歷代志下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
3:1 Só͘-lô-móng tī Ê-lú-sa-lèm ê Mó͘-leh-a ê soaⁿ tāng-kang khí Siōng-chú ê tiān, to̍h-sī Siōng-chú tùi i ê lāu-pē Ta-bi̍t chhut-hiān ê só͘-chāi, Ta-bi̍t bat tī I-é-bú-suh lâng Ol-nân ê tiūⁿ-tiâⁿ tiāⁿ tio̍h hit-ê tē.
3:2 Só͘-lô-móng chē-ūi tē-sì nî, jī-goe̍h chhe jī, tāng-kang lâi khí sèng-tiān.
3:3 Só͘-lô-móng beh khí Siōng-chú ê tiān só͘ hē ê tē-ki, kì tī ē-té: Tn̂g la̍k-cha̍p tiú, khoah jī-cha̍p tiú, lóng sī chiàu kó͘-chá ê chhùn-chhioh.
3:4 Thâu-chêng ê lông tn̂g jī-cha̍p tiú kah tiān ê khoah pêⁿ-pêⁿ, koân chi̍t-pah jī-cha̍p tiú, lāi-bīn an-chng sûn-kim.
3:5 Tōa keng tiān ê piah ēng siông chhiū ê chhâ lâi khàm, ēng sûn-kim lâi an-chng, téng-bīn khek chó chhiū kah liān-á.
3:6 Ēng pó-chio̍h siuⁿ hit keng tiān, hō͘ i chin súi, só͘ ēng ê kim lóng sī Pal-ba-im ê kim.
3:7 Koh ēng kim an-chng tiān kah thong-niû, hō͘-tēng, chhiûⁿ-piah kah mn̂g-sìⁿ, piah téng khek ki-lō͘-peng.
3:8 Koh khí chì-sèng-só͘, tn̂g jī-cha̍p tiú kah tiān ê khoah pêⁿ-pêⁿ, i ê khoah mā sī jī-cha̍p tiú; ēng sûn-kim an-chng, chóng-kiōng la̍k pah tha-lan-t.
3:9 Só͘ tèng ê kim-teng tāng gō͘-cha̍p si-khel. Lâu-koh lóng an-chng kim.
3:10 Chì-sèng-só͘ ê lāi-bīn, chiàu chō-siōng ê hong-hoat, chō nn̄g-ê ki-lō͘-peng, ēng kim lâi an-chng.
3:11 Hiahê ki-lō͘-peng ê si̍t, kiōng tn̂g jī-cha̍p tiú, chit-ê ki-lō͘-peng chi̍t ki si̍t tn̂g gō͘ tiú, chhun-kàu tiān chit pêng ê piah, hit ki si̍t mā sī gō͘ tiú, chhun-kàu hit-ê ki-lō͘-peng ê si̍t.
3:12 Hitê ki-lō͘-peng chi̍t ki si̍t mā sī gō͘ tiú, chhun-kàu tiān hit pêng ê piah; hit ki si̍t mā sī gō͘ tiú kah chit-ê ki-lō͘-peng ê si̍t sio-chiap.
3:13 Hiahê ki-lō͘-peng thí-khui si̍t, kiōng jī-cha̍p tiú, in ê kha khiā-.leh, bīn ǹg lāi-bīn.
3:14 Koh ēng nâ-sek, chí-sek, chu-âng sek ê liāu kah iù-tē pò͘ chò tiùⁿ, siù ki-lō͘-peng tī tiùⁿ ê téng-bīn.
3:15 Nn̄g Ki Tâng-thiāu
( LOS 7: 15-22)
Tī tiān chêng chō nn̄g ki tâng-thiāu, koân saⁿ-cha̍p gō͘ tiú, múi ki thiāu ê thiāu-táu ê koân gō͘ tiú.
3:16 Koh chò liān-á an-tì tī thiāu-táu, koh chò sia̍h-liû chi̍t pah lia̍p, an-tì tī liān-á ê téng-bīn.
3:17 Hiahê thiāu chhāi tī tiān chêng, chi̍t ki tī chiàⁿ pêng, chi̍t ki tī tò pêng; chiàⁿ pêng ê hō-miâ kiò-chò Iá-kin, tò pêng ê hō-miâ kiò-chò Bô-oh-chuh.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。