歷代志下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
11:1 Si-má-iah Sian-ti ê Ī-giân
( LOS 12: 21-24)
Lô-bo-àm lâi-kàu Ê-lú-sa-lèm ê sî, chiū chū-chi̍p Iô-tah kah Biān-iá-mín ê ke, kiōng cha̍p-peh bān lâng, lóng sī keng-kòe kéng-soán ê chiàn-sū, beh kah I-su-la-el kau-chiàn, hō͘ kok-ūi koh kui tī Lô-bo-àm.
11:2 Chóng-.sī, Siōng-chú ê ōe lîm-kàu Siōng-tè ê lô͘-po̍k Si-má-iah kóng,
11:3 " Lí khì kā Só͘-lô-móng ê kiáⁿ Iô-tah ông Lô-bo-àm, í-ki̍p tòa tī Iô-tah kah Biān-iá-mín ê chèng I-su-la-el lâng, kóng,
11:4 Siōng-chú ánne kóng, ' Lín m̄ thang chiūⁿ-.khì, m̄ thang kah lín ê hiaⁿ-tī kau-chiàn, ta̍k lâng tńg-khì i ê ke! In-ūi chit-ê tāichì chhut tī Góa. '" In thiaⁿ Siōng-chú ê ōe, chiū tńg-.khì, bô khì kong-táⁿ Ia-lô-ba-am.
11:5 Lô-bo-àm Khí Siâⁿ-pó
Lô-bo-àm tòa tī Ê-lú-sa-lèm, tī Iô-tah tē khí kúi-nā-ê siâⁿ chò siâⁿ-pó.
11:6 Chiū-sī khí Bia̍t-lé-hèm, E-tám, The-ko-oah,
11:7 Biat-chul, So͘-koh, A-tu-lâm,
11:8 Gat, Ma-lé-siah, Ji-hu,
11:9 A-to͘-lai-im, La̍h-ki-sih, A-che-kah,
11:10 Cho-lah, A-iá-lông, He-bú-lông, chiahê lóng tī Iô-tah kah Biān-iá-mín chò kian-kò͘ ê siâⁿ.
11:11 Lô-bo-àm koh kian-kò͘ hiahê siâⁿ-pó, tī in tiong-kan siat peng ê thâu-lâng, koh chek-chū bí-niûⁿ, iû kah chiú.
11:12 Koh tī ta̍k-ê siâⁿ chún-pī pîn-pâi kah chhiuⁿ, hō͘ i hui-siông kian-kò͘. Iô-tah kah Biān-iá-mín lóng sio̍k tī i.
11:13 Chè-si kah Lē-bī Lâng Sóa-Khì Tòa Iô-tah
I-su-la-el choân tē ê chè-si kah Lē-bī lâng lóng tùi sì-kho͘-ûi lâi kui Lô-bo-àm.
11:14 Lē-bī lâng lī-khui in ê kau-iá kah sán-gia̍p, lâi-kàu Iô-tah kah Ê-lú-sa-lèm, sī in-ūi Ia-lô-ba-am kah i ê kiáⁿ kī-choa̍t in, m̄-chún in kiâⁿ chè-si ê chit-hūn ho̍k-sāi Siōng-chú.
11:15 Ia-lô-ba-am chiū ūi soaⁿ-thâu tôaⁿ, ūi kúi-koài, ūi i só͘ chù ê gû-á, kakī siat-li̍p chè-si.
11:16 I-su-la-el chèng chi-cho̍k tiong-kan, kiàn-nā tiāⁿ tio̍h ì-sù beh cháu-chhōe Siōng-chú — I-su-la-el ê Siōng-tè ê, tòe in lâi-kàu Ê-lú-sa-lèm, beh hiàn chè hō͘ Siōng-chú — in chó͘-sian ê Siōng-tè.
11:17 Án-ne, kian-kò͘ Iô-tah kok keng-kòe saⁿ nî, hō͘ Só͘-lô-móng ê kiáⁿ Lô-bo-àm kiông-sēng, in-ūi in saⁿ nî kiâⁿ Ta-bi̍t kah Só͘-lô-móng ê lō͘.
11:18 Lô-bo-àm ê Ka-cho̍k
Lô-bo-àm chhōa Ma-ha-la̍t chò bó͘, i sī Ta-bi̍t ê chabó͘ sun, E-le-mo͘t ê chabó͘ kiáⁿ, iū koh sī I-é-sái ê chabó͘ sun, E-lí-ap ê chabó͘ kiáⁿ A-mí-hail ê chabó͘ kiáⁿ.
11:19 I kā Lô-bo-àm seⁿ kúi-nā-ê kiáⁿ, to̍h-sī E-ú-sih, Si-ma-liah, Cha-ham.
11:20 Lô-bo-àm chhōa i liáu-āu koh chhōa Αp-sa-lôm ê chabó͘ kiáⁿ Má-kah, i kā i seⁿ A-bi-iah, At-thài, Chi-chah kah Si-ló-mi̍t.
11:21 Lô-bo-àm chhōa cha̍p-peh-ê bó͘, la̍k-cha̍p-ê hui; seⁿ jī-cha̍p peh-ê kiáⁿ, la̍k-cha̍p-ê chabó͘ kiáⁿ; chóng-.sī, i thiàⁿ Αp-sa-lôm ê chabó͘ kiáⁿ Má-kah, iâⁿ-kòe só͘-ū hiahê bó͘ kah hui.
11:22 Lô-bo-àm siat-li̍p Má-kah ê kiáⁿ A-bi-iah chò thâu, tī hiaⁿ-tī tiong-kan chò siú-léng, in-ūi siūⁿ beh kā i siat-li̍p lâi sòa-chiap chò ông.
11:23 Lô-bo-àm chiàu tì-hūi lâi kiâⁿ, kā chèng kiáⁿ hun-sòaⁿ tī Iô-tah kah Biān-iá-mín ê choân tē, kàu ta̍k-ê kian-kò͘ ê siâⁿ, koh hō͘ in chin chē bí-niûⁿ, koh kā in chhōe chin chē bó͘.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。