歷代志下 線上收聽:中文和合本 現代中文譯本修訂版 現代台語 台語聖經 客語 希伯來文讀經 下載檔案 關於語音聖經
6:1 Só͘-lô-móng ê Kî-tó
( LOS 8: 22-53)
Hit sî, Só͘-lô-móng kóng, " Siōng-chú bat kóng, I ē tòa tī o͘-o͘ àm-àm ê tiong-kan.
6:2 Chóng-.sī, góa í-keng khí chi̍t keng tiān hō͘ Lí tòa, chò Lí éng-oán tòa ê só͘-chāi. "
6:3 Ông oa̍t-tńg i ê bīn, chiok-hok I-su-la-el ê hōe-chiòng, I-su-la-el hōe-chiòng lóng khiā khí-.lâi.
6:4 I kóng, " Siōng-chú — I-su-la-el ê Siōng-tè sī eng-kai oló ê, in-ūi I chhin-chhùi tùi góa ê lāu-pē Ta-bi̍t èng-ín ê, chhin-chhiú kā i èng-giām, kóng,
6:5 ' Tùi Góa chhōa Góa ê jîn-bîn chhut Ai-gi̍p tē í-lâi, Góa m̄ bat tī I-su-la-el chèng chi-cho̍k tiong-kan kéng chi̍t-ê siâⁿ lâi khí tiān hō͘ Góa ê miâ tiàm tī hia, mā m̄ bat kéng lâng chò Góa ê chú-bîn — I-su-la-el lâng ê kun-ông;
6:6 to̍k-to̍k kéng Ê-lú-sa-lèm hō͘ Góa ê miâ tiàm tī hia, koh kéng Ta-bi̍t tī-lí Góa ê chú-bîn — I-su-la-el lâng. '
6:7 " Góa ê lāu-pē — Ta-bi̍t sim-lāi pún ū ì-sù, beh ūi Siōng-chú — I-su-la-el ê Siōng-tè ê miâ khí tiān.
6:8 Chóng-.sī, Siōng-chú tùi góa ê lāu-pē Ta-bi̍t kóng, ' Lí ê sim ū ì-sù beh ūi góa ê miâ khí tiān, lí chit-ê ì-sù chin hó;
6:9 to̍k-to̍k lí m̄ thang khí tiān, lí só͘ chhin-seⁿ ê kiáⁿ ē ūi Góa ê miâ khí tiān. '
6:10 " Taⁿ Siōng-chú èng-giām I só͘ kóng ê ōe, góa chiàu Siōng-chú ê ōe khí-lâi sòa-chiap góa ê lāu-pē Ta-bi̍t, chē I-su-la-el ê kok-ūi, koh ūi Siōng-chú — I-su-la-el Siōng-tè ê miâ khí tiān.
6:11 Góa an-tì iok-kūi tī hia, kūi lāi ū Siōng-chú ê iok, to̍h-sī I kah I-su-la-el lâng só͘ li̍p ê iok. "
6:12 Ông tng I-su-la-el hōe-chiòng ê bīn-chêng, khiā tī Siōng-chú ê tôaⁿ chêng, gia̍h-khí chhiú lâi,
6:13 （ in-ūi Só͘-lô-móng bat chō chi̍t-ê tâng-tâi, tn̂g gō͘ tiú, khoah gō͘ tiú, koân saⁿ tiú, hē tī īⁿ tiong ）, i chiū khiā tī tâi téng, tng I-su-la-el hōe-chiòng ê bīn-chêng kūi lo̍h-.khì, gia̍h-khí chhiú ǹg thiⁿ, kóng,
6:14 " Siōng-chú — I-su-la-el ê Siōng-tè ah, tī thiⁿ-.ni̍h, tī tē-.ni̍h, bô ū sîn-bêng chhin-chhiūⁿ Lí, siú iok koh kiâⁿ chû-ài tī Lí hiahê lô͘-po̍k, to̍h-sī chīn-sim kiâⁿ tī Lí ê bīn-chêng ê.
6:15 Lí tùi Lí ê lô͘-po̍k, góa ê lāu-pē Ta-bi̍t só͘ èng-ín ê, Lí ū siú iok. Lí chhin-chhùi kóng ê, chhin-chhiú kā i èng-giām, chiàu kin-á-ji̍t ê khoán.
6:16 Siōng-chú — I-su-la-el ê Siōng-tè ah, Lí só͘ èng-ín Lí ê lô͘-po̍k — góa ê lāu-pē Ta-bi̍t, kóng, ' Lí ê kiáⁿ-sun nā kín-sīn in ê só͘ chò, kiâⁿ Góa ê lu̍t-hoat, chhin-chhiūⁿ lí kiâⁿ tī Góa ê bīn-chêng, to̍h-sī sio̍k tī lí ê, ē tī Góa ê bīn-chêng chē I-su-la-el ê kok-ūi éng bô tn̄g. ' Taⁿ kiû Lí kā i èng-giām.
6:17 Siōng-chú — I-su-la-el ê Siōng-tè ah, Lí tùi Lí ê lô͘-po̍k — Ta-bi̍t só͘ kóng ê, kiû Lí hō͘ i chiâⁿ-chò sū-si̍t.
6:18 " Siōng-tè kám chin-chiàⁿ ē kah sè-kan lâng tòa tī tē-chiūⁿ? Lí khòaⁿ, thiⁿ kah chiahê thiⁿ ê thiⁿ, siōng-chhiáⁿ bô kàu-gia̍h hō͘ Lí tòa, hô-hòng góa só͘ khí chit keng tiān?
6:19 Siōng-chú — góa ê Siōng-tè ah, goān Lí àⁿ-lo̍h siàu-liām Lí ê lô͘-po̍k ê kî-tó kah khún-kiû, lâi thiaⁿ Lí ê lô͘-po̍k tī Lí ê bīn-chêng só͘ kî-tó kah kiû-kiò.
6:20 Goān Lí mê-ji̍t khòaⁿ-kò͘ chit-ê tiān, to̍h-sī Lí só͘ kóng-khí beh an-tì Lí ê miâ tī hia ê só͘-chāi, lâi thiaⁿ Lí ê lô͘-po̍k só͘ beh ǹg chit só͘-chāi kî-kiû ê kî-tó.
6:21 Lí ê lô͘-po̍k kah Lí ê chú-bîn — I-su-la-el lâng ǹg chit só͘-chāi kî-tó ê sî, goān Lí thiaⁿ in ê kî-kiû, goān Lí tùi thiⁿ, tùi Lí tòa ê só͘-chāi lâi thiaⁿ in ê kî-tó, Lí thiaⁿ-.tio̍h ê sî chiū kā in sià-bián.
6:22 " Lâng nā tek-chōe i ê chhù-piⁿ, mā ū lâng ēng chi̍t-ê chiùchōa kah i chiùchōa, i nā lâi chit keng tiān, tī Lí ê tôaⁿ chêng chiùchōa,
6:23 Kiû Lí tùi thiⁿ thiaⁿ-.tio̍h chiū lâi pān-lí, sím-phòaⁿ Lí chiahê lô͘-po̍k, tēng pháiⁿ lâng ê chōe, chiàu i só͘ kiâⁿ ê, pò-èng tī i ê thâu-khak; tēng gī lâng chò gī, chiàu i ê gī lâi sù-hok hō͘ i.
6:24 " Siat-sú Lí ê chú-bîn — I-su-la-el lâng, in-ūi tek-chōe Lí chiah thâi-su tī tùi-te̍k ê bīn-chêng, in nā kui-ǹg Lí, jīn Lí ê miâ, koh tī chit keng tiān kî-tó ǹg Lí khún-kiû,
6:25 kiû Lí tùi thiⁿ thiaⁿ-.tio̍h ê sî, chiū lâi sià-bián Lí ê chú-bîn — I-su-la-el lâng ê chōe, hō͘ in tńg-lâi Lí só͘ siúⁿ-sù hō͘ in kah in chó͘-sian ê tē.
6:26 " Siat-sú in tek-chōe Lí, tì-sú thiⁿ koaiⁿ-ba̍t bô lo̍h hō͘, Lí hêng-hoa̍t in ê sî, in nā ǹg chit só͘-chāi kî-tó, jīn Lí ê miâ, lī-khui in ê chōe,
6:27 kiû Lí tī thiⁿ-.ni̍h thiaⁿ-.tio̍h, chiū lâi sià-bián Lí ê lô͘-po̍k kah Lí ê chú-bîn — I-su-la-el lâng ê chōe, tī Lí kà-sī in só͘ tio̍h kiâⁿ ê hó lō͘ ê sî, koh lo̍h hō͘ tī Lí ê tē, to̍h-sī Lí siúⁿ-sù Lí ê chú-bîn chò sán-gia̍p ê tē.
6:28 " Chit-ê tē nā ū ki-hng, un-e̍k, khòng-ōaⁿ, hiú-nōa, chháu-meh, chián-thâng, á-.sī in hiahê tùi-te̍k, tī in hiahê siâⁿ ê tē kā in ûi-khùn, bô-lūn ū siáⁿ-mi̍h chai-hō, siáⁿ-mi̍h phòa-pēⁿ,
6:29 á-.sī chi̍t-ê lâng, á-.sī Lí ê chú-bîn — I-su-la-el lâng ê kûn-chiòng, ta̍k-ê chai kakī sim-lāi ê chai-hō kah iu-būn, ǹg chit keng tiān gia̍h-khí chhiú, bô-lūn án-chóaⁿ khún-kiû, án-chóaⁿ kî-tó,
6:30 goān Lí tùi thiⁿ-.ni̍h, Lí só͘ tòa ê só͘-chāi lâi thiaⁿ, lâi kā i sià-bián. Lí chai in ê sim, chiàu in ta̍k lâng ê hêng-ûi lâi khoán-thāi in, ( in-ūi sè-kan lâng ê sim, chí ū Lí chai niā-niā),
6:31 hō͘ in tī Lí siúⁿ-sù hō͘ goán chó͘-sian ê tē, chi̍t-sì-lâng kèng-ùi Lí, kiâⁿ Lí ê tō-lō͘.
6:32 " Nā-sī gōa-pang lâng, m̄-sī sio̍k Lí ê chú-bîn — I-su-la-el lâng ê, ūi tio̍h Lí ê tōa miâ, tōa koân-lêng ê chhiú chhun chhut ê chhiú-kut, tùi hn̄g-hn̄g ê só͘-chāi lâi, in nā lâi ǹg chit keng tiān kî-tó,
6:33 goān Lí tùi thiⁿ, Lí tòa ê só͘-chāi lâi thiaⁿ in ê kî-tó, chiàu gōa-pang lâng it-chhè só͘ tùi Lí kiû ê lâi kiâⁿ; hō͘ thiⁿ-ē bān-bîn lóng bat Lí ê miâ, kèng-ùi Lí kah Lí ê chú-bîn — I-su-la-el lâng sio-siâng, koh hō͘ in chai góa só͘ khí chit keng tiān, sī ēng Lí ê miâ lâi chheng ê.
6:34 " Lí ê chú-bîn nā chhut-khì Lí só͘ chhe in khì ê lō͘ kah tùi-te̍k kau-chiàn, ǹg Lí só͘ kéng chit-ê siâⁿ kah góa ūi tio̍h Lí ê miâ só͘ khí ê tiān, lâi tùi Lí kî-tó ê sî,
6:35 goān Lí tùi thiⁿ lâi thiaⁿ in ê kî-tó kah khún-kiû, lâi pó-hō͘ in ê gī.
6:36 " Lí ê chú-bîn nā tek-chōe Lí, ( in-ūi bô ū bô hoān chōe ê lâng, ) Lí tùi in siū-khì, kā in kau hō͘ tùi-te̍k, tì-sú in kā in lia̍h khì-kàu á-.sī hn̄g á-.sī kīn ê tē;
6:37 in nā tī só͘ lia̍h-.khì ê tē, sim-lāi siūⁿ beh tò tńg-lâi hóe-kái, koh tī lia̍h in ê lâng ê tē, khún-kiû Lí kóng, ' Goán ū chōe, goán ū pōe-ge̍k, goán ū chò pháiⁿ. '
6:38 In nā tī siū lia̍h-.khì ê tē, to̍h-sī tùi-te̍k lia̍h in khì ê tē, chīn-sim, chīn-sèng kui-ho̍k Lí, koh ǹg pún-tē, to̍h-sī Lí siúⁿ-sù hō͘ in chó͘-sian ê tē kah Lí só͘ kéng ê siâⁿ, í-ki̍p góa ūi tio̍h Lí ê miâ só͘ khí ê tiān, lâi tùi Lí kî-tó ê sî,
6:39 goān Lí tùi thiⁿ, Lí só͘ tòa ê só͘-chāi, thiaⁿ in ê kî-tó kah khún-kiû, lâi pó-hō͘ in ê gī, koh sià-bián Lí ê chú-bîn só͘ tek-chōe Lí ê.
6:40 " Góa ê Siōng-tè ah, taⁿ góa kiû Lí ba̍k-chiu khòaⁿ, hīⁿ-khang thiaⁿ, tī chit só͘-chāi só͘ hiàn ê kî-tó.
6:41 " Siōng-chú — Siōng-tè ah, kiû Lí khí-.lâi, Lí kah Lí lêng-le̍k ê kūi ji̍p Lí an-hioh ê só͘-chāi. Siōng-chú — góa ê Siōng-tè ah, goān Lí ê chè-si chhēng kiù-un, goān Lí hiahê sèng ê jîn-bîn tit tio̍h hok-khì lâi hoaⁿ-hí.
6:42 " Siōng-chú — Siōng-tè ah, kiû Lí m̄ thang kī-choa̍t Lí siū boah-iû ê, tio̍h kì-liām Lí si un hō͘ Lí ê lô͘-po̍k — Ta-bi̍t ê chû-ài. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。