歷代志下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
33:1 Iô-tah Ông Má-ná-se
( LOH 21: 1-9)
Má-ná-se chē-ūi ê sî cha̍p-jī hòe, tī Ê-lú-sa-lèm chò ông kiōng gō͘-cha̍p gō͘ nî.
33:2 I kiâⁿ Siōng-chú só͘ khòaⁿ-chò pháiⁿ ê tāichì, o̍h gōa-pang lâng só͘ kiâⁿ khó-ò͘ⁿ ê tāichì, to̍h-sī Siōng-chú tī I-su-la-el ê bīn-chêng só͘ kóaⁿ-chhut ê.
33:3 In-ūi i ê lāu-pē Hi-che-kia só͘ húi-hoāi ê soaⁿ-thâu tôaⁿ i koh khí khí-.lâi, koh ūi hiahê Ba-al khí tôaⁿ, chò A-si-tha-lot, koh kèng-pài thiⁿ-téng ê bān-siōng lâi kā i ho̍k-sāi.
33:4 Tī Siōng-chú ê tiān lāi khí kúi-nā-ê tôaⁿ, Siōng-chú bat kí chit-ê tiān kóng, " Góa ê miâ ē éng-oán tī Ê-lú-sa-lèm. "
33:5 I tī Siōng-chú ê tiān ê nn̄g-ê īⁿ lāi, ūi tio̍h thiⁿ-téng ê bān-siōng khí tôaⁿ.
33:6 Koh tī Biān-hin-nóm ê soaⁿ-kok, hō͘ i ê kiáⁿ-jî keng-kòe hóe, koh khòaⁿ tiāu-thâu, ēng hoat-su̍t, si bû-su̍t, ēng thiàu-tâng ê, chhiáⁿ sai-kong, kiâⁿ chin chē Siōng-chú só͘ khòaⁿ-chò pháiⁿ ê tāichì, kek I siū-khì.
33:7 Koh tī Siōng-chú ê tiān lāi, chhāi i só͘ chō tiau-khek ê siōng, chit keng tiān sī Siōng-chú bat tùi Ta-bi̍t kah i ê kiáⁿ Só͘-lô-móng kí i lâi kóng, " Chit keng tiān kah Ê-lú-sa-lèm to̍h-sī Góa tī I-su-la-el chèng chi-cho̍k tiong-kan só͘ kéng ê, Góa beh an-tì Góa ê miâ tī hia, ti̍t-kàu éng-oán.
33:8 I-su-la-el lâng nā chip-siú lâi kiâⁿ Góa it-chhè só͘ bēng-lēng in ê, to̍h-sī Góa thok Mô͘-se só͘ thoân it-chhè ê hoat-tō͘, lu̍t-lē kah lé-gî, Góa chiū bô koh î-sóa in ê kha, lâi lī-khui Góa só͘ tiāⁿ tio̍h hō͘ lín chó͘-sian ê tē. "
33:9 Má-ná-se bê-he̍k tòa tī Iô-tah kah Ê-lú-sa-lèm ê jîn-bîn, tì-sú in só͘ kiâⁿ pháiⁿ pí Siōng-chú tī I-su-la-el lâng ê bīn-chêng só͘ bia̍t ê lia̍t kok, koh khah siong-tiōng.
33:10 Má-ná-se Hóe-kái
Siōng-chú hoan-hù Má-ná-se kah i ê jîn-bîn, chóng-.sī, in bô beh thiaⁿ.
33:11 Só͘-í, Siōng-chú hō͘ A-siul ông ê kun-tiúⁿ lâi kā in kong-kek, ēng kau-á kau tio̍h Má-ná-se, ēng tâng-liān kā i pa̍k khí-.lâi, ah kàu Ba-bú-lông.
33:12 I tī hoān-lān ê sî, chiū khún-kiû Siōng-chú — i ê Siōng-tè, koh tī i ê chó͘-sian ê Siōng-tè ê bīn-chêng hui-siông khiam-pi.
33:13 I kiû-kiò Siōng-tè, Siōng-chú chún i só͘ kiû, thiaⁿ i ê kî-tó, hō͘ i tńg-lâi Ê-lú-sa-lèm, iû-goân chē i ê kok-ūi, Má-ná-se chiah chai Siōng-chú sī Siōng-tè.
33:14 Chit sî liáu-āu, Má-ná-se tī Ta-bi̍t ê siâⁿ gōa khí chhiûⁿ, tī Gi-hóng ê sai pêng, tī soaⁿ-kok lāi, kàu hî-mn̂g ê mn̂g-kháu, ûi-se̍h O͘-phoe-l, chhiûⁿ khí chin koân, koh siat-li̍p kun-tiúⁿ tī Iô-tah hiahê kian-kò͘ ê siâⁿ lāi.
33:15 Koh tùi Siōng-chú ê tiān tû-khì hiahê gōa-pang ê sîn-bêng kah ngó͘-siōng, koh tī Siōng-chú tiān ê soaⁿ kah Ê-lú-sa-lèm só͘ khí hiahê tôaⁿ, lóng hiat-khì siâⁿ gōa.
33:16 Koh khí Siōng-chú ê chè-tôaⁿ, tī tôaⁿ téng hiàn siā-un-chè kah kám-siā-chè, bēng-lēng Iô-tah lâng ho̍k-sāi Siōng-chú — I-su-la-el ê Siōng-tè.
33:17 Chóng-.sī, jîn-bîn iû-goân tī soaⁿ-thâu tôaⁿ hiàn chè, to̍k-to̍k hiàn hō͘ Siōng-chú — i ê Siōng-tè niā-niā.
33:18 Má-ná-se Thóng-tī ê Kiat-sok
( LOH 21: 17-18)
Má-ná-se kî-tha ê tāichì kah i tùi Siōng-chú kî-tó ê ōe, í-ki̍p sian-kiàn hōng Siōng-chú — I-su-la-el ê Siōng-tè ê miâ tùi i kóng hiahê ōe, lóng kì tī I-su-la-el chiahê ông ê kì-lio̍k.
33:19 I ê kî-tó kah Siōng-chú án-chóaⁿ ín-chún i, i bōe khiam-pi í-chêng ê chōe-kò kah kòe-sit, í-ki̍p khí soaⁿ-thâu tôaⁿ, siat-li̍p hiahê A-si-lah kah tiau-khek ngó͘-siōng hiahê só͘-chāi, lóng kì tī Ho-chái ê sú-kì.
33:20 Má-ná-se kah i ê chó͘-sian tâng khùn, bâi-chòng tī kakī ê kiong lāi. I ê kiáⁿ Am-móng sòa-chiap i chò ông.
33:21 Iô-tah Ông Am-móng
( LOH 21: 19-26)
Am-móng chē-ūi ê sî jī-cha̍p jī hòe, tī Ê-lú-sa-lèm chò ông keng-kòe nn̄g nî.
33:22 I kiâⁿ Siōng-chú só͘ khòaⁿ-chò pháiⁿ ê tāichì, o̍h i ê lāu-pē Má-ná-se só͘ chò ê, Am-móng chè-sū i ê lāu-pē Má-ná-se só͘ chō hiahê tiau-khek ê ngó͘-siōng, lâi kā i ho̍k-sāi.
33:23 Bô tī Siōng-chú ê bīn-chêng kakī khiam-pi, chhin-chhiūⁿ i ê lāu-pē Má-ná-se ê kakī khiam-pi. Chit-ê Am-móng ná lâi ná hoān chōe.
33:24 I ê jîn-sîn pōe-poān i, tī ông-kiong lāi kā i thâi-sí.
33:25 Chóng-.sī, jîn-bîn thâi-sí hiahê pōe-poān Am-móng ông ê lâng, jîn-bîn chiū siat-li̍p i ê kiáⁿ Io-si-iah sòa-chiap i chò ông.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。