列王紀上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
16 上主ê話臨到哈拿尼ê kiáⁿ耶戶,攻擊巴沙講:
2 「我已經tùi塵埃ê中間kā你舉起,設立你做我ê子民—以色列人ê君王,你竟然行耶羅波安ê路,hō͘我ê子民—以色列人犯罪,tùi in ê罪來激我受氣。
3 你看,我ē kā巴沙kah伊ê家全部除滅,我mā ē hō͘你ê家親像尼八ê kiáⁿ耶羅波安ê家ánne。
4 凡若屬巴沙ê人,死tī城裡ê,狗ē kā伊食,死tī田野ê,空中ê鳥ē kā伊食。」
5 巴沙其他ê tāichì kah伊所行ê,以及伊ê能力,kám無lóng記tī以色列列王ê記錄?
6 巴沙kah伊ê祖先同睏,埋葬tī得撒。伊ê kiáⁿ以拉續接伊做王。
7 上主ê話koh臨到哈拿尼ê kiáⁿ,耶戶先知,攻擊巴沙mā攻擊伊ê家,因為伊tī上主ê目chiu 前所行一切ê pháiⁿ,用伊ê手ê所做ê來激祂ê受氣,親像耶羅波安ê家,mā因為伊phah死伊ê全家。
8 以色列王以拉
偤大王亞撒二十六年,巴沙ê kiáⁿ以拉tī得撒坐位做以色列王,共兩年。
9 管理伊一半戰車ê人臣心利背叛伊。當伊tī 得撒,to̍h是tī得撒ê管家A-cha̍p ê厝食酒醉ê時,
10 心利to̍h入去kā伊phah死,篡伊ê位。這是偤大王亞撒二十七年ê tāichì。
11 心利開始做王。當伊坐位ê時,就thâi死巴沙全家,無論親人朋友,lóng無kā伊留kah半個chapo͘丁。
12 親像ánne,心利滅巴沙全家,tútú照上主託耶戶先知所講hiahê攻擊巴沙ê話。
13 這是因為巴沙一切ê罪kah伊ê kiáⁿ以拉ê罪;in兩人所犯tio̍h ê mā hō͘以色列人犯tio̍h,in用虛假ê偶像來激上主—以色列ê上帝受氣。
14 以拉其他ê tāichì,見若伊所行ê,kám無lóng記tī以色列chiahê王ê記錄?
15 以色列王心利
偤大王亞撒二十七年,心利tī得撒做王七日。Hit時,人民tú-á紮營圍攻腓利士ê Gip-be-thòng。
16 Tī營中ê人民聽tio̍h心利背叛,kohthâi死王,所以,以色列人民hit日to̍h tī營中設立軍長暗利做以色列王。
17 暗利kah以色列人民,tùi Gip-be-thòng上去圍困得撒。
18 心利看tio̍h城已經破,to̍h入去王宮ê城堡,放火燒王宮,kakī 死tī內面。
19 這是因為伊所犯ê罪,是行上主所看做pháiⁿ ê,行耶羅波安ê路,照ánne行所犯ê罪,koh hō͘以色列人犯罪。
20 心利其他ê tāichì kah伊所行背叛ê tāichì,kám無記tī以色列chiahê王ê記錄?
21 以色列王暗利
Hit時,以色列人民分做兩pêng;一半tòe基納ê kiáⁿ Thê-pí-nî,beh kā伊設立做王;另外一半tòe暗利。
22 總是,tòe暗利ê人民贏過tòe基納ê kiáⁿ Thê-pí-nî ê人。Thê-pí-nî死了後,暗利to̍h做王。
23 偤大王亞撒三十一年,暗利坐位做以色列王,共十二年;tī得撒做王六年。
24 暗利用兩他連得ê銀tùi Sal-má買撒馬利亞山,tī山頂起造,就照hitê山ê原主Sal-má ê名,kā所起ê城號名叫做撒馬利亞。
25 暗利行上主看做pháiⁿ ê tāichì,比伊以前所有ê王koh khah pháiⁿ。
26 因為伊行尼八ê kiáⁿ耶羅波安ê路,koh行伊hō͘以色列人所犯ê罪,用虛假ê偶像來激上主—以色列ê上帝受氣。
27 暗利其他所行ê tāichì kah伊所顯出ê能力,kám無記tī以色列chiahê王ê記錄?
28 暗利kah伊ê祖先同睏,埋葬tī撒馬利亞。伊ê kiáⁿ亞哈續接伊做王。
29 以色列王亞哈
偤大王亞撒三十八年,暗利ê kiáⁿ亞哈坐位,做以色列王。暗利ê kiáⁿ亞哈tī撒馬利亞做以色列王二十二年。
30 暗利ê kiáⁿ亞哈行上主看做pháiⁿ ê tāichì,比伊以前所有ê王koh khah pháiⁿ。
31 伊行尼八ê kiáⁿ耶羅波安ê罪,iáu koh掠做是小khóa tāichì;伊koh娶西頓王Iat-pa-le̍k ê chabó͘ kiáⁿ耶洗別做bó͘,去服事巴力,來kā伊敬拜。
32 伊tī撒馬利亞起巴力ê廟,tī廟內kā巴力起壇。
33 亞哈koh造亞舍拉;亞哈所行ê tāichì激起上主—以色列ê上帝ê受氣,比伊以前ê以色列列王koh khah傷重。
34 當伊坐位ê時,有伯特利人Hi-el重起耶利哥城;hē地基ê時,死大kiáⁿ亞比蘭,hē門ê時,死soah尾kiáⁿ Se-gup,tú照上主託嫩ê kiáⁿ約書亞所講ê話。
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。