歷代志下 線上收聽:中文和合本 現代中文譯本修訂版 現代台語 台語聖經 客語 希伯來文讀經 下載檔案 關於語音聖經
4:1 Sèng-tiān ê Khì-khū
( LOS 7: 23-51)
I koh chō chi̍t chō tâng-tôaⁿ, tn̂g jī-cha̍p tiú, khoah jī-cha̍p tiú, koân cha̍p tiú.
4:2 Koh chù chi̍t-ê tâng-hái, khoán-sit sī îⁿ ê, koân gō͘ tiú, tùi chit pêng kàu hit pêng ê kī-lī cha̍p tiú, îⁿ-khoân saⁿ-cha̍p tiú.
4:3 I ê ē-bīn ū pû-á ê khoán ûi-.leh, múi tiú cha̍p lia̍p, lâi ûi hit-ê tâng-hái, pû-á ū nn̄g chōa, chù tâng-hái ê sî sūn-sòa chù ê.
4:4 Tâng-hái khòa tī cha̍p-jī chiah tâng-gû ê téng-bīn, saⁿ chiah ǹg pak, saⁿ chiah ǹg sai, saⁿ chiah ǹg lâm, saⁿ chiah ǹg tang; tâng-hái hē tī gû ê téng-bīn, gû bóe ǹg lāi-bīn.
4:5 Tâng-hái kāu chi̍t pa-chiúⁿ, i ê kîⁿ chhin-chhiūⁿ poe-á ê kîⁿ, ná chhin-chhiūⁿ pek-ha̍p hoe ê khoán-sit, thang té saⁿ chheng bat.
4:6 Koh chō cha̍p-ê phûn, hē gō͘-ê tī chiàⁿ pêng, gō͘-ê tī tò pêng, thang tī hit lāi-bīn sé hiàn sio-chè só͘ ēng ê mi̍h; to̍k-to̍k tâng-hái sī hō͘ chè-si thang sé.
4:7 Koh chiàu in ê thé-sek chō cha̍p-ê kim ê teng-tâi, hē tī tiān lāi, gō͘-ê tī chiàⁿ pêng, gō͘-ê tī tò pêng.
4:8 Koh chō cha̍p tè toh hē tī tiān lāi, gō͘ tè tī chiàⁿ pêng, gō͘ tè tī tò pêng, koh chhòng chi̍t pah tè kim óaⁿ;
4:9 Koh khí-chō chè-si ê īⁿ kah tōa-īⁿ, í-ki̍p īⁿ mn̂g, ēng tâng an-chng hiahê mn̂g.
4:10 Ēng tâng-hái hē tī tiān ê chiàⁿ pêng, to̍h-sī tang-lâm pêng.
4:11 Hi-lâm koh chō pôaⁿ, thuh-á kah óaⁿ. Án-ne, Hi-lâm ūi Só͘-lô-móng ông tī Siōng-tè ê tiān só͘ chò ê kang lóng oân-sêng.
4:12 Chiū-sī nn̄g ki thiāu kah hiahê pôaⁿ, kah thiāu téng nn̄g-ê thiāu-táu kah khàm thiāu téng nn̄g-ê thiāu-táu ê pôaⁿ ê bāng,
4:13 koh ū sia̍h-liû sì pah lia̍p, an-tì tī nn̄g-ê bāng; múi ê bāng ū sia̍h-liû nn̄g chōa, khàm tī thiāu téng nn̄g-ê thiāu-táu ê pôaⁿ.
4:14 Koh chō hiahê chō kah chō téng ê phûn,
4:15 tâng-hái chi̍t-ê kah i ē-bīn ê gû cha̍p-jī chiah.
4:16 I ê lāu-pē Hi-lâm ēng kng-iāⁿ-iāⁿ ê tâng, kā Só͘-lô-móng ông ūi Siōng-chú ê tiān chò pôaⁿ, thuh-á, bah-chhe kah ta̍k chióng ê khì-kū.
4:17 Ông tī Iol-tàn hô ê pêng-goân, Su-kot kah Cha-le-thàn ê tiong-kan, tī liâm-thô͘ ê tē chù-chiâⁿ ê.
4:18 Án-ne, Só͘-lô-móng chò hiahê it-chhè ê khì-kū chin chē, tâng ê khin-tāng bē tàng sǹg.
4:19 Só͘-lô-móng mā chō Siōng-chú tiān lāi só͘-ū ê khì-kū kah kim ê tôaⁿ, kah pâi-lia̍t piáⁿ hiahê toh,
4:20 í-ki̍p sûn-kim ê teng-tâi kah i ê teng, thang chiàu lē tiám tī āu-tiān ê thâu-chêng.
4:21 I ê hoe, i ê teng kah khîⁿ lóng sī kim ê, koh sī chiok-siâⁿ ê kim;
4:22 koh ēng sûn-kim chò chián-to, pôaⁿ, sî kah hóe-tiáⁿ. Kóng tio̍h chhù ê mn̂g-lō͘, i ê lāi-bīn ê chì-sèng-só͘ ê mn̂g kah chhù ê mn̂g, to̍h-sī tiān ê mn̂g, lóng sī kim ê.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。