín ê Siōng-tè kah lín sio-siâng. Tùi A-siul ông E-sal-ha-tóng chhōa goán chiūⁿ-lâi chit-ê tē í-āu, goán tiāⁿtiāⁿ hiàn chè hō͘ Siōng-tè. "
4:3 Chóng-.sī, Cho-lô-ba-bel, E-siu-ah kah kî-tha I-su-la-el cho̍k tiong ê láu-tōa, kā in kóng, " Goán beh khí goán ê Siōng-tè ê tiān, lín bô hūn, goán kakī beh ūi Siōng-chú — I-su-la-el ê Siōng-tè hia̍p-le̍k khí-chō, sī chiàu Phel-siah ông — Ko-le-si ông só͘ bēng-lēng goán ê. "
4:4 Chiū ánne, hit só͘-chāi ê jîn-bîn hō͘ Iô-tah lâng chhiú nńg lo̍h-.khì, tī in khí-chō ê sî lâi kā in kiáu-jiáu.
4:5 Tùi Phel-siah ông Ko-le-si ê nî-kan kàu Phel-siah ông Ta-lió-suh chē-ūi ê sî, chhiàⁿ chi̍t-kóa chham-bô͘ lâi kā in chó͘-chí, beh pāi-hoāi in ê kè-ōe.
4:6 Chó͘-tòng Tiông-kiàn Ê-lú-sa-lèm
Tī A-ha-sui-ló͘ chò ông chē-ūi ê khí-thâu, tùi-te̍k siá chàu-chiuⁿ kò tòa tī Iô-tah kah Ê-lú-sa-lèm ê jîn-bîn.
4:7 Koh tī Al-ta-siá-su-ta ê nî-kan, Pí-si-lân, Bí-te̍k-lī-ta̍t, Tha-pia̍t kah in ê tóng, chiūⁿ-pió chàu Phel-siah ông Al-ta-siá-su-ta. Chit-ê pió sī ēng A-lâm ê bûn-jī siá ê, hoan e̍k-chò A-lâm ê khiuⁿ-kháu.
4:8 Chóng-tok Le-hóm kah su-kì Sim-sia-i beh kò Ê-lú-sa-lèm lâng, mā chiūⁿ-pió chàu Al-ta-siá-su-ta ông, hit-ê pió chhin-chhiūⁿ ánne:
4:9 Chóng-tok Le-hóm, su-kì Sim-sia-i kah kî-tha ê tâng-phōaⁿ Tí-nah lâng, A-hoat-sat-thê-ka lâng, Thal-pe-lái lâng, Al-pak-sat lâng, Al-ke-boeh lâng, Ba-bú-lông lâng, Siu-san-ki lâng, Da-ha-bah lâng, Ê-lám lâng
4:10 Kah tōa chun-kùi ê O-su-na-pal só͘ chhian-sóa kî-tha ê jîn-bîn an-tì tī Sa-má-lī-a ê siâⁿ kah tōa hô gōa kî-tha ê jîn-bîn, lóng ánne siá.
4:11 Hitê chàu Al-ta-siá-su-ta ông pió-chiuⁿ ê chhau-kó kì tī ē-bīn: Lí ê lô͘-po̍k hô gōa chiahê lâng ánne siá:
4:12 Ông tio̍h chai, tùi lí hia lâi-kàu goán chia ê Iô-tah lâng, í-keng tńg-kàu Ê-lú-sa-lèm, koh khí chit-ê chō-hoán koh pháiⁿ ê siâⁿ, í-keng khí siâⁿ chhiûⁿ, hē tē-ki.
4:13 Taⁿ ông tio̍h chai, in nā khí chit-ê siâⁿ, siâⁿ chhiûⁿ khí hó, in chiū lóng m̄-la̍p chìn-kòng, koan-sòe, chîⁿ-niû, kàu bóe ông ē siū sún-sit.
4:14 In-ūi goán chia̍h ông-kiong ê iâm, bô eng-kai khòaⁿ ông siū khui-sún, só͘-í, chiūⁿ-pió chàu ông.
4:15 Chhiáⁿ chhâ-khó chó͘-sian ê kì-lio̍k, tī kì-lio̍k ē chhōe-.tio̍h, chiū chai chit-ê siâⁿ sī chō-hoán ê siâⁿ, ē hāi tio̍h lia̍t ông kah ta̍k séng; chū chá í-lâi, hit tiong-kan tiāⁿtiāⁿ ū chō-hoán ê tāichì, chit-ê siâⁿ siū húi-hoāi to̍h-sī tùi chit-ê iân-kò͘.
4:16 Goán kín-sīn chàu hō͘ ông chai, chit-ê siâⁿ nā koh khí-chō, siâⁿ chhiûⁿ khí hó, chiū ánne, hô gōa ê tē chiū bô lí ê hūn. "
4:17 Hit sî, ông chiū chhut jū-chí hō͘ chóng-tok Le-hóm, su-kì Sim-sia-i kah in kî-tha ê tâng-phōaⁿ, to̍h-sī tòa tī Sa-má-lī-a kah hô gōa kî-tha ê lâng, kóng, " Goān lín pêng-an!
4:18 Lín só͘ siōng hō͘ goán ê pió, góa í-keng ū tha̍k chheng-chhó.
4:19 Góa í-keng chhut bēng-lēng, chhâ-khó liáu chiū chai chit-ê siâⁿ chū chá í-lâi chin-chiàⁿ pōe-poān lia̍t ông, kî-tiong tiāⁿtiāⁿ ū bô͘-hoán pōe-ge̍k ê tāichì.
4:20 Í-chêng Ê-lú-sa-lèm le̍k-lâi ū tōa kun-ông thóng-hat hô gōa choân tē, chìn-kòng, koan-sòe, chîⁿ-niû lóng la̍p hō͘ in.
4:21 Taⁿ lín tio̍h hoat bēng-lēng hō͘ hiahê lâng thêng kang, bô koh khí chit-ê siâⁿ, thèng-hāu góa kàng chí.
4:22 Lín tio̍h kín-sīn, m̄ thang iân-chhiân, ná ē iông-ín chit-ê siong-hāi khah tāng, tì-sú lia̍t ông siū khui-sún? "
4:23 Al-ta-siá-su-ta ông ê siōng-jū, tī Le-hóm kah su-kì Sim-sia-i, kah in ê tâng-phōaⁿ ê bīn-chêng tha̍k, in chiū kóaⁿ-kín khì Ê-lú-sa-lèm kìⁿ Iô-tah lâng, ēng sè-le̍k kiông-pek in thêng kang.
4:24 Chiū ánne, Ê-lú-sa-lèm ê Siōng-chú tiān ê kang-têng chiū thêng-chí, thêng kàu Phel-siah ông Ta-lió-suh chē-ūi ê tē-jī nî.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。