啟示錄 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
7 Hit十四萬四千個以色列人受封印
然後我看tio̍h四個天使khiā tī地ê四角頭，kā地四面ê風擋teh，hō͘風bē 吹來地、海kah一切ê樹木。
2 我koh看tio̍h另外一个天使手the̍h永遠活ê上帝ê印，tùi日出ê所在起來，對領受權柄thang傷害地kah海ê hit四個天使大聲hoah，
3 講：「阮iáu未tī咱ê上帝ê奴僕ê頭額蓋印做記號以前，lín m̄ thang傷害地、海kah樹木。」
4 我有聽tio̍h以色列ê kiáⁿ孫各支族ê中間，受蓋印ê人數總共有十四萬四千。
5 屬偤大支族受蓋印ê有一萬二千， 屬流便支族ê有一萬二千，屬迦得支族ê有一萬二千，
6 屬亞設支族ê有一萬二千，屬拿弗他利支族ê有一萬二千，屬瑪拿西支族ê有一萬二千，
7 屬西緬支族ê有一萬二千，屬利未支族ê有一萬二千，屬以薩迦支族ê有一萬二千，
8 屬西布倫支族ê有一萬二千，屬約瑟支族ê有一萬二千，屬便雅憫支族ê有一萬二千。
9 一大陣人kah第七个封印
然後我koh看tio̍h一大陣人，數目無人算ē了。In tùi ta̍k國、ta̍k族、ta̍k款人民、ta̍k種語言來，in lóng khiā tī寶座ê面前，身穿白衫，手gia̍h棕樹枝。
10 In大聲hoah：願拯救歸hō͘坐tī寶座ê上帝，mā歸hō͘羊羔！
11 眾天使khiā tī寶座kah長老以及四隻活物ê四箍圍，仆落去寶座前敬拜上帝，
12 講：「阿們！願oló、榮光、智慧、感謝、尊貴、權能、氣力，lóng歸hō͘咱ê上帝，一直到萬世代無盡。阿們！」
13 長老中間有一个問我講：「Chiahê穿白衫ê是啥人？In是tùi tó位來？」
14 我應講：「先生，你chiah知影。」伊kā我講：「Chiahê是經過hitê大災難出來ê。In用羊羔ê血kā in ê衫洗kah白白白。
15 In就ánne tī上帝ê寶座前，暝日tī祂ê聖殿服事祂。坐tī寶座ê hit位ē kah in同在來保守in。
16 In bē koh iau，mā bē koh嘴乾，日頭kah一切ê燒熱lóng bē kā in傷害。
17 因為坐tī寶座ê羊羔beh做in ê牧者，chhōa in來到活命ê水泉。上帝ē tùi in ê目chiu ，拭掉in 所有ê目屎。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。