歷代志下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
23:1 Pōe-poān A-tha-lí-iah
( LOH 11: 4-16)
Tē-chhit nî, Io-ho-iá-tah kakī kiông-sēng khí-.lâi, chiū tiàu liân-tiúⁿ E-lo-ham ê kiáⁿ A-cha-lí-ah, Io-ha-nân ê kiáⁿ I-si-ma-el, O͘-biat ê kiáⁿ A-cha-lí-ah, A-ta-iah ê kiáⁿ Ma-a-se-iah, Chik-lī ê kiáⁿ Í-lī-sa-hoat, hiahê lâi kah i li̍p-iok.
23:2 In piàn kiâⁿ Iô-tah, tùi Iô-tah hiahê siâⁿ chū-chi̍p Lē-bī lâng kah I-su-la-el ê cho̍k-tiúⁿ, lóng lâi-kàu Ê-lú-sa-lèm.
23:3 Choân hōe-chiòng tī Siōng-chú ê tiān kah ông li̍p-iok. Ông tùi in kóng, " Lí khòaⁿ, ông ê kiáⁿ beh chò ông, chiàu Siōng-chú koan-hē Ta-bi̍t ê kiáⁿ-sun só͘ kóng ê.
23:4 Taⁿ lín tio̍h ánne kiâⁿ, lín chiahê chè-si kah Lē-bī lâng, saⁿ-hūn chi-it tī An-hioh-ji̍t ji̍p-.lâi ê, tio̍h chò kò͘-mn̂g ê,
23:5 saⁿ-hūn chi-it tio̍h tī ông-kiong, saⁿ-hūn chi-it tio̍h tī tē-ki ê mn̂g; jîn-bîn lóng tio̍h tī Siōng-chú tiān lāi ê īⁿ.
23:6 To̍k-to̍k chè-si kah teh ho̍k-sāi ê Lē-bī lâng í-gōa, pa̍t lâng m̄ thang ji̍p-khì Siōng-chú ê tiān; hiahê lâng thang ji̍p-.khì, in-ūi in sī sèng. Chóng-.sī, chèng lâng tio̍h ūi tio̍h Siōng-chú lâi kò͘-siú.
23:7 Lē-bī lâng ta̍k-ê chhiú tio̍h gia̍h kun-khì, sì-kho͘-ûi pó-hō͘ ông; kiàn-nā ngē-ngē beh ji̍p tiān ê tio̍h hō͘ i sí. Ông chhut-ji̍p ê sî, lín tio̍h kin-tòe i. "
23:8 Lē-bī lâng kah Iô-tah kûn-chiòng, chiàu chè-si Io-ho-iá-tah it-chhè só͘ bēng-lēng ê khì kiâⁿ, ta̍k lâng tòa in lûn tio̍h An-hioh-ji̍t ji̍p-.lâi ê lâng kah lûn tio̍h An-hioh-ji̍t chhut-khì ê lâng, in-ūi chè-si Io-ho-iá-tah m̄-chún in hā-pan.
23:9 Chè-si Io-ho-iá-tah chiū kā Siōng-chú tiān lāi só͘ khǹg Ta-bi̍t ông ê chhiuⁿ, pîn-pâi kah tōa pâi, kau hō͘ hiahê liân-tiúⁿ.
23:10 Koh phài chèng lâng, ta̍k-ê chhiú gia̍h ke-si, tī tôaⁿ kah tiān hia, tùi tiān ê chiàⁿ pêng kàu tiān ê tò pêng, khiā tī ông ê sì-kho͘-ûi.
23:11 In chiū chhōa ông ê kiáⁿ chhut-.lâi, kā i tì bián-liû, hō͘ i lu̍t-hoat ê chheh. Io-ho-iá-tah kah i hiahê kiáⁿ ēng iû kā i boah, siat-li̍p i chò ông, kûn-chiòng hoah kóng, " Goān ông bān-sòe! "
23:12 A-tha-lí-iah thiaⁿ tio̍h jîn-bîn cháu-lâi oló ông ê siaⁿ, chiū kàu jîn-bîn hia, ji̍p-khì Siōng-chú ê tiān,
23:13 khòaⁿ tio̍h ông khiā tī tiān mn̂g ê thiāu piⁿ, hiahê kun-tiúⁿ kah pûn kó͘-chhoe ê khiā tī ông ê chó-iū. Jîn-bîn hoaⁿ-hí pûn kó͘-chhoe, koh ū chhiùⁿ koa ê, ēng ta̍k chióng ê ga̍k-khì, chhōa kûn-chiòng oló, A-tha-lí-iah chiū thiah-li̍h i ê saⁿ, hoah kóng, " Chō-hoán à! Chō-hoán à! "
23:14 Chè-si Io-ho-iá-tah chhōa koán-hat kun-tūi ê liân-tiúⁿ, tùi in kóng, " Tùi pan-lia̍t ê tiong-kan kā i kóaⁿ chhut-.khì, kiàn-nā tòe i ê tio̍h ēng to kā i thâi-sí! " In-ūi chè-si kóng, " M̄-thang tī Siōng-chú ê tiān kā i thâi. "
23:15 In siám-khui siang pêng, hō͘ i khì; i kiâⁿ-kàu ông-kiong ê bé ê mn̂g, chiū tī hia kā i thâi-sí.
23:16 Io-ho-iá-tah Chè-si ê Kái-kek
( LOH 11: 17-20)
Io-ho-iá-tah tī pún-sin kah jîn-bîn, kah ông ê tiong-kan li̍p-iok, lóng beh chò Siōng-chú ê chú-bîn.
23:17 Chiū ánne, chèng lâng lâi-kàu Ba-al ê biō, kā i thiah-húi, phah-chhùi i hiahê tôaⁿ kah ngó͘-siōng, koh tī tôaⁿ chêng phah-sí Ba-al ê chè-si Mat-than.
23:18 Io-ho-iá-tah koh chiàu Ta-bi̍t chá-ji̍t só͘ tiāⁿ tio̍h ê, siat-li̍p chè-si Lē-bī lâng tam-tng Siōng-chú tiān ê chit, chá-chêng Ta-bi̍t ēng chit-ê pan-lia̍t phài tī Siōng-chú ê tiān, hō͘ in hoaⁿ-hí chhiùⁿ koa, hiàn Siōng-chú ê sio-chè, chiàu só͘ kì-chài tī Mô͘-se ê lu̍t-hoat ê.
23:19 I mā tī Siōng-chú ê tiān hiahê mn̂g siat kò͘-mn̂g ê, bô-lūn án-chóaⁿ, bô chheng-khì ê lóng bē tit ji̍p-.khì.
23:20 Koh chhōa liân-tiúⁿ kah kùi-cho̍k kah jîn-bîn ê siú-léng, kah kok lāi ê chèng lâng, tùi Siōng-chú ê tiān chhōa ông lo̍h-.lâi, tùi téng ê mn̂g chìn-ji̍p ông-kiong, hō͘ ông chē kok-ūi.
23:21 Kok lāi chèng lâng lóng hoaⁿ-hí, choân siâⁿ an-chēng, in ēng to thâi-sí A-tha-lí-iah.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。