以斯拉記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
3:1 Tiông-sin Khai-sí Kèng-pài
Kàu tē-chhit goe̍h, I-su-la-el lâng í-keng tòa tī in hiahê siâⁿ; hit sî, jîn-bîn tâng-sim chi̍t ì chū-chi̍p tī Ê-lú-sa-lèm.
3:2 Io-cha-tak ê kiáⁿ E-siu-ah kah i ê hiaⁿ-tī hiahê chè-si, í-ki̍p Sa-la-thi-el ê kiáⁿ Cho-lô-ba-bel kah i ê hiaⁿ-tī, lóng khí-lâi khí I-su-la-el Siōng-tè ê tôaⁿ, thang hiàn sio-chè tī hit téng-bīn, chiàu Siōng-tè ê lô͘-po̍k Mô͘-se tī lu̍t-hoat ê chheh só͘ kì-chài ê.
3:3 In khí tôaⁿ tī pún-lâi kū ê só͘-chāi, in-ūi kiaⁿ hiahê kok ê jîn-bîn koh tī hit téng-bīn hiàn sio-chè hō͘ Siōng-chú, to̍h-sī chá-khí sî kah ê-hng ê sio-chè.
3:4 In mā siú Tòa-pêⁿ-cheh, chiàu só͘ kì-chài ê, koh hiàn ta̍k ji̍t ê sio-chè, chiàu in ê sò͘-gia̍h, chiàu tiāⁿ tio̍h ê lē, chhin-chhiūⁿ ta̍k ji̍t só͘ eng-kai chò ê.
3:5 Jiân-āu, hiàn chiàu-siông ê sio-chè kah múi goe̍h chhe-it ê chè, í-ki̍p Siōng-chú hun-pia̍t chò sèng ê cheh-kî ê chè, koh hiàn ta̍k lâng kam-sim hoaⁿ-hí hiàn ê chè hō͘ Siōng-chú.
3:6 Tùi chhit-goe̍h chhe-it khí, in hiàn sio-chè hō͘ Siōng-chú. Chóng-.sī, iáu-bōe hē Siōng-chú tiān ê tē-ki.
3:7 Khai-sí Tiông-kiàn Sèng-tiān
In koh ēng gîn hō͘ chio̍h-chhiūⁿ, ba̍k-chhiūⁿ, ēng lim-chia̍h ê mi̍h kah iû hō͘ Si-tòng lâng, Tu-lô lâng, hō͘ in kā pek-hiuⁿ chhiū tùi Le-ba-nòng ūn kàu hái lâi-kàu Io̍p-pe, sī chiàu Phel-siah ông Ko-le-si só͘ ín-chún ê.
3:8 In kàu Ê-lú-sa-lèm Siōng-chú ê tiān hia, tē-jī nî jī-goe̍h, Sa-la-thi-el ê kiáⁿ Cho-lô-ba-bel, Io-cha-tak ê kiáⁿ E-siu-ah kah kî-tha ê hiaⁿ-tī, to̍h-sī chè-si kah Lē-bī lâng, í-ki̍p só͘-ū tùi siū lia̍h ê tiong-kan tńg-lâi Ê-lú-sa-lèm ê lâng, lóng tāng chhiú, phài jī-cha̍p hòe í-siōng ê Lē-bī lâng chò tok-kang, lâi khí Siōng-chú ê tiān.
3:9 Chiū ánne, E-siu-ah kah i ê kiáⁿ kah hiaⁿ-tī, Kat-mi-el kah i ê kiáⁿ, Iô-tah ê kiáⁿ-sun kah He-ná-tat ê kiáⁿ kah in ê kiáⁿ, in ê hiaⁿ-tī Lē-bī lâng, lóng khí-.lâi, kàm-tok hiahê tī Siōng-chú ê tiān chò-kang ê lâng.
3:10 Khí chhù sai-hū hē Siōng-chú tiān ê tē-ki ê sî, chè-si chhēng lé-ho̍k, gia̍h kó͘-chhoe. A-sah ê kiáⁿ-sun Lē-bī lâng the̍h nâ-poa̍h, lóng khiā-teh oló Siōng-chú, chiàu I-su-la-el ông Ta-bi̍t tiāⁿ tio̍h ê lē.
3:11 In ū ê chhiùⁿ ū ê hô, oló kám-siā Siōng-chú, kóng, " In-ūi I sī hó, I éng-oán si chû-ài hō͘ I-su-la-el. " In oló Siōng-chú ê sî, chèng lâng tōa-siaⁿ hoah, in-ūi Siōng-chú tiān ê tē-ki í-keng hē hó-sè.
3:12 Chóng-.sī, ū chin chē chè-si, Lē-bī lâng kah cho̍k tiong ê láu-tōa, to̍h-sī bat khòaⁿ tio̍h í-chêng ê tiān hiahê lāu lâng, taⁿ chhin-ba̍k khòaⁿ tio̍h hē chit keng tiān ê tē-ki, chiū tōa-siaⁿ thî-khàu, mā ū chin chē lâng ūi tio̍h hoaⁿ-hí tōa-siaⁿ hoah.
3:13 Tì-sú jîn-bîn bē tàng hun-pia̍t hoaⁿ-hí hoah ê siaⁿ kah jîn-bîn thî-khàu ê siaⁿ; in-ūi jîn-bîn tōa-siaⁿ hoah ê siaⁿ, hō͘ hit-ê siaⁿ thoân kàu chin hn̄g.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。