歷代志下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
30:1 Chún-pī Kòe Pôaⁿ-kòe-cheh
Hi-che-kia chhe lâng kàu I-su-la-el kah Iô-tah choân tē, koh siá phoe hō͘ E-hu-laim kah Má-ná-se, ài in lâi Ê-lú-sa-lèm Siōng-chú ê tiān, siú Pôaⁿ-kòe-cheh ho̍k-sāi Siōng-chú — I-su-la-el ê Siōng-tè.
30:2 In-ūi ông kah i ê siú-léng, í-ki̍p tī Ê-lú-sa-lèm ê hōe-chiòng, í-keng chò-hóe gī-lūn koat-tēng, beh tī jī-.goe̍h siú Pôaⁿ-kòe-cheh.
30:3 Hit sî, in bē tàng siú cheh, in-ūi kakī chheng-khì ê chè-si iáu bô kàu-gia̍h, jîn-bîn mā bô chū-chi̍p lâi tī Ê-lú-sa-lèm.
30:4 Ông kah hōe-chiòng lóng khòaⁿ chit-ê tāichì chò hó.
30:5 Chiū tiāⁿ tio̍h bēng-lēng, soan-pò͘ tī I-su-la-el choân tē, tùi Bel-sí-bah kàu Tàn, hō͘ in lóng lâi tī Ê-lú-sa-lèm siú Pôaⁿ-kòe-cheh, ho̍k-sāi Siōng-chú — I-su-la-el ê Siōng-tè, in-ūi jîn-bîn pêng-sî bô chin chē lâng chiàu só͘ siá ê kui-lē lâi chun-siú.
30:6 Cháu bûn-su ê tòa ông kah i hiahê siú-léng ê phoe, piàn kiâⁿ I-su-la-el kah Iô-tah tē, chiàu ông ê bēng-lēng, kóng, " I-su-la-el lâng, lín tio̍h koh kui-ǹg A-bu-la-hàm, Í-sak, I-su-la-el ê Siōng-tè — Siōng-chú, I chiū ē kui-ǹg lín chiahê thoat-lī A-siul hiahê ông ê chhiú só͘ chhun lo̍h-.lâi ê jîn-bîn.
30:7 Lín m̄ thang chhin-chhiūⁿ lín ê chó͘-sian kah lín ê hiaⁿ-tī, in pōe-ge̍k Siōng-chú — in chó͘-sian ê Siōng-tè, tì-sú I hō͘ in tú tio̍h bia̍t-bông, chhin-chhiūⁿ lín só͘ khòaⁿ-.tio̍h ê.
30:8 Taⁿ m̄ thang chhin-chhiūⁿ lín ê chó͘-sian ánne ngē ām-kún, tio̍h hiàn kakī hō͘ Siōng-chú, ji̍p-khì I ê sèng-só͘, to̍h-sī I éng-oán hun-pia̍t chò sèng ê, koh tio̍h ho̍k-sāi Siōng-chú — lín ê Siōng-tè, thang hō͘ I ê tōa siū-khì oa̍t-tńg lī-khui lín.
30:9 In-ūi lín nā kui-ǹg Siōng-chú, lín ê hiaⁿ-tī kah lín ê kiáⁿ-jî chiū ē tī lia̍h in ê lâng ê bīn-chêng tit tio̍h liân-bín, thang koh tńg-lâi chit só͘-chāi, in-ūi Siōng-chú — lín ê Siōng-tè sī chû-pi koh liân-bín ê. Lín nā kui-ǹg I, I it-tēng bē oa̍t I ê bīn m̄-khòaⁿ lín. "
30:10 Cháu bûn-su ê chi̍t siâⁿ kòe chi̍t siâⁿ, piàn kiâⁿ E-hu-laim, Má-ná-se kàu Che-bú-lông, m̄ koh, hiahê lâng kā in thí-chhiò, kā in khau-sé.
30:11 Chóng-.sī, A-sel, Má-ná-se, Che-bú-lông ê tiong-kan, mā ū lâng kakī khiam-pi, lâi-kàu Ê-lú-sa-lèm.
30:12 Siōng-chú mā kám-tōng Iô-tah lâng, hō͘ in chi̍t-sim chun-thàn ông kah hiahê siú-léng, chiàu Siōng-chú ê ōe só͘ chhut ê bēng-lēng.
30:13 Kòe Pôaⁿ-kòe-cheh
Jī-.goe̍h, ū chin chē lâng chū-chi̍p tī Ê-lú-sa-lèm, chiâⁿ-chò chin tōa ê hōe, beh siú Tû-kàⁿ-cheh.
30:14 In khí-.lâi, choân-pō͘ tû-khì Ê-lú-sa-lèm só͘-ū ê tôaⁿ kah sio hiuⁿ ê tôaⁿ, hiat tī Kit-lông khe.
30:15 Jī-goe̍h cha̍p-sì, thâi Pôaⁿ-kòe-cheh ê iûⁿ-á, chè-si kah Lē-bī lâng kakī kám-kak kiàn-siàu, chiū chheng-khì kakī, tòa sio-chè lâi-kàu Siōng-chú ê tiān.
30:16 Chiàu Siōng-tè ê lô͘-po̍k Mô͘-se ê lu̍t-hoat, chiàu lē ta̍k lâng khiā i ê ūi, chè-si kā in tùi Lē-bī lâng ê chhiú chiap hoeh lâi hiù.
30:17 Hōe tiong ū chin chē lâng bô chheng-khì kakī, só͘-í, thok Lē-bī lâng thè só͘-ū bô chheng-khì ê lâng thâi Pôaⁿ-kòe-cheh ê iûⁿ-á, hō͘ in tī Siōng-chú ê bīn-chêng chiâⁿ-chò chheng-khì.
30:18 In-ūi E-hu-laim, Má-ná-se, It-sa-kal kah Che-bú-lông, ū chin chē lâng bô chheng-khì kakī, chóng-.sī, in mā chia̍h Pôaⁿ-kòe-cheh, bô ha̍h só͘ kì-chài ê lē.
30:19 In-ūi Hi-che-kia thè in kî-tó, kóng, " Kiàn-nā ū choa̍t-tùi ê sim lâi cháu-chhōe Siōng-chú, to̍h-sī Siōng-chú in chó͘-sian ê Siōng-tè, sûi-jiân bô chiàu sèng-só͘ chheng-khì ê lé-gî kakī chheng-khì, kiû chì hó ê Siōng-chú mā kā in sià-bián. "
30:20 Siōng-chú thiaⁿ Hi-che-kia ê kî-tó, chiū i hó jîn-bîn.
30:21 Tòa tī Ê-lú-sa-lèm ê I-su-la-el lâng tōa-tōa hoaⁿ-hí, siú Tû-kàⁿ-cheh chhit kang. Lē-bī lâng kah chè-si ji̍t-ji̍t oló Siōng-chú, ēng hiáng-liāng ê ga̍k-khì oló Siōng-chú.
30:22 Koh-chài Kòe Cheh
Hi-che-kia an-ùi só͘-ū gâu ho̍k-sāi Siōng-chú ê Lē-bī lâng. Chiū ánne, kûn-chiòng chia̍h cheh-iân chhit kang, hiàn siā-un-chè, koh tī Siōng-chú—in chó͘-sian ê Siōng-tè ê bīn-chêng jīn chōe.
30:23 Choân hōe-chiòng gī-lūn beh koh siú cheh chhit kang. Chiū ánne, hoaⁿ-hí koh siú cheh chhit kang.
30:24 In-ūi Iô-tah ông Hi-che-kia sàng hōe-chiòng gû-káng chi̍t chheng chiah, iûⁿ chhit chheng chiah chò chè-mi̍h. Chèng siú-léng mā sàng hōe-chiòng gû-káng chi̍t chheng chiah, iûⁿ chi̍t bān chiah, koh ū chin chē chè-si kakī chheng-khì.
30:25 Iô-tah hōe-chiòng kah chè-si Lē-bī lâng, í-ki̍p hiahê tùi I-su-la-el lâi ê hōe-chiòng, koh ū hiahê tùi I-su-la-el tē lâi ê chhut-gōa lâng, kah tòa tī Iô-tah ê chhut-gōa lâng, lóng hoaⁿ-hí khoài-lo̍k.
30:26 Chiū ánne, tī Ê-lú-sa-lèm tōa hoaⁿ-hí, in-ūi tùi I-su-la-el ông Ta-bi̍t ê kiáⁿ Só͘-lô-móng ê sî, tī Ê-lú-sa-lèm m̄ bat ū kòe ánne.
30:27 Hit sî, chè-si Lē-bī lâng khí-.lâi, kā jîn-bîn chiok-hok. In ê siaⁿ ū hō͘ Siōng-chú thiaⁿ-.tio̍h, in ê kî-tó thàu kàu I tòa ê sèng-só͘, kàu tī thiⁿ-.ni̍h.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。