歷代志下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
29:1 Iô-tah Ông Hi-che-kia
( LOH 18: 1-3)
Hi-che-kia chē-ūi ê sî jī-cha̍p gō͘ hòe, tī Ê-lú-sa-lèm chò ông kiōng jī-cha̍p káu nî. I ê lāu-bú ê miâ kiò-chò A-bi-iah, sī Che-ka-lí-ah ê chabó͘ kiáⁿ.
29:2 I kiâⁿ Siōng-chú só͘ khòaⁿ-chò hó ê tāichì, chiàu i ê chó͘-sian Ta-bi̍t só͘ kiâⁿ ê it-chhè.
29:3 Chheng-khì Sèng-tiān
Tī goân nî chiaⁿ-.goe̍h, khui Siōng-chú tiān ê mn̂g, kā i siu-lí.
29:4 I tiàu hiahê chè-si kah Lē-bī lâng lâi, chū-chi̍p tī tang pêng khui-khoah ê só͘-chāi,
29:5 Kā in kóng, " Lē-bī lâng, lín tio̍h thiaⁿ góa kóng, taⁿ lín tio̍h chheng-khì kakī, mā tio̍h chheng-khì Siōng-chú — lín chó͘-sian ê Siōng-tè ê tiān, tùi sèng-só͘ kā hiahê ù-òe ê piàⁿ chhut-.khì.
29:6 In-ūi lán ê chó͘-sian ū hoān chōe, kiâⁿ Siōng-chú — lán ê Siōng-tè só͘ khòaⁿ-chò pháiⁿ ê tāichì, lī-khui I, oa̍t-tńg i ê bīn, kha-chiah-phiaⁿ ǹg Siōng-chú tòa ê só͘-chāi.
29:7 In koh koaiⁿ-só mn̂g-lông ê mn̂g, phah-sit teng-hóe, bô tī sèng-só͘ sio hiuⁿ, hiàn sio-chè hō͘ Siōng-chú — I-su-la-el ê Siōng-tè.
29:8 Só͘-í, Siōng-chú ê siū-khì lîm-kàu Iô-tah kah Ê-lú-sa-lèm, hō͘ in phiau-liû, hō͘ lâng tio̍h-kiaⁿ kah gāng-.khì, thí-chhiò chhin-chhiūⁿ lín chhin-ba̍k só͘ khòaⁿ-.tio̍h ê.
29:9 In-ūi ánne, goán ê lāu-pē kah a-kong siū to thâi, goán ê kiáⁿ-jî kah goán ê bó͘ mā hō͘ lâng lia̍h-.khì.
29:10 Taⁿ góa ê sim beh kah Siōng-chú — I-su-la-el ê Siōng-tè li̍p-iok, hō͘ I ê tōa siū-khì oa̍t-tńg lī-khui lán.
29:11 Góa chiahê kiáⁿ, taⁿ m̄ thang pîntōaⁿ, in-ūi Siōng-chú kéng-soán lín khiā tī I ê bīn-chêng lâi ho̍k-sāi I, tam-tng chit-jīm sio hiuⁿ hō͘ I. "
29:12 Chiū ánne, Lē-bī lâng Ko-hat cho̍k A-má-sái ê kiáⁿ Ma-hat, A-cha-lí-ah ê kiáⁿ Iô-el, Me-la-lih cho̍k Ap-ti ê kiáⁿ Ki-si, E-ha-le-lel ê kiáⁿ A-cha-lí-ah, Kel-sióng cho̍k Chim-mah ê kiáⁿ Io-oah, Io-oah ê kiáⁿ E-tiân;
29:13 E-li-cha-hoán cho̍k ê Sim-lī kah E-i-el, A-sah cho̍k ê Che-ka-lí-ah kah Mat-ta-niah;
29:14 He-mán cho̍k ê Ia-chi-el kah Si-mí, E-to-tòng cho̍k ê Si-má-iah kah U-chi-el, lóng khí-.lâi;
29:15 chū-chi̍p in ê hiaⁿ-tī, chheng-khì kakī, chiàu ông chun-thàn Siōng-chú ê ōe só͘ bēng-lēng ê, ji̍p-khì sé-chheng Siōng-chú ê tiān.
29:16 Chè-si ji̍p-khì Siōng-chú tiān ê lāi-bīn beh kā i sé chheng-khì, kā Siōng-chú tiān lāi só͘-ū ê ù-òe tòa chhut-khì kàu Siōng-chú tiān ê īⁿ, Lē-bī lâng kā i chiap-.lâi, tòa-khì gōa-bīn lâi-kàu Kit-lông khe.
29:17 Tùi chiaⁿ-goe̍h chhe-it khai-sí kiâⁿ chheng-khì ê tāichì, hit goe̍h ê chhe-peh chiah kàu Siōng-chú ê mn̂g-lông, peh ji̍t chheng-khì Siōng-chú ê tiān, kàu chiaⁿ-goe̍h cha̍p-la̍k chiū oân-sêng.
29:18 Tiông-sin Hōng-hiàn Sèng-tiān
Chiū ánne, in ji̍p-khì kìⁿ Hi-che-kia ông kóng, " Goán í-keng kā Siōng-chú ê kui keng tiān kah sio-chè ê tôaⁿ, í-ki̍p i ê khì-kū, pâi-lia̍t piáⁿ ê toh kah i ê khì-kū, lóng sé chheng-khì à.
29:19 Jî-chhiáⁿ A-khà-chuh ông chē-ūi hoān chōe ê sî só͘ khì-sak ê khì-kū, goán lóng chún-pī hó-sè koh kā i sé chheng-khì. Lí khòaⁿ, taⁿ lóng tī Siōng-chú ê tôaⁿ chêng. "
29:20 Hi-che-kia ông thàu-chá khí-.lâi, chū-chi̍p siâⁿ lāi ê siú-léng, lóng chiūⁿ Siōng-chú ê tiān.
29:21 In khan chhit chiah gû-káng, chhit chiah iûⁿ-káng, chhit chiah mî-iûⁿ-á, chhit chiah soaⁿ-iûⁿ-káng, beh ūi kok, ūi sèng-só͘, ūi Iô-tah, hiàn chò sio̍k-chōe ê chè. Ông bēng-lēng A-lông ê kiáⁿ-sun hiahê chè-si, kā in hiàn tī Siōng-chú ê tôaⁿ.
29:22 In chiū thâi gû-káng, chè-si kā hit-ê hoeh chiap kòe-.lâi, hiù tī tôaⁿ-.ni̍h, mā thâi iûⁿ-káng, kā hoeh hiù tī tôaⁿ-.ni̍h, koh thâi mî-iûⁿ-á, mā kā hoeh hiù tī tôaⁿ-.ni̍h ;
29:23 kā hiahê chò sio̍k-chōe-chè ê soaⁿ-iûⁿ-káng, khan kàu ông kah hōe-chiòng ê bīn-chêng, in chiū tī hit téng-bīn hōaⁿ-chhiú.
29:24 Chè-si kā i thâi, ēng in ê hoeh chò sio̍k-chōe ê chè hiàn tī tôaⁿ-.ni̍h, ūi I-su-la-el jîn-bîn sio̍k-chōe, in-ūi ông bēng-lēng tio̍h ēng sio-chè kah sio̍k-chōe-chè, ūi I-su-la-el jîn-bîn lâi hiàn.
29:25 Ông koh phài Lē-bī lâng tī Siōng-chú ê tiān the̍h poa̍t, sek, khîm, chiàu Ta-bi̍t kah ông ê sian-kiàn Ga̍t, í-ki̍p Ná-than sian-ti só͘ bēng-lēng ê, in-ūi Siōng-chú ū kau-thok I hiahê sian-ti, bēng-lēng in ánne chò.
29:26 Lē-bī lâng the̍h Ta-bi̍t ê ga̍k-khì, chè-si gia̍h kó͘-chhoe, chò-hóe teh khiā.
29:27 Hi-che-kia bēng-lēng hiàn sio-chè tī tôaⁿ-.ni̍h, sio-chè chi̍t-ē hiàn, chiū chhiùⁿ oló Siōng-chú ê koa, ēng kó͘-chhoe, koh ēng I-su-la-el ông Ta-bi̍t ê ga̍k-khì lâi hô siaⁿ.
29:28 Hōe-chiòng lóng kèng-pài, chhiùⁿ koa ê to̍h chhiùⁿ, pûn kó͘-chhoe ê to̍h pûn, ánne ti̍t-kàu sio-chè hiàn kiat-sok ûi-chí.
29:29 Hiàn liáu-āu, ông kah só͘-ū chò-hóe tī hia ê lâng lóng àⁿ thâu kèng-pài.
29:30 Hi-che-kia ông kah hiahê siú-léng, koh bēng-lēng Lē-bī lâng ēng Ta-bi̍t kah sian-kiàn A-sah ê si lâi oló Siōng-chú, in chiū hoaⁿ-hí, gîm-si oló, àⁿ thâu kèng-pài.
29:31 Hi-che-kia chiū ìn kóng, " Lín í-keng kakī hun-pia̍t kui hō͘ Siōng-chú, tio̍h kiâⁿ óa-.lâi, tòa chè-mi̍h kah siā-un-chè kàu Siōng-chú ê tiān. " Hōe-chiòng chiū tòa chè-mi̍h kah siā-un-chè lâi, kiàn-nā kam-sim lo̍k-ì ê mā lóng tòa sio-chè lâi.
29:32 Hōe-chiòng só͘ hiàn sio-chè ê gia̍h, chóng-kiōng gû-káng chhit-cha̍p chiah, iûⁿ-káng chi̍t pah chiah, mî-iûⁿ-á nn̄g pah chiah, chiahê lóng sī chò sio-chè hiàn hō͘ Siōng-chú ê.
29:33 Koh ū hun-pia̍t chò sèng ê mi̍h, gû-káng la̍k pah chiah, mî-iûⁿ saⁿ chheng chiah.
29:34 Chóng-.sī, chè-si siuⁿ chió, bē tàng choân-pō͘ pak hiahê sio-chè chengseⁿ ê phôe, só͘-í, in ê hiaⁿ-tī Lē-bī lâng kā in pang-chān kàu hit-ê tāichì oân-sêng liáu-āu, koh thèng-hāu hiahê chè-si kakī chheng-khì; in-ūi Lē-bī lâng sêng-sim tì-ì kakī ê chheng-khì, iâⁿ-kòe chè-si.
29:35 Sio-chè kah siā-un-chè ê iû kah ta̍k chióng sio-chè só͘ phòe ê koàn-tiān chin chē. Án-ne, Siōng-chú tiān lāi ê tāichì chiàu chhù-sū pâi-lia̍t.
29:36 Hi-che-kia kah chèng lâng lóng hoaⁿ-hí, in-ūi Siōng-chú thè jîn-bîn só͘ chún-pī ê, ūi tio̍h chit-ê tāichì hut-jiân chiâⁿ.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。