列王紀下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
23:1 Io-si-iah Hùi-tû Ī-kàu ê Kèng-pài
( LTH 34: 3-7, 29-33)
Ông chhe lâng chū-chi̍p Iô-tah kah Ê-lú-sa-lèm ê chèng tiúⁿ-ló.
23:2 Ông chiū chiūⁿ-khì Siōng-chú ê tiān, Iô-tah kûn-chiòng kah tòa tī Ê-lú-sa-lèm ê jîn-bîn, chè-si, sian-ti, í-ki̍p chèng lâng, bô-lūn tōa-sè, lóng kah i khì. Ông chiū kā Siōng-chú tiān lāi ngó͘-jiân tit tio̍h ê iok ê chheh it-chhè ê ōe, lóng tha̍k hō͘ in thiaⁿ.
23:3 Ông khiā tī thiāu piⁿ, tī Siōng-chú ê bīn-chêng li̍p-iok, beh chīn-sim, chīn-sèng sūn-ho̍k Siōng-chú, siú I ê kài-bēng kah kiàn-chèng ê ōe, í-ki̍p lu̍t-lē, lâi chiâⁿ chit pún chheh só͘ kì li̍p-iok ê ōe. Jîn-bîn lóng sêng-jīn chit-ê iok.
23:4 Ông bēng-lēng tōa-chè-si Hil-kí-iah kah tē-jī kip ê chè-si, í-ki̍p kò͘-mn̂g ê koaⁿ, kā ūi tio̍h Ba-al kah A-si-lah, í-ki̍p thiⁿ-téng ê bān-siōng só͘ chō hiahê khì-kū, poaⁿ-chhut Siōng-chú ê tiān, tī Ê-lú-sa-lèm gōa Kit-lông khe piⁿ ê chhân kā i sio-tiāu, tòa i ê hóe-hu lâi-kàu Be-thel.
23:5 Chêng Iô-tah lia̍t ông só͘ siat-li̍p pài ngó͘-siōng ê chè-si, tī Iô-tah hiahê siâⁿ kah Ê-lú-sa-lèm sì-kho͘-ûi ê soaⁿ-thâu tôaⁿ sio hiuⁿ ê, taⁿ ông lóng kā i lut, mā lut hiahê sio hiuⁿ tī Ba-al kah ji̍t, goe̍h, hêng-chheⁿ, í-ki̍p thiⁿ-téng ê bān-siōng ê.
23:6 I koh tòa A-si-lah chhut Siōng-chú ê tiān, khì Ê-lú-sa-lèm gōa, lâi-kàu Kit-lông khe, tī Kit-lông khe kā i sio, kā i tûi chò hún, ēng hit-ê hún iā tī jîn-bîn ê bōng.
23:7 Koh húi Siōng-chú tiān lāi ê lâm-sèng biō-chhiong ê chhù, to̍h-sī hū-lí ūi tio̍h A-si-lah chit pò͘-pêⁿ ê só͘-chāi.
23:8 Koh tùi Iô-tah hiahê siâⁿ chhōa hiahê chè-si chhut-.khì, kā chè-si sio hiuⁿ ê soaⁿ-thâu tôaⁿ òe lahsap, tùi Ge-bah kàu Bel-sí-bah, mā thiah-húi hiahê mn̂g ê soaⁿ-thâu tôaⁿ, to̍h-sī tī koán-siâⁿ ê Io-siú-ah ê mn̂g chêng, to̍h-sī lâng ji̍p siâⁿ mn̂g ê tò pêng.
23:9 Chóng-.sī, soaⁿ-thâu tôaⁿ ê chè-si tī Ê-lú-sa-lèm, bô chiūⁿ Siōng-chú ê tôaⁿ, chí ū tī in hiaⁿ-tī tiong chia̍h bô-kàⁿ piáⁿ.
23:10 I koh òe lahsap tī Biān-hin-nóm （ Chù, goân pán-pún sī im-e̍k, ū ê pán-pún ì-e̍k chò " Hin-nóm-kiáⁿ= Hin-nóm ê kiáⁿ"）ê Tô-húi-te̍k, bián-tit lâng tī hia hō͘ in ê kiáⁿ-jî keng-kòe hóe, lâi hiàn hō͘ Mô͘-lo̍k.
23:11 I koh tû-khì Iô-tah lia̍t ông hiàn hō͘ ji̍t-thâu hiahê bé, tī ji̍p Siōng-chú tiān ê só͘-chāi, tī thài-kàm Ná-than Me-le̍k óa-kīn mn̂g-lông ê chhù, koh ēng hóe sio ji̍t-thâu hiahê chhia.
23:12 Iô-tah lia̍t ông tī A-khà-chuh ê lâu-téng ê chhù kòa só͘ khí ê chè-tôaⁿ kah Má-ná-se tī Siōng-chú tiān nn̄g-ê īⁿ tiong só͘ khí ê tôaⁿ, ông lóng kā i húi-hoāi, tùi hit só͘-chāi kā i chhian-sóa cháu, kā i ê hún piàⁿ tī Kit-lông khe.
23:13 Í-chêng I-su-la-el ông Só͘-lô-móng tī Ê-lú-sa-lèm ê thâu-chêng, tī siâ-phiah-soaⁿ ê chiàⁿ pêng só͘ khí ê soaⁿ-thâu tôaⁿ, ho̍k-sāi Si-tòng lâng khó-ò͘ⁿ ê A-si-tha-lot, Mô͘-ap lâng khó-ò͘ⁿ ê Ke-mô͘-sih, Am-móng lâng khó-ò͘ⁿ ê Mil-kham ê, ông lóng kā i òe lahsap,
23:14 koh húi-hoāi hiahê thiāu-siōng, chhò hiahê A-si-lah, hō͘ lâng ê kut-thâu chhiong-móa hiahê só͘-chāi.
23:15 Tī Be-thel ê tôaⁿ, í-ki̍p Ne-bat ê kiáⁿ Ia-lô-ba-am, hō͘ I-su-la-el hoān chōe ê, só͘ khí ê soaⁿ-thâu biō, taⁿ Io-si-iah húi hit-ê tôaⁿ kah soaⁿ-thâu biō, koh sio i ê soaⁿ-thâu biō, kā i tûi chò hún, sūn-sòa sio hit-ê A-si-lah.
23:16 Io-si-iah oa̍t tńg-sin khòaⁿ tio̍h soaⁿ-.ni̍h hiahê bōng, chiū chhe lâng khì the̍h bōng lāi ê kut-thâu, tī tôaⁿ téng sio, lâi kā i òe lahsap, chiàu Siōng-chú só͘ kóng, to̍h-sī chá-chêng teh soan-pò͘ chiahê tāichì ê Siōng-tè ê lô͘-po̍k só͘ soan-pò͘ ê.
23:17 Io-si-iah kóng, " Góa só͘ khòaⁿ-.tio̍h ê chio̍h-pi sī siáⁿ-mi̍h? " Hitê siâⁿ ê lâng kā i kóng, " Chá-chêng ū Siōng-tè ê lô͘-po̍k tùi Iô-tah lâi, tāi-seng kóng lí hiān-kim só͘ chò ê tāichì lâi kong-kek Be-thel ê tôaⁿ ê, chit-ê sī i ê bōng. "
23:18 Io-si-iah kóng, " M̄-thang chhap i, lâng m̄ thang chhian-sóa i ê kut-thâu. " In chiū bô tāng tio̍h i ê kut-thâu, mā bô tāng tio̍h tùi Sa-má-lī-a lâi hit-ê sian-ti ê kut-thâu.
23:19 Sa-má-lī-a hiahê siâⁿ lāi soaⁿ-thâu ê chhù, to̍h-sī chá-chêng I-su-la-el chiahê ông só͘ khí lâi kek Siōng-chú ê siū-khì ê, taⁿ Io-si-iah kā i húi tiāu, chiàu i só͘ kiâⁿ tī Be-thel ê lâi kiâⁿ tī in;
23:20 koh tī tôaⁿ téng thâi-sí hit só͘-chāi soaⁿ-thâu biō ê chè-si, mā tī tôaⁿ téng sio lâng ê kut-thâu liáu-āu chiah tńg-khì Ê-lú-sa-lèm.
23:21 Io-si-iah Kòe Pôaⁿ-kòe-cheh
( LTH 35: 1-19)
Ông bēng-lēng chèng lâng kóng, " Tio̍h siú Pôaⁿ-kòe-cheh lâi ho̍k-sāi Siōng-chú — lín ê Siōng-tè, chiàu chit-ê iok ê chheh só͘ kì-chài ê. "
23:22 Tùi sū-su tī-lí I-su-la-el ê sî, kàu I-su-la-el ông kah Iô-tah lia̍t ông ê sî, si̍t-chāi iáu-bōe ū siú chhin-chhiūⁿ chit khoán ê Pôaⁿ-kòe-cheh.
23:23 Chí-ū Io-si-iah ông cha̍p-peh nî, tī Ê-lú-sa-lèm siú chit-ê Pôaⁿ-kòe-cheh ho̍k-sāi Siōng-chú.
23:24 Io-siú-ah ê Kî-tha Kái-kek
Iô-tah tē kah Ê-lú-sa-lèm só͘-ū thiàu-tâng ê, chò sai-kong ê kah chhù lāi ê ngó͘-siōng, sîn-pu̍t, í-ki̍p it-chhè khó-ò͘ⁿ ê mi̍h, Io-si-iah lóng hùi-tû tiāu, lâi chiâⁿ lu̍t-hoat ê ōe, sī kì tī chè-si Hil-kí-iah tī Siōng-chú ê tiān só͘ tit tio̍h ê chheh ê.
23:25 Tī Io-si-iah í-chêng, bô ū ông chhin-chhiūⁿ i chīn-sim, chīn-sèng, chīn-la̍t kui-ǹg Siōng-chú, chiàu Mô͘-se it-chhè ê lu̍t-hoat; tī i í-āu, mā bô chhut chi̍t-ê ông chhin-chhiūⁿ i ánne.
23:26 Chóng-.sī, Siōng-chú bô soah I béng-lia̍t ê tōa siū-khì, to̍h-sī I tùi Iô-tah hoat-chhut ê siū-khì, sī in-ūi Má-ná-se só͘ kek tio̍h I siū-khì hiahê tāichì.
23:27 Siōng-chú kóng, " Góa beh chhian-sóa Iô-tah lī-khui Góa ê bīn-chêng, chhin-chhiūⁿ chhian-sóa I-su-la-el ánne; Góa ē khì-sak Góa só͘ kéng chit-ê siâⁿ, to̍h-sī Ê-lú-sa-lèm kah chit keng tiān, to̍h-sī Góa kí i lâi kóng Góa ê miâ ē tī hia ê. "
23:28 Io-si-iah Thóng-tī ê Kiat-kó
( LTH 35: 20-36, 1)
Io-si-iah kî-tha ê tāichì, kiàn-nā i só͘ kiâⁿ ê, kám bô lóng kì tī Iô-tah lia̍t ông ê kì-lio̍k?
23:29 Io-si-iah ê nî-kan, Ai-gi̍p ông Pa-lo-ne-koh khì Iu-hu-la-té tōa hô kong-kek A-siul ông, Io-si-iah khì kā i tí-tòng. Ai-gi̍p ông tī Me-gi-tóng tú tio̍h Io-si-iah, chiū kā i thâi.
23:30 I ê jîn-sîn ēng chhia chài i ê sin-si tùi Me-gi-tóng tòa kàu Ê-lú-sa-lèm, bâi-chòng tī i pún-sin ê bōng. Jîn-bîn ēng iû boah Io-si-iah ê kiáⁿ E-hoa-há-chuh, kā i siat-li̍p chò ông, sòa-chiap i ê lāu-pē.
23:31 Iô-tah Ông E-hoa-há-chuh
( LTH 36: 2-4)
E-hoa-há-chuh chē-ūi ê sî, jī-cha̍p saⁿ hòe, tī Ê-lú-sa-lèm chò ông saⁿ goe̍h-ji̍t. I ê lāu-bú ê miâ kiò-chò Ha-mu-tal, sī Lip-nah lâng I-é-lí-miah ê chabó͘ kiáⁿ.
23:32 I kiâⁿ Siōng-chú só͘ khòaⁿ-chò pháiⁿ ê tāichì, chiàu i ê chó͘-sian só͘ kiâⁿ ê it-chhè.
23:33 Pa-lo-ne-koh kā i koaiⁿ-kìm tī Ha-mat tē ê Lip-la̍h, hō͘ i tī Ê-lú-sa-lèm bô chò ông, koh hō͘ hit kok chìn-kòng gîn chi̍t pah tha-lan-t, kim chi̍t tha-lan-t.
23:34 Pa-lo-ne-koh siat-li̍p Io-si-iah ê kiáⁿ E-li-a-kim sòa-chiap i ê lāu-pē Io-si-iah chò ông, kā i kái miâ kiò-chò E-hō͘-iá-kim, mā chhōa E-hoa-há-chuh lâi-kàu Ai-gi̍p, i chiū sí tī hia.
23:35 Iô-tah Ông E-hō͘-iá-kim
( LTH 36: 5-8)
E-hō͘-iá-kim ēng gîn kah kim hō͘ Hôa-láu, chiàu Hôa-láu ê bēng-lēng, tùi hit tē-hng siu gîn lâi hō͘ i, kiông-thiu hit tē-hng jîn-bîn ê kim-gîn, ta̍k lâng chiàu só͘ phài tiāⁿ tio̍h ê, lâi hō͘ Pa-lo-ne-koh.
23:36 E-hō͘-iá-kim chē-ūi ê sî, jī-cha̍p gō͘ hòe, tī Ê-lú-sa-lèm chò ông, kiōng cha̍p-it nî. I ê lāu-bú ê miâ kiò-chò Che-bi-tah, sī Lu-mah lâng Pe-tá-iah ê chabó͘ kiáⁿ.
23:37 E-hō͘-iá-kim kiâⁿ Siōng-chú só͘ khòaⁿ-chò pháiⁿ ê tāichì, chiàu i ê chó͘-sian só͘ kiâⁿ ê it-chhè.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。