歷代志下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
36:1 Io-si-iah kah E-hoa-há-chuh
( LOH 23: 30-35)
Jîn-bîn kā Io-si-iah ê kiáⁿ E-hoa-há-chuh siat-li̍p chò ông, tī Ê-lú-sa-lèm sòa-chiap i ê lāu-pē.
36:2 E-hoa-há-chuh chē-ūi ê sî jī-cha̍p saⁿ hòe, tī Ê-lú-sa-lèm chò ông keng-kòe saⁿ goe̍h-ji̍t.
36:3 Ai-gi̍p ông tī Ê-lú-sa-lèm kā i hòe-tiāu, koh hoa̍t hit kok chìn-kòng gîn chi̍t pah tha-lan-t kah kim chi̍t tha-lan-t.
36:4 Ai-gi̍p ông siat-li̍p i ê a-hiaⁿ E-li-a-kim chò Iô-tah kah Ê-lú-sa-lèm ê ông, kā i ê miâ ōaⁿ-chò E-hō͘-iá-kim. Ne-ko chhōa i ê sió-tī E-hoa-há-chuh lâi-kàu Ai-gi̍p.
36:5 Iô-tah ê E-hō͘-iá-kim Ông
( LOH 23: 36-24: 7)
E-hō͘-iá-kim chē-ūi ê sî jī-cha̍p gō͘ hòe, tī Ê-lú-sa-lèm chò ông kiōng cha̍p-it nî. I kiâⁿ Siōng-chú — i ê Siōng-tè só͘ khòaⁿ-chò pháiⁿ ê tāichì.
36:6 Ba-bú-lông ông Nep-kat-ne-chal chiū lâi kā i kong-kek, ēng tâng-liān kā i pa̍k khí-.lâi, beh kā i ah-lâi Ba-bú-lông.
36:7 Nep-kat-ne-chal koh kā Siōng-chú tiān lāi ê khì-kū tòa kàu Ba-bú-lông, hē tī Ba-bú-lông i ê biō lāi.
36:8 E-hō͘-iá-kim kî-tha ê tāichì kah i só͘ kiâⁿ khó-ò͘ⁿ ê tāichì, í-ki̍p i ê put-chèng, lóng kì tī I-su-la-el kah Iô-tah lia̍t ông ê kì-lio̍k tiong. I ê kiáⁿ E-hō͘-iá-kin sòa-chiap i chò ông.
36:9 Iô-tah Ông E-hō͘-iá-kin
( LOH 24: 8-17)
E-hō͘-iá-kin chē-ūi ê sî peh hòe, tī Ê-lú-sa-lèm chò ông saⁿ goe̍h-ji̍t koh cha̍p kang, i kiâⁿ Siōng-chú só͘ khòaⁿ-chò pháiⁿ ê tāichì.
36:10 Keh tńg nî, Nep-kat-ne-chal chhe lâng tòa i kah Siōng-chú tiān lāi hiahê pó-pòe ê khì-kū lâi-kàu Ba-bú-lông, chiū siat-li̍p i ê a-chek Che-ti-kiah chò Iô-tah kah Ê-lú-sa-lèm ê ông.
36:11 Iô-tah Ông Che-ti-kiah
( LOH 24: 18-20; ILM 52: 1-3)
Che-ti-kiah chē-ūi ê sî jī-cha̍p it hòe, tī Ê-lú-sa-lèm chò ông kiōng cha̍p-it nî.
36:12 I kiâⁿ Siōng-chú — i ê Siōng-tè só͘ khòaⁿ-chò pháiⁿ ê tāichì. Sian-ti I-é-lí-miah kā Siōng-chú só͘ hoan-hù ê thoân hō͘ i, tī Siōng-chú ê bīn-chêng, i iû-goân bô kakī khiam-pi.
36:13 Ê-lú-sa-lèm Hām-lo̍h
( LOH 25: 1-21; ILM 52: 3-11)
Nep-kat-ne-chal ông bat kah i kí Siōng-tè lâi chiùchōa, chóng-.sī, i pōe-poān, ngē i ê ām-kún, kò͘-chi̍p i ê sim, m̄ kui-sūn Siōng-chú — I-su-la-el ê Siōng-tè.
36:14 Jî-chhiáⁿ hiahê chè-si ê thâu-ba̍k kah jîn-bîn mā hoān tōa chōe, o̍h gōa-pang só͘-ū khó-ò͘ⁿ ê tāichì, tī Ê-lú-sa-lèm hun-pia̍t chò sèng ê tiān òe lahsap Siōng-chú.
36:15 Siōng-chú — in chó͘-sian ê Siōng-tè thok I hiahê sù-chiá, chhe in khì jîn-bîn hia, sī thàu-chá to̍h khí-lâi chhe i, in-ūi I liân-bín I ê chú-bîn kah I tòa ê só͘-chāi.
36:16 Chóng-.sī, in thí-chhiò Siōng-tè ê sù-chiá, biáu-sī I ê ōe, khau-sé I ê sian-ti, it-ti̍t kàu Siōng-chú tùi I ê chú-bîn tōa siū-khì, bô hoat-tō͘ thang i-tī.
36:17 Só͘-í, Siōng-tè chhōa Kal-tí-ah lâng ê ông lâi kā in kong-kek, tī in sèng-só͘ ê chhù ēng to kā in ê siàu-liân lâng thâi-sí, bô liân-bín in siàu-liân ê chapo͘ teng, á-.sī chāi-sek-lí, á-.sī lāu kah pe̍h thâu-mn̂g ê. Siōng-tè kā in lóng kau tī Kal-tí-ah lâng ê ông ê chhiú.
36:18 I koh kā Siōng-chú ê tiān lāi ê tōa-sè khì-kū kah châi-pó, í-ki̍p ông kah hiahê siú-léng ê châi-pó, lóng tòa lâi-kàu Ba-bú-lông.
36:19 In sio Siōng-tè ê chhù, thiah-húi Ê-lú-sa-lèm ê siâⁿ chhiûⁿ, ēng hóe sio hiahê kiong-tiān, húi-hoāi hiahê pó-pòe ê khì-kū.
36:20 Kiàn-nā thoat-lī to-kiàm ê, i kā in tòa kàu Ba-bú-lông, hō͘ in chò i kah i ê kiáⁿ-sun ê lô͘-po̍k, kàu Phel-siah kok heng-khí ûi-chí.
36:21 Che sī èng-giām Siōng-chú thok I-é-lí-miah só͘ kóng ê ōe: thèng-hāu thó͘-tē hióng-siū i ê an-hioh, in-ūi i pha-hng ê sî siú an-hioh, kàu móa chhit-cha̍p nî.
36:22 Ko-le-si Ông Hā-lēng Iô-tah Lâng Hôe-kok
(ECL 1: 1-4)
Tng Phel-siah ông Ko-le-si goân nî, in-ūi beh èng-giām Siōng-chú thok I-é-lí-miah só͘ kóng ê ōe, Siōng-chú chiū kek-tōng Phel-siah ông Ko-le-si ê sim, hō͘ i soan-pò͘ tī choân kok, koh siá bēng-lēng, kóng,
36:23 " Phel-siah ông Ko-le-si ánne kóng: Thiⁿ téng ê Siōng-tè — Siōng-chú kā thian-hā ê bān-kok siúⁿ-sù hō͘ góa, koh bēng-lēng góa tī Iô-tah ê Ê-lú-sa-lèm kā I khí tiān. Lín tiong-kan kiàn-nā chò I ê chú-bîn ê, thang chiūⁿ-.khì, goān Siōng-chú — i ê Siōng-tè kah i tông-chāi. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。