歷代志上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
14:1 Ta-bi̍t tī Ê-lú-sa-lèm ê Oa̍h-tāng
( SMH 5: 11-16)
Tu-lô ông Hi-lâm chhe sù-chiá tòa pek-hiuⁿ chhâ kah thô͘-chúi sai-hū, chò-ba̍k sai-hū, lâi-kàu Ta-bi̍t hia, beh kā i khí chhù.
14:2 Ta-bi̍t chai-iáⁿ Siōng-chú tiāⁿ tio̍h ē siat-li̍p i chò I-su-la-el ông, koh ūi tio̍h I ê chú-bîn — I-su-la-el lâng ê iân-kò͘, lâi heng-khí I ê kok.
14:3 Ta-bi̍t tī Ê-lú-sa-lèm koh chhōa kúi-nā-ê bó͘, Ta-bi̍t koh seⁿ kiáⁿ-jî.
14:4 Tī Ê-lú-sa-lèm só͘ seⁿ chiahê kiáⁿ ê miâ kì tī ē-té: Siam-mu-ah, Sio-bal, Ná-than, Só͘-lô-móng,
14:5 Ip-hal, E-li-siu-ah, El-hoah-lia̍t,
14:6 No-gah, Ne-he̍k, Ia-hui-iah,
14:7 E-lí-sia-mah, Be-liah-tah, E-li-hoe-lia̍t.
14:8 Chiàn-iâⁿ Hui-lī-sū Lâng
( SMH 5: 17-25)
Hui-lī-sū lâng thiaⁿ tio̍h Ta-bi̍t siū boah iû chò I-su-la-el choân kok ê ông, Hui-lī-sū lâng chiū lóng khí-lâi chhōe Ta-bi̍t. Ta-bi̍t thiaⁿ-.tio̍h, chiū chhut-khì kā i tí-te̍k.
14:9 Hui-lī-sū lâng lâi, pâi-lia̍t tī Le-hoa-im ê soaⁿ-kok.
14:10 Ta-bi̍t mn̄g Siōng-tè kóng, " Góa kám tio̍h chiūⁿ-khì kong-kek Hui-lī-sū lâng? Lí kám ē kā in kau tī góa ê chhiú tiong? " Siōng-chú kóng, " Lí tio̍h khì, in-ūi Góa ē kā in kau tī lí ê chhiú tiong. "
14:11 In khí-lâi Ba-al-pe-la-chim, Ta-bi̍t tī hia kā in phah. Ta-bi̍t kóng, " Siōng-tè ēng góa ê chhiú chhiong sòaⁿ góa ê tùi-te̍k, chhin-chhiūⁿ chúi kā in chhiong sòaⁿ. " In-ūi ánne chiū kā hit só͘-chāi kiò-chò Ba-al-pe-la-chim.
14:12 Hui-lī-sū lâng kā in ê sîn-bêng pàng-hē tī hia, Ta-bi̍t bēng-lēng lâng ēng hóe kā i sio.
14:13 Hui-lī-sū lâng koh pâi-lia̍t tī soaⁿ-kok.
14:14 Ta-bi̍t koh mn̄g Siōng-tè, Siōng-tè kā i kóng, " M̄-thang khì jiok, tio̍h siám tùi piⁿ-á khì, tī sng-châi chhiū ê tùi-bīn lâi kā in kong-kek.
14:15 Lí nā thiaⁿ tio̍h sng-châi chhiū bóe ū kha-pō͘ ê siaⁿ, chiū tio̍h chhut-khì kau-chiàn, in-ūi Siōng-tè chò lí ê thâu-chêng chhut-.khì, beh phah Hui-lī-sū lâng. "
14:16 Ta-bi̍t chiū chun-thàn Siōng-chú só͘ hoan-hù ê, in phah Hui-lī-sū lâng ê kun-tūi, tùi Gi-bóng kàu Ge-chel.
14:17 Ta-bi̍t ê miâ-siaⁿ chiū soan-iông kàu ta̍k só͘-chāi, Siōng-chú hō͘ lia̍t kok lóng kiaⁿ i.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。