歷代志下 線上收聽:中文和合本 現代中文譯本修訂版 現代台語 台語聖經 客語 希伯來文讀經 下載檔案 關於語音聖經
5:1 Chiū ánne, Só͘-lô-móng ūi tio̍h Siōng-chú ê tiān só͘ chò ê kang lóng oân-sêng. Só͘-lô-móng kā i ê lāu-pē Ta-bi̍t só͘ hiàn hiahê mi̍h tòa ji̍p-.khì, i ê gîn, i ê kim, i hiahê khì-kū, lóng hē tī Siōng-tè tiān lāi ê kim-khò͘.
5:2 Gêng-chiap Iok-kūi Ji̍p Sèng-tiān
( LOS 8: 1-9)
Hit sî, Só͘-lô-móng chū-chi̍p I-su-la-el ê tiúⁿ-ló, kok chi-cho̍k ê siú-léng kah I-su-la-el lâng hiahê cho̍k-tiúⁿ, lâi-kàu Ê-lú-sa-lèm, beh kā Siōng-chú ê iok-kūi, tùi Ta-bi̍t siâⁿ, to̍h-sī Si-óng ūn lâi chia.
5:3 I-su-la-el jîn-bîn chiū tī chhit-.goe̍h ê cheh-kî, lóng chū-chi̍p lâi-kàu ông hia.
5:4 I-su-la-el chiahê tiúⁿ-ló lâi-kàu-ūi, hiahê Lē-bī lâng kng iok-kūi.
5:5 In chiū kng iok-kūi kah hōe-bō͘, í-ki̍p pò͘-pêⁿ lāi it-chhè sèng ê khì-kū lâi, chè-si Lē-bī lâng lóng chò-hóe kng iok-kūi.
5:6 Só͘-lô-móng ông kah chū-chi̍p kàu i hia ê I-su-la-el choân hōe-chiòng, tī iok-kūi chêng hiàn iûⁿ, gû chò chè-sū, chē kah bē sǹg-tit, mā sǹg bē liáu.
5:7 Chè-si kng Siōng-chú ê iok-kūi lâi-kàu i ê só͘-chāi, ji̍p-khì hit keng chhù ê āu-tiān, lâi-kàu chì-sèng-só͘, hē tī ki-lō͘-peng ê si̍t-ē.
5:8 In-ūi ki-lō͘-peng thí-khui in ê si̍t, tī kūi ê só͘-chāi ê téng-bīn; ki-lō͘-peng tī hit téng-bīn jia-khàm kūi kah i ê kǹg.
5:9 Hiahê kǹg chin tn̂g, i ê kǹg bóe tùi iok-kūi tī āu-tiān chêng, thang khòaⁿ-.tio̍h, tī gōa-bīn chiū khòaⁿ bē tio̍h. Kàu kin-á-ji̍t iáu tī hia.
5:10 Kūi lāi chí ū nn̄g tè chio̍h-pi, to̍h-sī I-su-la-el lâng chhut Ai-gi̍p tē, Siōng-chú kah in li̍p-iok ê sî, Mô͘-se tī Hô-lep soaⁿ só͘ hē ê, che í-gōa bô pa̍t hāng mi̍h.
5:11 Siōng-chú ê Êng-iāu
Hiahê chè-si chhut sèng-só͘, in-ūi só͘-ū tī hia ê chè-si lóng í-keng kakī chheng-khì, bô chiàu in pêng-siông-sî ê pan-lia̍t.
5:12 Lē-bī lâng tiong-kan teh chhiùⁿ koa ê, to̍h-sī A-sah, He-mán, E-to-tòng kah in hiahê kiáⁿ, hiahê hiaⁿ-tī lóng chhēng iù-tē saⁿ, khiā tī tôaⁿ ê tang pêng, the̍h nâ-poa̍h, sek kah khîm, koh ū chè-si pah-jī lâng kah in tī hia pûn sàu-kak,
5:13 hiahê pûn sàu-kak ê, hiahê chhiùⁿ koa ê, chò chi̍t-hóe tâng siaⁿ oló kám-siā Siōng-chú. Ēng i ê sàu-kak, nâ-poa̍h, ga̍k-khì, tōa-siaⁿ oló Siōng-chú kóng, " In-ūi I sī hó, I ê chû-ài éng-oán tī-.leh!" Hit sî, hit-ê tiān, to̍h-sī Siōng-chú ê tiān, ū hûn chhiong-móa,
5:14 tì-sú chè-si ūi tio̍h hûn ê iân-kò͘, bē tàng khiā-teh ho̍k-sāi, in-ūi Siōng-chú ê êng-kng chhiong-móa Siōng-tè ê tiān.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。