歷代志下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
16:1 Iô-tah kah I-su-la-el Kau-chiàn
( LOS 15:17-22)
A-sah ông saⁿ-cha̍p la̍k nî, I-su-la-el ông Ba-siah khí-lâi kong-kek Iô-tah, khí La̍h-má siâⁿ beh chó͘-tòng lâng tī Iô-tah ông A-sah hia chhut-ji̍p.
16:2 A-sah chiū tùi Siōng-chú ê tiān kah ông-kiong ê kim-khò͘ the̍h-chhut kim-gîn, sàng hō͘ tòa tī Ta-má-su-ko ê A-lâm ông, kóng,
16:3 " Góa kah lí ū iok, chhin-chhiūⁿ chêng góa ê lāu-pē kah lí ê lāu-pē ánne. Taⁿ góa ēng kim-gîn sàng lí, chhiáⁿ lí khì hùi-tû lí kah I-su-la-el ông Ba-siah só͘ li̍p ê iok, hō͘ i lī-khui góa. "
16:4 Bian-ha-tat chun-thàn A-sah ông ê ōe, chhe i hiahê kun-tiúⁿ khì kong-kek I-su-la-el ê siâⁿ. In chiū kong-phòa I-ióng, Tàn kah A-bel-má-im, í-ki̍p Ná-hu-tha-lím só͘-ū kim-khò͘ ê siâⁿ.
16:5 Ba-siah thiaⁿ-.tio̍h chiū thêng kang, bô koh khí La̍h-má siâⁿ.
16:6 Chiū ánne, A-sah ông chhōa Iô-tah kûn-chiòng óa-.lâi, in chiū poaⁿ-sóa Ba-siah só͘ ēng lâi beh khí La̍h-má siâⁿ ê chio̍h-thâu kah chhâ, ēng lâi khí Ge-bah siâⁿ kah Mi-su-peh siâⁿ.
16:7 Ha-na-nih Sian-ti
Hit sî, sian-kiàn Ha-na-nih lâi kìⁿ Iô-tah ông A-sah, kā i kóng, " In-ūi lí óa-khò A-lâm ông, bô óa-khò Siōng-chú — lí ê Siōng-tè, só͘-í, A-lâm ông ê kun-peng thoat-lī lí ê chhiú.
16:8 Kú-si̍t lâng kah Lu-bí lâng kám m̄-sī tōa ê kun-tūi, ū chin chē chiàn-chhia kah bé-peng? To̍k-to̍k in-ūi lí óa-khò Siōng-chú, I chiū ē kā in kau tī lí ê chhiú tiong.
16:9 In-ūi Siōng-chú ê ba̍k-chiu tī choân tē khòaⁿ-lâi khòaⁿ-khì, kiàn-nā choan-sim ǹg I ê, I chiū ē hián-bêng I ê tōa khùi-la̍t kā i pang-chān. Tī chit-ê tāichì, lí só͘ kiâⁿ sī gû-gōng; in-ūi ánne, í-āu lí ē ū kau-chiàn ê tāichì. "
16:10 A-sah chiū siū-khì sian-kiàn, kā i koaiⁿ tī kaⁿ-.ni̍h, sī in-ūi i ūi tio̍h chit kiāⁿ tāichì tōa siū-khì. Hit sî, A-sah mā pháiⁿ khoán-thāi jîn-bîn tiong-kan kúi-nā-ê lâng.
16:11 A-sah Thóng-tī ê Kiat-kó
( LOS 15: 23-24)
A-sah só͘ kiâⁿ ê tāichì, tùi-thâu kàu-bóe lóng kì tī Iô-tah kah I-su-la-el chiahê ông ê kì-lio̍k.
16:12 A-sah ông saⁿ-cha̍p káu nî, i ê kha ū phòa-pēⁿ, pēⁿ kah chin siong-tiōng. Phòa-pēⁿ ê sî bô kiû Siōng-chú, to̍k-to̍k khì kiû i-seng.
16:13 A-sah chò ông sì-cha̍p it nî chiū sí, kah i ê chó͘-sian chò-hóe khùn,
16:14 bâi-chòng tī i kakī ê bōng, to̍h-sī i tī Ta-bi̍t ê siâⁿ ūi kakī só͘ chha̍k ê, hē tī bîn-chhn̂g téng, i ê bîn-chhn̂g ū phang-hiuⁿ móa-móa, to̍h-sī chiàu tiâu-hô hiuⁿ ê hong-hoat só͘ chō ê. Jîn-bîn ūi tio̍h i kiâⁿ chin chē sio-chè ê lé-sò͘.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。