歷代志上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
22:1 Ta-bi̍t kóng, " Che sī Siōng-chú — Siōng-tè ê chhù, chit-ê sī I-su-la-el hiàn sio-chè ê tôaⁿ. "
22:2 Chún-pī Khí-chō Sèng-tiān
Ta-bi̍t bēng-lēng chū-chi̍p tòa I-su-la-el tē ê chhut-gōa lâng, koh phài phah chio̍h ê sai-hū phah chio̍h, ài beh khí Siōng-chú ê tiān.
22:3 Ta-bi̍t chún-pī chin chē thih, chò mn̂g-sìⁿ ê teng kah sio-liân ê lō͘-ēng, koh chún-pī chin chē tâng, chē kah bē chhìn-.tit;
22:4 mā chún-pī sǹg bē liáu ê pek-hiuⁿ chhâ, in-ūi Si-tòng lâng kah Tu-lô lâng chài chin chē pek-hiuⁿ chhâ lâi-kàu Ta-bi̍t hia.
22:5 Ta-bi̍t kóng, " Góa ê kiáⁿ Só͘-lô-móng iáu koh sè-hàn koh nńg-chiáⁿ, beh kā Siōng-chú khí ê tiān tio̍h chin súi kàu-ke̍k, hō͘ I ê miâ-siaⁿ êng-kng kàu tī bān-kok, só͘-í, góa taⁿ tio̍h kā i chún-pī. " Ta-bi̍t chiū tī iáu-bōe sí ê chìn-chêng, chún-pī chin chē châi-liāu.
22:6 Ta-bi̍t chiū kiò i ê kiáⁿ Só͘-lô-móng-lâi, hoan-hù i tio̍h kā I-su-la-el ê Siōng-tè khí tiān.
22:7 Kā Só͘-lô-móng kóng, " Góa ê kiáⁿ, góa sim-lāi pún-lâi ū siūⁿ beh ūi Siōng-chú — góa ê Siōng-tè ê miâ khí tiān,
22:8 chóng-.sī, Siōng-chú ê ōe lîm-kàu góa kóng, ' Lí lâu chin chē lâng ê hoeh, tōa-tōa kau-chiàn, lí bē tàng ūi Góa ê miâ khí tiān, in-ūi lí tī Góa ê ba̍k-chiu chêng hō͘ chin chē lâng ê hoeh lâu tī tē-.ni̍h.
22:9 Lí khòaⁿ, lí ē seⁿ chi̍t-ê kiáⁿ, i ē chò thài-pêng ê lâng, Góa ē hō͘ i thài-pêng, hō͘ sì-kho͘-ûi chiahê tùi-te̍k bô koh kiáu-jiáu i. I ê miâ beh kiò-chò Só͘-lô-móng. Tī i chē-ūi ê ji̍t, Góa ē siúⁿ-sù an-chēng hô-pêng hō͘ I-su-la-el.
22:10 I ē ūi Góa ê miâ khí tiān. I beh chò Góa ê kiáⁿ, Góa beh chò i ê pē. Góa ē tī I-su-la-el kian-kò͘ i ê kok-ūi, ti̍t-kàu éng-oán. '
22:11 Góa ê kiáⁿ, taⁿ goān Siōng-chú kah lí tông-chāi, hō͘ lí heng-thong, khí lí ê Siōng-tè — Siōng-chú ê tiān, chiàu I só͘ kóng koan-hē lí ê.
22:12 To̍k-to̍k Siōng-chú siúⁿ-sù hō͘ lí chhong-bêng kah tì-hūi, hō͘ lí tī-lí I-su-la-el, lâi chun-thàn Siōng-chú — lí ê Siōng-tè ê lu̍t-hoat.
22:13 Lí nā kín-sīn chun-thàn Siōng-chú só͘ bēng-lēng Mô͘-se kà-sī I-su-la-el chiahê lu̍t-lē kah hoat-tō͘, lí chiū ē heng-thong. Lí tio̍h hùn-chì hó-táⁿ, m̄-bián kiaⁿ, m̄-bián lún.
22:14 Góa tī khùn-khó͘ tiong, ūi tio̍h Siōng-chú ê tiān, chún-pī kim cha̍p bān tha-lan-t, gîn chi̍t-pah bān tha-lan-t, tâng kah thih tāng kàu bē chhìn-.tit, in-ūi chin chē; góa mā ū chún-pī chhâ kah chio̍h, lí thang koh kā i ke-thiⁿ.
22:15 Jî-chhiáⁿ lí mā tio̍h ū chin chē sai-hū, phah-chio̍h ê, chò-ba̍k ê kah ta̍k chióng kang-têng-su, thang chò ta̍k chióng ê kang.
22:16 Kim, gîn, tâng, thih, chē kàu sǹg bē liáu. Lí tio̍h khí-lâi chò, goān Siōng-chú kah lí tông-chāi. "
22:17 Ta-bi̍t koh hoan-hù I-su-la-el ê chèng siú-léng lâi pang-chān i ê kiáⁿ Só͘-lô-móng, kóng,
22:18 " Siōng-chú — lín ê Siōng-tè kám bô kah lín tông-chāi? Kám bô tī sì-kho͘-ûi siúⁿ-sù hō͘ lín pêng-an? In-ūi I í-keng kā tòa tī chit-ê tē ê jîn-bîn kau tī góa ê chhiú, chit-ê tē chiū ē khut-ho̍k tī Siōng-chú kah I ê chú-bîn ê bīn-chêng.
22:19 Taⁿ lín tio̍h tiāⁿ tio̍h lín ê sim, lín ê ì-sù, cháu-chhōe Siōng-chú — lín ê Siōng-tè, mā tio̍h khí-lâi khí-chō Siōng-chú — Siōng-tè ê sèng-só͘, thang kā Siōng-chú ê iok-kūi kah Siōng-tè sèng ê khì-kū, poaⁿ ji̍p-khì ūi Siōng-chú ê miâ só͘ beh khí ê tiān. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。