列王紀下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
21:1 Iô-tah Ông Má-ná-se
LTH 33:1-20
Má-ná-se chē-ūi ê sî cha̍p-jī hòe, tī Ê-lú-sa-lèm chò ông kiōng gō͘-cha̍p gō͘ nî. I ê lāu-bú ê miâ kiò-chò He-hu-chi-bah.
21:2 I kiâⁿ Siōng-chú só͘ khòaⁿ-chò pháiⁿ ê tāichì, o̍h gōa-pang lâng só͘ kiâⁿ khó-ò͘ⁿ ê tāichì, to̍h-sī Siōng-chú tī I-su-la-el ê bīn-chêng só͘ kóaⁿ-chhut ê,
21:3 In-ūi i ê lāu-pē Hi-che-kia só͘ húi ê soaⁿ-thâu tôaⁿ, i koh kā i khí khí-.lâi, koh ūi Ba-al khí tôaⁿ, chò A-si-lah, chiàu I-su-la-el ông A-hap ê só͘ chò, koh kèng-pài thiⁿ-téng ê bān-siōng lâi kā i ho̍k-sāi.
21:4 Tī Siōng-chú ê tiān lāi khí kúi-nā-ê tôaⁿ, Siōng-chú bat kí chit-ê tiān, kóng, " Góa ē kā Góa ê miâ an-tì tī Ê-lú-sa-lèm. "
21:5 I tī Siōng-chú ê tiān ê nn̄g-ê īⁿ lāi, ūi tio̍h thiⁿ-téng ê bān-siōng khí tôaⁿ.
21:6 Koh hō͘ i ê kiáⁿ keng-kòe hóe, koh ū khòaⁿ tiāu-thâu, ēng hoat-su̍t, ēng thiàu-tâng ê, chhiáⁿ sai-kong, kiâⁿ chin chē Siōng-chú só͘ khòaⁿ-chò pháiⁿ ê tāichì, lâi kek I ê siū-khì.
21:7 Koh tī tiān lāi chhāi i só͘ chō A-si-lah tiau-khek ê siōng, chit keng tiān to̍h-sī Siōng-chú bat tùi Ta-bi̍t kah i ê kiáⁿ Só͘-lô-móng kí i lâi kóng, " Chit keng tiān kah Ê-lú-sa-lèm, to̍h-sī Góa tī I-su-la-el chèng chi-cho̍k tiong só͘ kéng ê, Góa beh an-tì Góa ê miâ tī hia, ti̍t-kàu éng-oán.
21:8 I-su-la-el lâng nā chip-siú lâi kiâⁿ Góa it-chhè só͘ bēng-lēng in ê, chiàu Góa ê lô͘-po̍k Mô͘-se só͘ bēng-lēng in it-chhè ê lu̍t-hoat, Góa chiū bô koh hō͘ in ê kha î-sóa, lī-khui Góa só͘ siúⁿ-sù hō͘ in chó͘-sian ê tē. "
21:9 Chóng-.sī, in bô chun-thàn, Má-ná-se ín-iú in kiâⁿ pháiⁿ, pí Siōng-chú tī I-su-la-el lâng ê bīn-chêng só͘ bia̍t ê lia̍t kok koh khah siong-tiōng.
21:10 Siōng-chú thok I ê lô͘-po̍k, hiahê sian-ti, kóng,
21:11 " In-ūi Iô-tah ông Má-ná-se kiâⁿ chiahê khó-ò͘ⁿ ê tāichì, pí i í-chêng ê A-mô͘-lī lâng só͘ kiâⁿ ê koh khah pháiⁿ, koh ēng i ê ngó͘-siōng hō͘ Iô-tah lâng hām-lo̍h chōe,
21:12 Só͘-í, Siōng-chú — I-su-la-el ê Siōng-tè ánne kóng: " Lí khòaⁿ, Góa beh kàng chai-hō tī Ê-lú-sa-lèm kah Iô-tah, hō͘ só͘-ū thiaⁿ-.tio̍h ê lâng nn̄g-ê hīⁿ-khang ē tiô khí-.lâi.
21:13 Góa ē ēng niû Sa-má-lī-a ê chîn-sòaⁿ kah A-hap ê ke ê tūi-chîn, khan tī Ê-lú-sa-lèm ê téng-bīn, beh chhin-chhiūⁿ lâng teh chhit pôaⁿ ánne lâi chhit Ê-lú-sa-lèm, chhit-liáu chiū péng-phak.
21:14 Góa ē pàng-lī Góa ê sán-gia̍p só͘ chhun lo̍h-.lâi ê, kā in kau tī tùi-te̍k ê chhiú, in ē chiâⁿ-chò in só͘-ū ê tùi-te̍k só͘ lia̍h só͘ chhiúⁿ ê tùi-siōng,
21:15 in-ūi in tùi in ê chó͘-sian chhut Ai-gi̍p ê ji̍t kàu kin-á-ji̍t, tiāⁿtiāⁿ kiâⁿ Góa só͘ khòaⁿ-chò pháiⁿ ê tāichì, lâi kek Góa siū-khì. "
21:16 Má-ná-se hō͘ Iô-tah lâng hoān chōe, kiâⁿ Siōng-chú só͘ khòaⁿ-chò pháiⁿ ê tāichì, i chit-ê chōe í-gōa, koh lâu chin chē bô chōe ê lâng ê hoeh, móa Ê-lú-sa-lèm, tùi chit kek kàu hit kek.
21:17 Má-ná-se kî-tha ê tāichì, kiàn-nā i só͘ kiâⁿ ê kah i só͘ hoān ê chōe, kám bô lóng kì tī Iô-tah lia̍t ông ê kì-lio̍k?
21:18 Má-ná-se kah i ê chó͘-sian tâng khùn, bâi-chòng tī i kakī kiong lāi ê hn̂g, to̍h-sī U-chà ê hn̂g. I ê kiáⁿ Am-móng sòa-chiap i chò ông.
21:19 Iô-tah Ông Am-móng
(LTH 33:21-25)
Am-móng chē-ūi ê sî, jī-cha̍p jī hòe, tī Ê-lú-sa-lèm chò ông keng-kòe nn̄g nî. I ê lāu-bú ê miâ kiò-chò Me-siu-le-met, sī Iot-bah lâng Ha-lu-chuh ê chabó͘ kiáⁿ.
21:20 I kiâⁿ Siōng-chú só͘ khòaⁿ-chò pháiⁿ ê tāichì, chhin-chhiūⁿ i ê lāu-pē Má-ná-se só͘ chò ê;
21:21 chiàu ánne kiâⁿ i ê lāu-pē só͘ kiâⁿ it-chhè ê lō͘, ho̍k-sāi lāu-pē só͘ ho̍k-sāi hiahê ngó͘-siōng,
21:22 khì-sak Siōng-chú — i ê chó͘-sian ê Siōng-tè, bô kiâⁿ Siōng-chú ê tō-lō͘.
21:23 Am-móng ê jîn-sîn pōe-poān i, tī ông-kiong lāi kā ông thâi-sí.
21:24 Chóng-.sī, jîn-bîn thâi-sí hiahê pōe-poān Am-móng ông ê lâng, chiū siat-li̍p i ê kiáⁿ Io-si-iah sòa-chiap i chò ông.
21:25 Am-móng kî-tha só͘ kiâⁿ ê tāichì, kám bô kì tī Iô-tah lia̍t ông ê kì-lio̍k?
21:26 I hông bâi-chòng tī U-chà ê hn̂g ê kakī ê bōng. I ê kiáⁿ Io-si-iah sòa-chiap i chò ông.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。